Tag: انتخابات کی خبریں، الیکشن کی خبریں،

  • اگر موقع ملا تو پاکستان کو ترکی اور ملیشیا بنادوں گا، شہبازشریف

    اگر موقع ملا تو پاکستان کو ترکی اور ملیشیا بنادوں گا، شہبازشریف

    پنڈی گھیپ: مسلم لیگ ن کے صدر اور سابق وزیر اعلیٰ پنجاب شہباز شریف نے کہا ہے کہ  اگر عوام نے دوبارہ منتخب کیا اور اللہ نے موقع دیا تو پاکستان کو ترکی اور ملیشیا بنادوں گا۔

    پنڈی گھیپ میں جلسہ عام سے خطاب کرتے ہوئے شہباز شریف کا کہنا تھا کہ ملک کو اور ایٹمی قوت بنانے اور مسائل سے نکالنے والے لیڈر کو بیٹی کے سامنے گرفتار کیا گیا۔

    اُن کا کہنا تھا کہ مسلم لیگ ن کو حکومت ملی تو معیشت کا برا حال تھا مگر ہم نے اقدامات کیے اور مسائل پر قابو پایا، ہمارے دور میں ڈالر 100 روپے کا تھا مگر آج  130 روپے تک پہنچ گیا۔

    شہباز شریف کا کہنا تھا کہ ہمارے دور میں چکوال اور اٹک میں اسپتال بنائے گئے، ہم نے  چھوٹے کسانوں کو بلا سود قرضے فراہم کیے، اگر عوام نے دوبارہ موقع دیا توپاکستان کو ترکی اورملیشیا بنادوں گا۔

    مسلم لیگ ن کے صدر کا کہنا تھا کہ  سی پیک کامغربی روٹ یہاں سے گزرہا ہے، اٹک، چکوال میں نوجوانوں کے روزگار اس علقے میں انڈسٹریل اسٹیٹ لاؤں گا اور اگر اللہ نے موقع دیا تو ایک ایک گاؤں میں سوئی گیس لاؤں گا،  دانش اسکول کا وعدہ میڈیکل کالج کاوعدہ پوراکیا، اب ضلع اٹک میں ٹیکنیکل یونیورسٹی تعمیر کی جائیں گی۔

    تحریک انصاف کے چیئرمین پر تنقید کرتے ہوئے شہباز شریف کا کہنا تھا کہ  عمران خان نے فراڈ کمپنی کوپشاور میٹرو کا ٹھیکہ دیا،  پنجاب حکومت اگر  ایسا کرتی تو نیب ہمیں فوری کالے پانی کی سزا دیتی۔ انہوں نے مزید کہا کہ عمران خان نے خیبرپختونخوا کا بیڑہ غرق کردیا، الزام خان کے دماغ کی طرح ان کا جلسہ بھی خالی ہوتا ہے۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • انتخابات 2018، ووٹر کو موبائل پر پولنگ اسٹیشن نمبر بتانے کی سہولت متعارف

    انتخابات 2018، ووٹر کو موبائل پر پولنگ اسٹیشن نمبر بتانے کی سہولت متعارف

    اسلام آباد: الیکشن کمیشن آف پاکستان (ای سی پی) نے ووٹرز کے لیے پولنگ اسٹیشن نمبر بتانے کی سہولت متعارف کرادی۔

    تفصیلات کے مطابق الیکشن کمیشن آف پاکستان کی جانب سے جاری اعلامیے میں کہا گیا ہے کہ ’اب ووٹرز اپنا قومی شناختی کارڈ نمبر 8300 پر بذریعہ SMS بھیج کر اپنے ووٹ کی تفصیل اور پولنگ اسٹیشن نمبر  بھی معلوم کرسکیں گے‘۔

    ترجمان الیکشن کمیشن کے مطابق عوام کو معلومات فراہم کرنے کے لیے موبائل سروس کی سہولت گزشتہ دو برسوں سے دی جارہی ہے تاہم اب ڈیٹا بیس اپ ڈیٹ کیا گیا جس کے بعد پولنگ اسٹیشن کا نمبر بھی بذریعہ ایس ایم ایس انہیں بھیجا جائے گا۔

    دوسری جانب  الیکشن کمیشن آف پاکستان نے انتخابات 2018 کے نتائج کا سسٹم نادرا سے منسلک کرنے کے اقدامات کا آغاز کیا جس کے بعد الیکشن کے نتائج  کی ترسیل کے لیے نادرا کا جدید نظام استعمال کیا جائے گا۔

    مزید پڑھیں: الیکشن کمیشن کی موبائل ایپ میں نئے فیچرز شامل

    الیکشن کمیشن حکام کے مطابق اس ضمن میں نادرا کی ٹیمیں ملک بھر کے اضلاع میں پہنچ چکیں جو  ریٹرننگ افسران سے ملاقاتیں کریں گی اور پھر اٹھارہ سے اکیس جولائی تک پریذائیڈنگ افسران کی موجودگی میں سسٹم کو جوڑیں گی۔

    واضح رہے کہ ملک بھر میں 25 جولائی کو عام انتخابات کا انعقاد کیا جارہا ہے ، جس کی تیاریوں کو حتمی شکل دی جارہی ہے اور اس روز عام تعطیل کا بھی اعلان کر رکھا ہے۔


    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ووٹ ڈالنے کی ترغیب، 30 مفتیان کرام کا مشترکہ اعلامیہ

    ووٹ ڈالنے کی ترغیب، 30 مفتیان کرام کا مشترکہ اعلامیہ

    لاہور: سنی اتحاد کونسل پاکستان کے 30 مفتیانِ کرام نے ووٹ دینے کو قومی فریضہ اور نہ ڈالنے کو جرم قرار دیتے ہوئے مشترکہ اعلامیہ جاری کردیا۔

    تفصیلات کے مطابق سنی اتحاد کونسل کے چیئرمین سربراہ صاحبزادہ حامد رضا کی اپیل پر 30 مفتیانِ کرام نے اجتماعی مشترکہ اعلامیہ جاری کیا جس میں ووٹ ڈالنے کی ترغیب دی گئی ہے۔

    مشترکہ اعلامیے میں عوام کو بتایا گیا ہے کہ ووٹ دینا فرض ہے البتہ کسی ایسے امیدوار کو ووٹ دینا گناہ اور قومی جرم ہے جس کا کردار ٹھیک نہیں اور نہ وہ صادق و امین ہے۔

    اعلامیے میں مزید کہا گیا ہے کہ اہل امیدوار کو ووٹ دینے سے قوم کو فلاح و نجات حاصل ہوسکتی ہے کیونکہ یہ مقدس امانت اور قومی فریضہ ہے جبکہ اگر عوام حق رائے دہی استعمال نہیں کریں گے تو اس میں من الحیث القوم بربادی کا خدشہ ہے۔

    مزید پڑھیں: الیکشن کمیشن انتخابات 2018 کے نتائج نادرا سے منسلک موبائل سے وصول کرے گا

    مفتیان کرام نے خواتین کو حق رائے دہی کے استعمال سے روکنے کو شرعی طور پر غلط اور قومی جرم قرار دیا۔

    واضح رہے کہ ملک بھر میں عام انتخابات کا انعقاد 25 جولائی کو کیا جائے گا جس میں قومی و صوبائی اسمبلی کی نشتوں پر چاروں صوبوں سے امیدواران انتخابی میدان میں اتریں گے۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • آصف زرداری کو شکست دینے کے لیے ایم کیو ایم اور جی ڈی اے نے ہاتھ ملا لیے

    آصف زرداری کو شکست دینے کے لیے ایم کیو ایم اور جی ڈی اے نے ہاتھ ملا لیے

    نوابشاہ: ایم کیو ایم پاکستان اور گرینڈ ڈیموکریٹک الائنس نے پیپلزپارٹی کے شریک چئیرمین آصف علی زرداری کو قومی اسمبلی کے حلقہ این اے 213 پر شکست دینے کے لیے سیٹ ایڈجسٹمنٹ کا اعلان کردیا۔

    تفصیلات کے مطابق جے ڈی اے اور ایم کیو ایم نے پیپلزپارٹی کو نوابشاہ میں ٹف ٹائم دینے کا فیصلہ کرتے ہوئے اتحاد کا اعلان کیا جس کے مطابق آصف زرداری کے مد مقابل متحدہ کے حلقہ این اے 213 پر نامزد امیدوار عبدالرؤف صدیقی گرینڈ ڈیموکریٹک الائنس کے امیدوار کے حق میں دستبردار ہوگئے۔

    قومی اسمبلی کے اس حلقے سے ایم کیو ایم اور جی ڈی اے کے مشترکہ امیدوار سردار بشیر محمد رند ہوں گے جبکہ گرینڈ ڈیموکریٹک الائنس صوبائی اسمبلی کی نشست پی ایس 38 پر متحدہ کے امیدوار کی حمایت کرے گی۔

    مزید پڑھیں: ڈاکٹر فہمیدہ مرزا کا گرینڈ ڈیموکریٹک الائنس کا حصہ بننے کا اعلان

    قومی اسمبلی کی طرح نوابشاہ کی صوبائی نشست پر دونوں جماعتوں کے مشترکہ امیدوار نعیم اختر ہوں گے جن کا تعلق ایم کیو ایم پاکستان سے ہے۔

    خیال رہے کہ ایم کیو ایم نے سابق صوبائی وزیر برائے صنعت  و تجارت رؤف صدیقی کو قومی اسمبلی کی دونشتوں سے الیکشن لڑنے کا ٹکٹ دیا تھا تاہم اتحاد کے بعد اب وہ صرف این اے 244 سے الیکشن لڑیں گے۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • بلوچستان عوامی پارٹی کا جمعیت علماء اسلام کو بڑا دھچکا

    بلوچستان عوامی پارٹی کا جمعیت علماء اسلام کو بڑا دھچکا

    کوئٹہ: جمیعت علماء اسلام ف کے رہنما نور خان ترین ایڈوکیٹ نے بلوچستان عوامی پارٹی میں شمولیت کا اعلان کردیا۔

    تفصیلات کے مطابق جمیعت علماء اسلام کے صوبائی رہنما نے بی اے پی کے جنرل سیکریٹری کے ہمراہ پریس کانفرنس کرتے ہوئے جے یو آئی سے راہیں جدا کرنے کا اعلان کیا۔

    اُن کا کہنا تھا کہ جے یو آئی ف میں گئی گروپ بن چکے جس کے باعث اب کام کرنا یا اُس جماعت کے ساتھ چلنا ناممکن ہوگیا۔ اس موقع پر آزاد امیدوار محمد صدیق نے بھی بی این پی میں شمولیت کا اعلان کیا۔

    بی اے پی کے جنرل سیکریٹری کا کہنا تھا کہ لوگ ہمارے کارواں میں شامل ہورہے ہیں، بلوچستان کی تمام سیاسی جماعتیں بلوچستان عوامی پارٹی سے خوفزدہ ہیں۔

    اُن کا کہنا تھا کہ بی اےپی کسی جماعت کے خلاف نہیں بلکہ صوبے کی ترقی کے لیے بنائی گئی، ہم صرف وہ اقدامات کررہے ہیں جس کی بدولت بلوچستان کا احساس محرومی دور ہو۔

    الیکشن اتحاد

    دوسری جانب بلوچستان نیشنل پارٹی اور عوامی نیشنل پارٹی نے بلوچستان کی دو نشستوں پر اتحاد کا اعلان کردیا جس کے مطابق اے این پی این اے 264 پر بی این پی کے امیدوار کی حمایت کرے گی جبکہ پی بی 24 پر اے این پی امیدوار نعیم بازئی کو ووٹ دیے جائیں گے۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • پی ٹی آئی ایم کیو ایم اور ن لیگ جے یو آئی کی سیٹ ایڈجسٹمنٹ

    پی ٹی آئی ایم کیو ایم اور ن لیگ جے یو آئی کی سیٹ ایڈجسٹمنٹ

    سکھر: تحریک انصاف اور ایم کیو ایم کے امیدواروں نے ازخود فیصلہ کرتے ہوئے ایک دوسرے کی حمایت کا اعلان کردیا جبکہ مسلم لیگ ن اور جمعیت علماء اسلام نے بھی اپنے امیدواروں کو ایک دوسرے کے حق میں ستبردار کروایا۔

    سکھر میں مشترکہ پریس کانفرنس کرتے ہوئے قومی اسمبلی کے حلقہ این اے 207 پر نامزد ایم کیو ایم پاکستان کے امیدوار مرتضیٰ ڈہر نے تحریک انصاف کے امیدوار کے حق میں دستبردار ہونے کا اعلان کیا۔

    اس موقع پر  پی ٹی آئی رہنما کا کہنا تھا کہ سکھر کو جاگیر سمجھنے والے لوگوں کو 25 جولائی کو جواب دیں گے، ایم کیو ایم اور ہمارا مقصد علاقے کے مسائل کو حل کرنا ہے۔

    مبین جتوئی نے اعلان کیا کہ تحریک انصاف کی قیادت نے صوبائی اسمبلی کے حلقے پی ایس 24 پر ایم کیو ایم کی حمایت کرنے کی رضامندی ظاہر کردی۔

    دوسری جانب مسلم لیگ ن اور جمیعت علما اسلام (ف) نے مردان کی دو صوبائی نشستوں پر سیٹ ایڈجسٹمنٹ کا اعلان کیا جس کے مطابق پی کے 52 اور 53 سے جے یو آئی ف کے امیدوار ن لیگ کے حق میں دستبردار ہوگئے جبکہ پی کے 51 سے ملم لیگ ن کے امیدوار جے یو آئی کے حق میں بیٹھے گئے۔

    جمیعت علماء اسلام ف کے امیدواروں نے مردان پریس کلب پر سیٹ ایڈجسٹمنٹ کے خلاف احتجاجی مظاہرہ کیا اور پارٹی پالیسی کو ماننے سے انکار کردیا۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • کراچی: این اے243، انتخابی مہم میں ’شجر کاری‘

    کراچی: این اے243، انتخابی مہم میں ’شجر کاری‘

    کراچی: ایم کیو ایم پاکستان کے امیدوار علی رضا عابدی نے شہر قائد میں شجر کاری کی اہمیت کو  اجاگر کرنے کے لیے عوامی سطح پر مہم کا آغاز کردیا۔

    تفصیلات کے مطابق ملک بھر سمیت شہر قائد میں مختلف سیاسی جماعتوں و آزاد امیدواران کی انتخابی مہم زوروں پر ہے، ایم کیو ایم پاکستان کے قومی اسمبلی کی نشست پر نامزد کردہ امیدوار علی رضا عابدی نے علاقہ مکینوں کے ساتھ مل کر شجر کاری مہم میں حصہ لیا۔

    قومی اسمبلی کے حلقہ این اے 243 کو اس لیے بھی اہم سمجھا جارہا ہے کہ یہاں سے تحریک انصاف کے چیئرمین عمران خان، پیپلزپارٹی کی شہلا رضا سابق ڈپٹی اسپیکر سندھ اسمبلی اور ایم کیو ایم کے علی رضا عابدی میدان میں ہیں۔

    تینوں جماعتیں عوام کو متاثر کرنے اور کامیابی حاصل کرنے کے لیے گھر گھر پہنچ رہی اور اپنی پارٹی کا منشور پہنچا رہی ہیں تاہم اسی دوران ایم کیو ایم کے امیدوار نے انتخابی مہم میں شجر کاری کر کے لوگوں کو حیران کیا۔  گلشن اقبال کے علاقے بلاک 5 میں علاقہ مکینوں اور ایم کیو ایم کے امیدوار نے اپنی مدد آپ کے تحت پودے خرید کر  علاقے میں لگائے۔

    علی رضا عابدی کا کہنا تھا کہ شجر کاری مہم انتخابی مہم کا حصہ نہیں بلکہ ہمارے شہر کو اس کی اشد ضرورت ہے، اگر ہم نے یہ کام شروع نہ کیا تو آئندہ آنے والے وقتوں میں شہر کا درجہ حرارت و صورتحال بہت خراب ہوسکتی ہے۔

    ایم کیو ایم  امیدوار کا کہنا تھا کہ یہ مہم عوام میں شعور بیدار کرنے کے لیے شروع کی گئی جو  جاری رہے گی۔ انہوں نے مہم میں حصہ لینے والے نوجوانوں کا شکریہ بھی ادا کیا۔

    واضح رہے کہ قومی اسمبلی کے حلقہ این اے 243 میں کُل ووٹر کی تعداد 4 لاکھ ایک ہزار ہے جبکہ یہاں 9 یونین کونسلز اور 36 وارڈز  ہیں جو گلشن اقبال اور گلستان جوہر میں موجود ہیں۔

    خیال رہے کہ موسم پر نظر رکھنے والے ماہرین نے شہر قائد میں بدلتے درجہ حرارت اور ہیٹ اسٹروک کی وجہ درختوں کے نہ ہونے کو قرار دیا ہے، عوامی سطح پر شجر کاری مہم اس سے پہلے بھی نظر آئی تاہم اب عوام کا مطالبہ ہے کہ تمام جماعتیں اس اہم مسئلے پر بھی توجہ دیں۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • ووٹر کا اعتماد حاصل کرنے کے لیے شیخ رشید کا عوامی انداز، ویڈیو دیکھیں

    ووٹر کا اعتماد حاصل کرنے کے لیے شیخ رشید کا عوامی انداز، ویڈیو دیکھیں

    راولپنڈی: عوامی مسلم لیگ کے سربراہ شیخ رشید احمد نے ووٹر کا اعتماد حاصل کرنے کے لیے نیا انداز اپنایا جو سوشل میڈیا پر مقبول ہوگیا۔

    تفصیلات کے مطابق شیخ رشید احمد اپنے حلقے کے علاقے سیٹلائٹ ٹاؤن انتخابی مہم کے لیے عوام میں نکلے تو اسی دوران ایک ووٹر اُن کے پاس آیا اور دریافت کیا کہ آپ میرے خاطر کیا کرسکتے ہیں۔

    تندور پر روٹیاں خریدنے کی غرض سے آئے ووٹر نے شیخ رشید سے مکالمہ کرتے ہوئے کہاکہ ’آپ میرا ووٹ حاصل کرنے کے لیے کیا کرسکتے ہیں؟ اس پر شیخ رشید نے کہا کہ میں آپ کے لیے خود روٹی لگاؤں گا‘۔

    شیخ رشید احمد نے تندور میں روٹیاں لگائیں اور پکنے کے بعد باہر نکال کر خریدار کو کاغذ میں لپیٹ کر نہ صرف تھمائی بلکہ اپنے ہاتھ سے تندور میں روٹی بھی لگائی۔

    عوامی مسلم لیگ کے سربراہ کو دیکھ کر عوام کا رش لگ گیا اور سب نے انہیں عام انتخابات میں اپنی حمایت کا یقین دلایا جبکہ تندور والے نے بھی اپنی مشہوری ہونے پر اُن کا شکریہ ادا کیا۔

    واضح رہے کہ جیسے جیسے عام انتخابات کا وقت قریب آرہا ہے ملک کی قومی و صوبائی اسمبلی کی نشتوں پر الیکشن لڑنے والے امیدوار اپنے حلقے کے عوام میں جاکر انہیں ووٹ دینے کی ترغیب دے رہے ہیں۔


  • ایم کیو ایم کا لیاری میں جلسے کا اعلان، اجازت مانگ لی

    ایم کیو ایم کا لیاری میں جلسے کا اعلان، اجازت مانگ لی

    کراچی: ایم کیو ایم پاکستان نے پیپلزپارٹی کے مضبوط گڑھ لیاری ککری گراؤنڈ میں جلسہ کرنے کی اجازت مانگ لی۔

    تفصیلات کے مطابق ایم کیو ایم پاکستان کے امیدوار محفوظ یار خان نے ڈپٹی کمشنر سے 22 جولائی کو لیاری میں جلسہ کرنے کی اجازت مانگ لی۔ درخواست میں اُن کا کہنا تھا کہ ایم کیو ایم 22 جولائی کو لیاری میں انتخابی جلسہ کرنا چاہتی ہے، ہمیں ککری گراؤنڈ میں جلسے جبکہ گارڈن، کھارادر سمیت حلقے کے مختلف علاقوں میں ریلی کی اجازت بھی دی جائے۔

    مزید پڑھیں: ’پی آئی بی بہادرآباد تنازع نے ایم کیو ایم کو عوامی سطح پر شدید نقصان پہنچایا‘

    ایم کیو ایم کے امیدوار انتظامیہ سے یہ بھی درخواست کی کہ ریلی اور جلسے کے موقع پر سیکیورٹی کے مؤثر انتظامات کیے جائیں۔

    خیال رہے کہ قومی اسمبلی کے حلقہ این اے 246 سے پاکستان پیپلزپارٹی کے چیئرمین بلاول بھٹو زرداری بھی الیکشن لڑ رہے ہیں، گزشتہ دنوں وہ جب لیاری میں انتخابی مہم کے سلسلے میں پہنچے تو علاقہ مکینوں نے پانی کی عدم فراہمی کے خلاف شدید احتجاج اور پتھراؤ کیا تھا۔

    بعد ازاں ایم کیو ایم نے مؤقف اختیار کیا تھا کہ پیپلزپارٹی کے کارکنان نے پانی مانگنے پر ہمارے ورکروں کو شدید تشدد کا نشانہ بنایا۔ واضح رہے کہ ایم کیو ایم کی جانب سے محفوظ یار خان کو این اے 246 سے ٹکٹ جاری کیا گیا۔

    ایم کیو ایم امیدوار نے عدالت میں بلاول بھٹو کے کاغذاتِ نامزدگی بھی چیلنج کررکھے ہیں۔

    یہ بھی پڑھیں: بلاول کی ریلی پرپتھراؤ، گرفتار ملزم کو عدالت نے رہا کردیا

    واضح رہے کہ پی پی نے گزشتہ ماہ ایم کیو ایم کے مضبوط گڑھ لیاقت آباد کے علاقے ایف سی ایریا میں جلسہ کیا تھا جس میں بلاول بھٹو زرداری سمیت دیگر پارٹی قائدین نے خطاب کرتے ہوئے متحدہ قیادت کو شدید تنقید کا نشانہ بنایا تھا۔


    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔ 

  • اگر کسی امیدوار کو دھمکی ملی ہے تو وہ آگاہ کرے، الیکشن کمیشن

    اگر کسی امیدوار کو دھمکی ملی ہے تو وہ آگاہ کرے، الیکشن کمیشن

    اسلام آباد: سیکریٹری الیکشن کمیشن بابر یعقوب نے کہا ہے کہ جن امیدواروں نے دھمکیاں موصول ہونے کا دعویٰ کیا وہ مذکورہ افراد کے نام بتا دیں اور اگر کسی پارٹی کے لوگ اٹھائے جارہے ہیں تو وہ ہمیں خفیہ چٹھی لکھ دے۔

    اسلام آباد میں میڈیا سے گفتگو کرتے ہوئے سیکریٹری الیکشن کمیشن کا کہنا تھا کہ سیکیورٹی خدشات موجودہیں جس کے لیے نیکٹا نےہم سےکچھ معلومات شیئرکی اور اب مٹینگ کا بندوبست بھی کیا جارہا ہے۔

    اُن کا کہنا تھا کہ پیپلزپارٹی کی رہنما اور سینیٹر شیری رحمان نے بتایا کہ اُن کی پارٹی کے رہنماؤں کو نقل و حرکت میں مشکلات پیش آتی ہیں، پنجاب میں بلاول بھٹو کا قافلہ روکا گیا تو نوٹس لے کر وزیراعلیٰ کو انکوائری کی ہدایت کی۔

    بابر یعقوب کا کہنا تھا کہ ملک میں17ہزارپولنگ اسٹیشن حساس ہیں، جن میں سی سی ٹی وی کیمرے نصب اور پاک فوج کے جوان تعینات کیے جائیں گے، الیکشن سے قبل امیدواروں، سیاسی لیڈران کی سیکیورٹی کا بھی خیال رکھا جائے گا۔

    مزید پڑھیں: آبزرور اور میڈیا کو پولنگ بوتھ میں جانے کا اختیار ہوگا: الیکشن کمیشن

    اُن کا کہنا تھا کہ کچھ امیدواروں نے دھمکیاں موصول ہونے کا دعویٰ کیا ایسے تمام افراد ہمت کر کے کال کرنے والے کا نام بتائیں اور اگر کسی پارٹی کے لوگ حراست میں لیے جارہے ہیں تو وہ بھی ہم سے بذریعہ خط رابطہ کرسکتا ہے۔

    الیکشن کمیشن کے سیکریٹری کا کہنا تھا کہ وقت بڑھانے کا مطالبہ بعد میں بھی سامنے آتا اس لیے ہم نے پولنگ میں ایک گھنٹے کی توسیع کا پہلے ہی اعلان کردیا، فیس بک کی جانب سے خط موصول ہوا جس پر مشورہ جاری ہے۔

    ’الیکشن کمیشن کے اجلاس میں خدشہ ظاہر کیا گیا تھا کہ دہشت گرد امیدواروں، سیاسی رہنماؤں کو ٹارگٹ کرسکتے ہیں جو پشاور حادثے کے بعد درست ثابت ہوئے، مگر امن و امان کو بحال رکھنے کے لیے اقدامات کیے جارہے ہیں‘۔

    یہ بھی پڑھیں: فیس بک کی الیکشن کمیشن کو انتخابات 2018 سے متعلق خصوصی ٹرینڈ بنانے کی پیشکش

    بابر یعقوب کا کہنا تھا کہ میراخیال ہےٹرن آؤٹ پچھلی بارسےبہترہوگا کیونکہ لوگوں کاجمہوریت پر اعتمادبڑھ گیا، الیکشن کا کنٹرول آئینی طور پر ہمارے ہی پاس ہے جو کسی اور ادارے کے پاس کسی صورت نہیں جاسکتا مگر مختلف شخصیات اور جماعتوں کی جانب سے ہردورمیں الیکشن کمیشن پر تنقیدہوتی ہے یہ اُسی کا سلسلہ ہے۔

    اُن کا کہنا تھا کہ تمام عملہ سویلین ہے اور بھر پورتربیت کی گئی، انتخابی عمل الیکشن ایکٹ کے تحت ہوگا، بیلٹ پیپرز کی ترسیل فوج کی نگرانی میں جلد شروع ہوجائے گی جبکہ اس بار آروز کو بھی پولنگ بوتھ جانے کا اختیار ہوگا۔

    ’الیکشن میں فوج کا اختیارصرف سیکیورٹی تک محدود رہے گا، تاثرغلط ہے کہ سیکیورٹی فورسزانتخابی نتائج جمع کریں گے، فوج کی تعیناتی کامطالبہ بھی سیاسی جماعتیں ہی کرتی ہیں، پولنگ بوتھ پرامن وامان کی ذمہ داری فورسزکی بھی ہے، ماضی میں بھی سیکیورٹی فورسز کو قیام امن کیلئےتعینات کیاجاتارہا جس پر کسی کو کوئی اعتراض نہیں رہا‘۔

    اسے بھی پڑھیں: 25 جولائی کو میڈیا سات بجے سے قبل پولنگ نتائج جاری نہ کرے، الیکشن کمیشن

    بابر یعقوب کا کہنا تھا کہ سیکورٹی اہلکاروں کے لیے بھی  ضابطہ اخلاق جاری کیا گیا، جس کے تحت الیکشن کے دن نتائج کی ترسیل پاک فوج یا سیکیورٹی اہلکار نہیں کریں گے یہ ذمہ داری متعلقہ افسران ہی انجام دیں گے البتہ سیکیورٹی پر مامور اہلکار اور عام شہری پریذائیڈنگ افسر کو دھاندلی کی شکایت سے آگاہ کرسکتا ہے جبکہ میڈیا کو موبائل استعمال نہ کرنے کی شرط پر پولنگ بوتھ میں جانےکی اجازت بھی ہوگی۔

    سیکریٹری الیکشن کمیشن نے مزید بتایا کہ ملک بھر کے 849 حلقوں پر انتخابات منعقد کیے جارہے ہیں، مذکورہ حلقوں میں سے 100 سے زائد پر مقدمات ہیں جن کے بیلٹ پیپرز کی چھپائی شروع نہیں کی جبکہ ایک کروڑخواتین ایسی ہیں بطور ووٹررجسٹرڈ نہیں ہوسکیں۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔