سڈنی: سابق آسٹریلوی کپتان اور معروف کوچ باب سمپسن کا ہفتے کے روز 89 سال کی عمر میں انتقال ہو گیا۔
غیر ملکی میڈیا رپورٹس کے مطابق آسٹریلوی کرکٹ کی ایک با اثر شخصیت اور لیجنڈری کرکٹر باب سمپسن سڈنی میں چل بسے، ان کے انتقال کے ساتھ آسٹریلوی کرکٹ ایک عظیم ستون سے محروم ہو گئی۔
باب سمپسن ایک کرکٹر ہی ںہیں بلکہ ایک ایسے رہنما بھی تھے جس کا اثر نسلوں تک پھیلا ہوا ہے، انھوں نے اپنے پیچھے ایک ایسا ورثہ چھوڑا ہے جسے عمروں تک یاد رکھا جائے گا۔ سمپسن کی کوچنگ میں آسٹریلیا نے 1987 میں پہلی بار ون ڈے کا ورلڈ کپ اور 1989 کی ایشز گھر سے دور جیتی۔
باب سمپسن نے اپنا ٹیسٹ ڈیبیو 1957 میں جنوبی افریقہ کے خلاف کیا، انھوں نے آسٹریلیا کے لیے 62 ٹیسٹ اور 2 ون ڈے کھیلے، اور آسٹریلیا کو بہترین ٹیم بنانے میں اہم کردار ادا کیا، وہ ٹیم کے پہلے کل وقتی کوچ بنے تھے اور انھوں نے ایلن بارڈر اور مارک ٹیلر کی کپتانی کے دوران 1980 اور 1990 کی دہائی کے آخر میں ٹیم کے دوبارہ ابھرنے میں مدد کی۔
باب سمپسن ایک کھلاڑی کے طور پر اپنے دور کے آسٹریلیا کے بہترین اوپنرز میں سے تھے، 1957 اور 1978 کے درمیان انھوں نے 62 ٹیسٹ کھیلے، جن میں انھوں نے 46.81 کی اوسط سے 4,500 سے زیادہ رنز بنائے، اس کے علاوہ بھی ان کی شارپ سلپ فیلڈنگ اور ہینڈی لیگ اسپن کی بھی بہت تعریف کی گئی۔
1964 میں مانچسٹر میں انگلینڈ کے خلاف ان کی 311 رنز ایشز کی بڑی اور یادگار اننگز میں سے ایک ہے، اگرچہ وہ 1968 میں ریٹائر ہو گئے تھے لیکن انھوں نے دس سال بعد پھر ایک شان دار واپسی کی، اور ’ورلڈ سیریز کرکٹ‘ کے دوران آسٹریلوی ٹیم کی رہنمائی کی۔ بہ طور کوچ انھوں نے ٹیم میں واقعی بڑی تبدیلی پیدا کر دی اور اسے ایک نہایت مضبوط ٹیم بنا دیا۔
معروف امریکی باڈی بلڈر ہیلی میک نیف چل بسیں
1986 میں جب آسٹریلیا کی ٹیم کا برا حال تھا، انھوں نے چارج سنبھالا، اور ایلن بارڈر کے ساتھ مل کر ایک نوجوان ٹیم میں نظم و ضبط، فٹنس اور پیشہ ورانہ مہارت پیدا کی، اور پھر اس ٹیم نے اسٹیو وا، شین وارن، اور گلین میک گرا جیسے کرکٹ اسٹار پیدا کیے، جنھوں نے 1980 اور 1990 کی دہائی کے آخر میں کرکٹ کی دنیا پر آسٹریلیا کے بے مثال غلبے کی راہ ہموار کی۔
