اسلام آباد: وزیر مذہبی امور مفتی عبد الشکور کی وزیر خزانہ اسحٰق ڈار سے ملاقات ہوئی، وزیر خزانہ نے حج انتظامات کے لیے وزارت مذہبی امور کو تعاون کی یقین دہانی کروا دی۔
تفصیلات کے مطابق وزیر مذہبی امور مفتی عبد الشکور کی وزیر خزانہ اسحٰق ڈار سے ملاقات ہوئی، ملاقات میں حج پالیسی، اسپانسر شپ اسکیم، سعودیہ میں رقوم کی ادائیگی اور فاٹا اصلاحات پر تبادلہ خیال کیا گیا۔
وزیر خزانہ نے معاشی صورتحال کے باوجود حجاج کے لیے زر مبادلہ کے انتظام کا عندیہ دے دیا، انہوں نے کہا کہ سابقہ حکومت کے آئی ایم ایف سے معاہدے کے باعث ہمارے ہاتھ بندھے ہوئے ہیں۔
اسحٰق ڈار کا کہنا تھا کہ اللہ کے مہمانوں کی آسانی اور سہولت کے لیے حکومت ہر ممکن اقدام کرے گی۔
وزیر خزانہ نے حج انتظامات کے لیے وزارت مذہبی امور کو تعاون کی یقین دہانی بھی کروا دی۔
ذرائع کے مطابق حج اسپانسر شپ اسکیم صرف بیرون ملک مقیم پاکستانیوں یا ان کے عزیز و اقارب کے لیے ہے، غیر ملکی زرمبادلہ بھجوانے والے پاکستانی اس اسکیم سے فائدہ اٹھا سکیں گے، اسپانسر شپ اسکیم میں شمولیت کے لیے پاکستانی پاسپورٹ لازم ہوگا۔
ذرائع کا کہنا ہے کہ اسپانسر شپ حج اسکیم کا کوٹہ 50 فیصد مقرر کرنے کا اصولی فیصلہ کیا جا چکا ہے، دیگر 50 فیصد حج کوٹہ سرکاری اور نجی حج اسکیم کے لیے مختص کیا جانے کا فیصلہ کیا گیا ہے۔
ذرائع کے مطابق ریگولر حج اسکیم کے تحت پاکستانی نامزد بینکوں میں حسب سابق حج درخواستیں جمع ہوں گی، ڈالر ریٹ کے حساب سے حج اخراجات کا تخمینہ 11 سے 12 لاکھ روپے کے درمیان ہے۔
وزیر مذہبی امور اگلے ہفتے کابینہ سے منظوری ملتے ہی حج درخواستوں کی وصولی کا اعلان کریں گے، سرکاری حج اسکیم کی درخواست کی وصولی 13 مارچ سے شروع کرنے کا امکان ہے۔
