نیویارک : کینسر کے آخری اسٹیج میں زیرعلاج 19 سالہ لڑکی شادی کی اپنی آخری خواہش پوری ہونے کے دو دن بعد جہان فانی سے کوچ کر گئی، اسپتال میں ہی شادی ہوئی اور اسپتال سے ہی جسد خاکی واپس آیا۔

یہ درد ناک واقعہ ایل پاسو چلڈرن اسپتال میں پیش آیا جہاں کینسر کے چوتھے درجے سے نبرد آزما انیس سالہ لیڈیا ڈومن گوئز نے آخری خواہش کے طور پر اپنے بہترین دوست 21 سالہ جوشوآ سے اسپتال میں ایک سادہ سی تقریب میں شادی کر کے محض دو دن بعد اسپتال میں شوہر کے ہاتھوں میں ہاتھ تھامے دم توڑ دیا۔

لیڈیا کو گردے میں کینسر کی تشخیص اس وقت ہوئی جب وہ محض 16 سال کی تھی تاہم اس وقت گردے سے ٹیومر نکالنے کے دوران انکشاف ہوا کہ کینسر آنتوں تک پہنچ چکا ہے جس کا علاج تو کیا گیا تاہم کینسر بگڑتا چلا گیا یہاں تک کہ کینسر پھپھڑوں تک پہنچ گیا جس پر نوجوان لڑکی نے اپنے والدین کے قرضوں میں ڈوبتے چلے جانے اور لاحاصل علاج کے باعث مزید ٹریٹمنٹ سے انکار کردیا۔

تاہم طبیعت کی ناسازی کے باعث وہ ایک رفاحی اسپتال میں زیر علاج رہی جہاں اسے صرف درد کشا دواؤں پر رکھا گیا اور اسی اسپتال میں نوجوان لڑکی کی اپنے دوست سے شادی کی آخری خواہش کو عملی جامہ پہنایا گیا جس کے لیے والدین کے علاوہ دوست احباب اور اسپتال کے عملے نے بھرپور انداز تیاریاں کیں، ویٹنگ روم کو پھولوں سے سجایا گیا اور دلہن نے روایتی سفید جوڑا پہن کر ڈرپس اور نلکیاں لگے وہیل چیئر پر شرکت کی تاہم پادری کے سامنے اپنی ماں اور والد کی مدد سے کھڑی ہو کر شادی کے عہد و پیماں باندھے۔

روایتی رسوم کی ادائیگی کے بعد دلہا دلہن نے کیک کاٹا اور اہل خانہ کے ہمراہ تصاویر بھی بنوائیں جس کے دوران انتہائی رقت آمیز مناظر دیکھنے میں آئے بالخصوص اپنے والد سے ملاقات کے وقت وہ آبدیدہ ہو گئی، تھوڑی دیر کو سہی لیکن مستقبل کے خدشات سے بے خبر ہو کر نوجوان جوڑے نے ان لمحات کو بھرپور طریقے سے منایا۔

پیر 12 فروری کو شادی کے بعد وہ اپنے شوہر کے ہمراہ اسپتال میں ہی رہی جہاں محض دون بعد ویلنٹائن ڈے کے دن اچانک طبیعت بگڑ گئی، ڈاکٹرز کے مایوس چہروں اہل خانہ اور نوجوان لڑکی پر تلخ حقیقت واضح کردی اور وہ مسکرا کر اپنے شوہر کا ہاتھ تھامے آخری سانس لیتی رہی یہاں تک کہ صبح آٹھ بجے نوجوان لڑکی کی روح جہان فانی سے ہمیشہ کے لیے کوچ کر گئی۔

تصاویر اور ویڈیو

کیرالہ : اٹھارہ سال بعد ماں بننے والی خاتون نے جڑواں بچوں کی پیدائش کے تین دن بعد اسپتال میں ہی دم توڑ دیا، افسوسناک واقعے سے اہل خانہ میں کہرام مچ گیا۔

تفصیلات کے مطابق غم زدہ واقعہ گزشتہ روز کیرالہ کے ضلع کوٹیام کے مقامی اسپتال میں پیش آیا جہاں 18 سال سے بے اولاد جوڑا خزاں کے موسم کی آمد سے بے خبر اپنے گھر کے آنگن میں جڑواں کلیوں کے کھلنے کا منتظر تھا۔

بیالیس سالہ شیبا نے 18 سال کے طویل انتظار کے بعد ایک نہیں بلکہ دو بچے جنم دیئے جن میں سے ایک کو وزن کی کمی کے باعث انتہائی نگہداشت کے وارڈ میں داخل کردیا گیا اور دوسرے کو ممتا کی پیاسی اپنے دودھ سے سیراب کرتی رہی جہاں اسے دو دن بعد بچوں کے ہمراہ رخصت ملنے والی تھی تاہم کسے معلوم تھا وہ زندہ حالت میں اسپتال سے واپس نہیں جا پائے گی۔

اسپتال انتظامیہ کے مطابق سب کچھ ٹھیک جا رہا تھا کہ اچانک بیالیس سالہ شیبا کو نقاہت محسوس ہونا شروع ہوجاتی ہے اور بلڈ پریشر تیزی سے کم ہونے لگتا ہے جس کے باعث وہ کومے میں چلی جاتی ہے اور اسے وینٹی لیٹر پر منتقل کرنا پڑ جاتا ہے جہاں ڈاکٹرز کی تمام کاوشیں ناکام ثابت ہوئیں اور شیبا جانبر نہ ہو سکی۔

زچہ و بچہ کی صحت سے متعلق کام کرنے والی ایک غیر سرکاری تنظیم کی نمائندہ کا کہنا تھا کہ کیرالہ میں زچہ و بچہ کو سب سے زیادہ خطرہ خوراک میں کمی کا ہے جس کی وجہ سے مائیں بچوں کو اپنا دودھ نہیں پلا پاتیں اور جو خواتین بساط بھر کوشش کر بھی لیتی ہیں تو خود ان کی صحت کو خطرات لاحق ہو جاتے ہیں جس کی مثال مذکورہ واقعہ بھی ہے ۔

انہوں نے کہا کہ دوسرا بڑا خطرہ خواتین کی جنسی صحت سے متعلق معلومات کا ناکافی ہونا اور جنسی صحت کے مراکز اور سہولیات کا فقدان ہونا ہے جس کے باعث ہر سال سیکڑوں خواتین زچگی کے دوران جاں سے چلی جاتی ہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔