ARYNews.tv | Urdu – Har Lamha Bakhabar

Tag: انتونیو گوتریس

  • یو این کی مقبوضہ کشمیر سمیت دنیا بھر میں سیز فائر کی اپیل

    یو این کی مقبوضہ کشمیر سمیت دنیا بھر میں سیز فائر کی اپیل

    نیویارک: اقوام متحدہ کے سیکریٹری جنرل نے مقبوضہ کشمیر سمیت دنیا بھر میں سیز فائر کی اپیل کر دی ہے۔

    تفصیلات کے مطابق یو این سیکریٹری جنرل انتونیو گوتریس نے دنیا بھر کے متنازعہ علاقوں میں جنگ بندی کی اپیل کی ہے، انھوں نے کہا کہ یہ اپیل کشمیر میں ایل او سی پر بھارتی خلاف ورزیوں کے متعلق بھی ہے۔

    ترجمان انتونیو گوتریس نے کہا کہ بھارت مستقل طور پر کشمیر میں ایل او سی پر سیز فائر کی خلاف ورزی کر رہا ہے، بھارت خلاف ورزیاں کر کے پاکستان کو جانی و مالی نقصان پہنچا رہا ہے۔

    ایل او سی پر فضائی حدود کی خلاف ورزی، پاک فوج نے بھارتی ڈرون مار گرایا

    ترجمان نے بتایا کہ جنگ بندی کی اپیل دنیا کے ہر خطے سے متعلق ہے، یو این سیکریٹری جنرل کا پیغام پوری دنیا کے لیے تھا، 23 مارچ کو بھی یو این سیکریٹری جنرل نے کرونا سے نمٹنے کے لیے جنگ بندی کی اپیل کی تھی، اپیل کے باوجود بھارتی فورسز کی جانب سے ایل او سی پر فائرنگ کا سلسلہ جاری رہا۔

    دنیا بے مقصد جنگیں بند کر کے کرونا کے خلاف جنگ کرے: اقوام متحدہ

    خیال رہے کہ ایل او سی کی خلاف ورزی پر پاکستان نے بھارت سے احتجاج بھی کیا، پاکستان نے یو این ملٹری آبزرور گروپ میں شکایات بھی درج کرائیں۔ واضح رہے کہ آج بھی لائن آف کنٹرول کے سنکھ سیکٹر پر ایک بھارتی ڈرون 600 میٹر تک پاکستان کی حدود میں گھس آیا تھا، جس پر پاک فوج نے بھارتی کواڈ کاپٹر کو مار گرا دیا۔

  • دنیا بے مقصد جنگیں بند کر کے کرونا کے خلاف جنگ کرے: اقوام متحدہ

    دنیا بے مقصد جنگیں بند کر کے کرونا کے خلاف جنگ کرے: اقوام متحدہ

    نیویارک: اقوام متحدہ کے سیکریٹری جنرل نے دنیا سے جنگ بندی کی اپیل کر دی ہے۔

    تفصیلات کے مطابق اقوام متحدہ کے سیکریٹری جنرل انتونیو گوتریس نے کہا ہے کہ وقت آ گیا ہے کہ دنیا میں بے مقصد جنگیں بند کر کے کرونا کے خلاف جنگ کی جائے۔

    انتونیو گوتریس نے اپنے تازہ بیان میں کہا ہے کہ دنیا میں جہاں کہیں جنگیں ہو رہی ہیں ان کو ختم کیا جائے، یہی وہ چیز ہے جس کی انسانیت کو پہلے سے کہیں زیادہ ضرورت ہے، دنیا کو مشترکہ دشمن کرونا وائرس کا سامنا ہے، جو بے رحمی سے سب پر حملہ آور ہے۔

    کرونا وائرس سے اموات 16558 ہو گئیں

    خیال رہے کہ نئے اور مہلک وائرس COVID 19 سے دنیا بھر میں اموات 16558 ہو گئی ہیں، جب کہ مریضوں کی مجموعی تعداد 3 لاکھ 81 ہزار 653 ہو گئی۔ فلو سے مشابہ نئے کرونا وائرس نے دنیا کے 195 ممالک اور علاقوں کو لپیٹ میں لے لیا ہے، اموات کی تعداد ساڑھے سولہ ہزار بھی بڑھ گئیں، جب کہ متاثرین کی تعداد چار لاکھ کے قریب پہنچ گئی ہیں، دوسری طرف 102,429 افراد مہلک وائرس سے صحت یاب ہو گئے ہیں۔

    اٹلی میں ہلاکتوں کی تعداد بڑھ کر 6077 ہو گئی، جب کہ 63927 افراد متاثر ہوئے، ان میں صرف ساڑھے سات ہزار مریض صحت یاب ہوئے۔ چین میں اموات 3,277 تک پہنچ گئیں، امریکا میں کرونا وائرس سے مزید 29 افراد ہلاک ہونے کے بعد تعداد 582 ہو گئی جب کہ مریضوں کی مجموعی تعداد 46145 تک پہنچ گئی۔

  • شام کے شہر ادلب میں فضائی حملہ، 33 ترک فوجی ہلاک

    شام کے شہر ادلب میں فضائی حملہ، 33 ترک فوجی ہلاک

    دمشق: شام کے شہر ادلب میں فضائی حملہ کے نتیجے میں 33 ترک فوجی ہلاک ہو گئے۔

    تفصیلات کے مطابق ادلب میں فضائی حملے میں ہلاک ترک فوجیوں کی تعداد 33 ہو گئی، ترک حکام کا کہنا ہے کہ علاقے میں تعینات فوجیوں پر شامی افواج نے حملہ کیا۔

    ترک حکام کے مطابق ترک افواج نے حملے کے بعد جوابی کارروائی کی جس میں شامی افواج کے ٹھکانوں پر گولہ باری کی گئی، شامی فوج کے تمام ٹھکانوں کو زمین اور فضا سے نشانہ بنایا جا رہا ہے۔

    ترک اور روسی صدر کا ادلب سے متعلق معاہدوں پر عملدرآمد کے عزم کا اعادہ

    ادلب میں حملے کے بعد ترک صدر رجب طیب اردوان کی زیر صدارت ہنگامی سیکورٹی اجلاس بلایا گیا جس میں وزرا اور عسکری حکام نے شرکت کی۔ خیال رہے کہ حالیہ ہفتوں میں ترکی کی جانب سے ادلب میں فوجی بھیجنے کے بعد یہ ایک دن میں ہلاک ہونے والے فوجیوں کی سب سے زیادہ تعداد ہے۔

    ترک فوجی مین پیڈ کے ذریعے ادلب میں اسٹنگر میزائل سے روسی طیارے کو نشانہ بنا رہے ہیں

    دوسری طرف یو این سیکریٹری جنرل نے شمال مغربی شام کی صورت حال پر گہری تشویش کا اظہار کرتے ہوئے ایک بار پھر فوری جنگ بندی کا مطالبہ کر دیا ہے، انتونیو گوتریس نے فوجی کارروائیوں میں اضافے سے شہریوں کو لاحق خطرات پر بھی اظہار تشویش کیا۔

    انھوں نے اپنے بیان میں کہا کہ شام کے تنازع کا کوئی فوجی حل نہیں ہے، شام میں اقوام متحدہ کے زیر اہتمام سیاسی حل ہی واحد راستہ ہے۔ خیال رہے کہ شام کے شہر ادلب میں ہونے والی انسانیت سوز تباہی اب تیزی سے جغرافیائی سیاسی المیہ بھی بنتی جا رہی ہے۔

  • یو این سیکریٹری جنرل کا دورہ مکمل کر کے پاکستان سے روانگی کے بعد ٹوئٹ

    یو این سیکریٹری جنرل کا دورہ مکمل کر کے پاکستان سے روانگی کے بعد ٹوئٹ

    اسلام آباد: یو این سیکریٹری جنرل انتونیو گوتریس نے دورہ مکمل کر کے پاکستان سے روانگی کے بعد ٹوئٹ کرتے ہوئے پاکستان کے عوام کا شکریہ ادا کیا۔

    اے آر وائی نیوز کے مطابق سیکریٹری جنرل انتونیو گوتریس نے سماجی رابطے کی ویب سائٹ ٹویٹر پر اپنے پیغام میں کہا ہے کہ میں پاکستان کا دورہ مکمل کر کے واپس جا رہا ہوں، اس دورے میں عالمی ثقافتی ورثہ قرار دیے گئے شاہی قلعے اور بادشاہی مسجد گیا۔

    انتونیو گوتریس نے لکھا کہ انھوں نے لاہور کی وسیع تاریخ اور متحرک ثقاقت سے لطف اندوز ہونے کے بعد دورہ ختم کیا، ایک شان دار دورے پر پاکستان کے عوام کا شکریہ ادا کرتا ہوں۔

    قبل ازیں، یو این سیکریٹری جنرل دورہ پاکستان مکمل کر کے لاہور ایئر پورٹ سے واپس روانہ ہوئے تھے، اقوام متحدہ میں مستقل پاکستانی مندوب منیر اکرم نے سیکریٹری جنرل کو رخصت کیا، انتونیو گوتریس نے خطے میں امن کے لیے پاکستان کی کوششوں کو سراہا، اور دہشت گردی کو شکست دینے پر پاکستان کی کاوشوں کی تعریف کی۔

    لاہوریوں کی مہمان نوازی کا لطف برسوں نہیں بھلا پاؤں گا، انتونیو گوتریس

    یاد رہے کہ گزشتہ روز سیکریٹری جنرل نے لاہور میں حضوری باغ میں اپنے اعزاز میں وزیر اعلیٰ پنجاب اور گورنر کی جانب سے دیے گئے عشائیے میں کہا تھا کہ پنجاب ثقافتی حسن سے مالا مال ہے، لاہوریوں کی مہمان نوازی کا لطف برسوں نہیں بھلا پاؤں گا۔ عشائیے میں بلوچی، چولستانی، پنجابی موسیقی اور ثقافتی شو بھی پیش کیا گیا تھا۔

  • لاہوریوں کی مہمان نوازی کا لطف برسوں نہیں بھلا پاؤں گا، انتونیو گوتریس

    لاہوریوں کی مہمان نوازی کا لطف برسوں نہیں بھلا پاؤں گا، انتونیو گوتریس

    لاہور: اقوام متحدہ کے سیکریٹری جنرل انتونیو گوتیریس کا کہنا ہے کہ لاہوریوں کی مہمان نوازی کا لطف برسوں نہیں بھلا پاؤں گا۔

    تفصیلات کے مطابق وزیراعلیٰ پنجاب عثمان بزدار اور گورنر پنجاب چوہدری محمد سرور نے اقوام متحدہ کے سیکریٹری جنرل کا حضوری باغ پہنچنے پر استقبال کیا۔

    وزیراعلیٰ پنجاب اور گورنر کی جانب سے انتونیوگوتریس کے اعزاز میں عشائیہ دیا گیا عشائیہ میں بلوچی، چولستانی، پنجابی موسیقی اور ثقافتی شو پیش کیا گیا۔ عثمان بزدار نے انتونیوگوتریس کو پنجاب کے ثقافتی ورثے کے بارے میں آگاہ کیا۔

    اس موقع پر اقوام متحدہ کے سیکریٹری جنرل انتونیو گوتیریس نے کہا کہ پنجاب ثقافتی حسن سے مالا مال ہے، لاہوریوں کی مہمان نوازی کا لطف برسوں نہیں بھلا پاؤں گا۔

    عثمان بزدار نے یواین سیکریٹری جنرل کو دورہ لاہور کی تصویری البم پیش کی، سیکریٹری جنرل انتونیو گوتریس نے تصویری البم دیکھ کر اظہار مسرت کیا۔ وزیراعلیٰ عثمان بزدار نے انتونیوگوتریس کو شاہی قلعہ کی پینٹنگ بھی پیش کی۔

    اقوام متحدہ کے سیکریٹری جنرل انتونیو گوتیریس نے شاندار مہمان نوازی پر وزیراعلیٰ پنجاب کا شکریہ ادا کیا۔

    خوشی ہےکرتار پور راہداری دیکھنے کا اعزاز حاصل ہوا، سیکرٹری جنرل

    اس سے قبل اقوام متحدہ کے سیکریٹری جنرل انتونیو گوتیریس کا ٹویٹر پر اپنے پیغام میں کہنا تھا کہ خوشی ہے کرتار پور راہداری دیکھنے کا اعزاز حاصل ہوا۔

  • سیکریٹری جنرل نے ماہرہ خان کا شکریہ کیوں ادا کیا؟

    سیکریٹری جنرل نے ماہرہ خان کا شکریہ کیوں ادا کیا؟

    اسلام آباد: اقوام متحدہ کے سیکریٹری جنرل انتونیو گوتریس نے معروف اداکارہ اور مہاجرین کی خیر سگالی سفیر ماہرہ خان سے ملاقات کی اور ان کا شکریہ ادا کیا۔

    تفصیلات کے مطابق اقوام متحدہ کے سیکریٹری جنرل انتونیو گوتریس نے معروف پاکستانی اداکارہ اور خیر سگالی سفیر برائے مہاجرین ماہرہ خان سے ملاقات کی۔

    سماجی رابطے کی ویب سائٹ ٹویٹر پر اپنے ٹویٹ میں سیکریٹری جنرل کا کہنا تھا کہ ہمیں افغان مہاجرین کے ساتھ پاکستان کی یکجہتی کے 40 سال مکمل ہوگئے ہیں، اس موقع پر مہاجرین کی خیر سگالی سفیر ماہرہ خان سے مل کر خوشی ہوئی۔

    اپنے ٹویٹ میں انہوں نے مزید لکھا کہ میں ماہرہ خان اور تمام پاکستانیوں کے غیر معمولی تعاون پر ان کا شکر گزار ہوں۔

    بعد ازاں ماہرہ خان نے بھی ان کا شکریہ ادا کرتے ہوئے ٹویٹر پر لکھا کہ میں اس سلسلے میں مزید کام کرنے کی منتظر ہوں۔

    خیال رہے کہ گزشتہ برس اقوام متحدہ کے ادارہ برائے مہاجرین (یو این ایچ سی آر) نے ماہرہ خان کو پاکستان میں اپنا خیر سگالی سفیر مقرر کیا تھا۔

    اس موقع پر ماہرہ خان کا کہنا تھا کہ پاکستانی عوام نے افغان مہاجرین کو کھلے دل سے خوش آمدید کہا، یہی وجہ ہے کہ پاکستان 4 دہائیوں سے 40 لاکھ افغان مہاجرین کی مدد کر رہا ہے۔

  • یو این سیکریٹری جنرل کا بہادر پاکستانی خواتین کو خراج تحسین

    یو این سیکریٹری جنرل کا بہادر پاکستانی خواتین کو خراج تحسین

    اسلام آباد: اقوام متحدہ کے سیکریٹری جنرل انتونیو گوتریس نے بہادر پاکستانی خواتین اور مردوں کو خراج تحسین پیش کیا ہے۔

    اے آر وائی نیوز کے مطابق سیکریٹری جنرل یو این انتونیو گوتریس نے سماجی رابطے کی ویب سائٹ ٹویٹر پر اپنے پیغام میں کہا کہ یو این امن مشنز میں پاکستان سب سے بڑا شراکت دار ہے۔

    سیکریٹری جنرل کا کہنا تھا کہ انھوں نے اس امن مشن میں خدمات انجام دینے والے کچھ بہادر پاکستانی خواتین اور مردوں کے ساتھ ملاقات کی، جو متاثر کن رہی۔ انتونیو گوتریس نے پاکستانی بہادر خواتین اور مردوں کی قربانی اور خدمات کے لیے ان کا شکریہ بھی ادا کیا۔

    پاکستان کے دستے امن کے لیے بہترین کام کر رہےہیں: انتونیو گوتریس

    خیال رہے کہ انتونیو گوتریس پاکستان میں افغان مہاجرین کے لیے منعقدہ کانفرنس میں شرکت کے لیے پانچ روزہ دورے پر آئے ہیں، گزشتہ روز انھوں نے وزیر اعظم عمران خان اور آرمی چیف جنرل قمر جاوید باجوہ سے بھی ملاقاتیں کیں۔

    سیکریٹری جنرل نے گزشتہ روز نسٹ میں تقریب سے خطاب کرتے ہوئے کہا تھا کہ پاکستانی دستوں نے دوسروں کے لیے اپنی جانوں کا نذرانہ پیش کیا، پاکستان کے دستے امن کے لیے بہترین کام کر رہے ہیں، پاکستان کے ایک لاکھ 50 ہزار سے زائد جوانوں نے امن مشنز میں کام کیا، پاکستانی افسران امن مشن میں فرسٹ کمانڈر کے طور پر کام کر رہے ہیں، امن مشنز میں پاکستانی افواج کے 157 جوانوں نے شہادت پائی، پاکستانی افواج ، پولیس اور سویلینز کا عزم امن مشن کے لیے شان دار ہے۔

  • افغان مہاجرین کی باعزت واپسی کے لیے عالمی برادری کردار ادا کرے، انتونیوگوتریس

    افغان مہاجرین کی باعزت واپسی کے لیے عالمی برادری کردار ادا کرے، انتونیوگوتریس

    اسلام آباد: اقوام متحدہ کے سیکریٹری جنرل انتونیو گوتریس نے کہا کہ افغان مہاجرین کی باعزت واپسی کے لیے عالمی برادری کردار ادا کرے۔

    تفصیلات کے مطابق اقوام متحدہ کے سیکریٹری جنرل نے ایوان صدر میں عشائیے سے خطاب کرتے ہوئے کہا کہ پاکستان اور ایران نے افغان مہاجرین کو فراخدلی سے قبول کیا، افغان مہاجرین کی باعزت واپسی کے لیے عالمی برادری کردار ادا کرے۔

    انتونیوگوتریس کا کہنا تھا کہ اقوام متحدہ امن مشنز کی کامیابی میں پاکستان کے کردار کوسراہتے ہیں۔ موسمیاتی تبدیلی سے متعلق سیکریٹری جنرل نے کہا کہ پاکستان موسمیاتی تغیرات کے خلاف اقوام متحدہ کے چارٹر کے مطابق کوشاں ہے۔

    دوسری جانب صدر پاکستان نے کہا کہ مہاجرین کے مسائل کے حل کے لیے انتونیوگوتریس کا کردار قابل ستائش ہے۔ انہوں نے کہا کہ 27 لاکھ سے زیادہ افغان مہاجرین پاکستان میں مقیم ہیں، محدود وسائل کے باوجود افغان مہاجرین کے لیے پاکستان نے کشادہ دلی کامظاہرہ کیا۔

    ڈاکٹر عارف علوی نے کہا کہ وزیراعظم نے اقتدار میں آتے ہی بھارت کو مسائل کے حل کی دعوت دی، پاکستان کے برعکس بھارت نے ماضی کے تجربات سے کچھ نہیں سیکھا، ہمسایہ ملک نے جنگی جنون کو فروغ دیا۔

    انہوں نے کہا کہ 5اگست کے بعد مقبوضہ کشمیر کی صورت حال تبدیل کرنے کی کوشش کی گئی، مقبوضہ کشمیر میں عالمی مبصرین اور میڈیا کی رسائی ہونی چاہیے، مسئلہ کشمیر کےحل کے لیے اقوام متحدہ کی قراردادوں پرعملدرآمد ہوناچاہیے۔

  • پرتگال کی سیر کیجیے

    پرتگال کی سیر کیجیے

    بحرِاوقیانوس کے کنارے آباد پرتگال جنوب مغربی یورپ کاحصّہ ہے۔ جغرافیائی حقیقت اپنی جگہ مگر یہ بات شاید آپ کی دل چسپی کا باعث ہو کہ پرتگال کسی پڑوسی ملک سے محروم ہے۔

    اسی ملک پرتگال سے تعلق رکھتے ہیں انتونیو گوتریس، جن کا ملکی ذرایع ابلاغ میں خوب چرچا ہو رہا ہے۔ وہ پاکستان میں ہیں اوراہم تقاریب میں شرکت کے ساتھ مختلف تاریخی مقامات کا دورہ بھی کررہے ہیں جس سے وہ ہماری تاریخ، اس خطے کی تہذیب، ثقافت اور رسم و رواج کے بارے میں جان سکیں گے۔

    ہم بھی انتونیو گوتریس کے وطن پرتگال چلتے ہیں جس پر صدیوں پہلے مسلمان حکم رانی کیا کرتے تھے۔

    پرتگال کے مشرق اور شمال میں صرف اسپین آبادہے۔یوں کہیے کہ اسپین کی سرحد کے علاوہ اس ملک کے باسی ہر طرف ٹھاٹھیں مارتا ہوا سمندر دیکھتے ہیں۔

    رقبے کے اعتبار سے اسے ایک چھوٹا ملک کہا جاسکتا ہے، لیکن یورپ میں مختلف حوالوں سےپرتگال اہمیت رکھتا ہے۔ قدیم زمانے میں بھی اس علاقے کو یورپ کےلیے راستے اور گزر گاہ کے طور پر استعمال کیا جاتا تھا۔

    تاریخی اعتبار سے یہ علاقہ مسلم اسپین کاحصہ رہاہے۔ تاہم اس سے قبل یہاں مختلف تہذیبوں کااثر رہا، جن کے آثار میں رومیوں کے دور کی آبادیاں اور شہرقابلِ ذکر ہیں۔ 868عیسوی میں پرتگال ایک عیسائی ریاست میں تبدیل ہو گیا جب کہ 1139 میں یہاں خود مختار شاہی ریاست قائم کر دی گئی۔ یہاں ایک زمانےمیں یہودی بھی بڑی تعداد میں آباد تھے۔

    1910 کے بعد پرتگال نے جمہوریت کا سفر شروع کیا۔ تاہم 1974 کے انقلاب نے اس ملک کی سیاست اور سماج پر گہرے اثرات مرتب کیے اور یہاں کے دستور میں ریاست کا سربراہ صدر ِمملکت ٹھیرا جس کا انتخاب قوم براہِ راست کرتی ہے۔ وزیرِاعظم اور اس کی کابینہ کے ہاتھوں میں ملکی نظم و نسق اور انتظامات آئے۔

    پاکستان کا دورہ کرنے والے انتونیو گوتریس نے پرتگال کے شہر لزبن میں آنکھ کھولی اور انجینئرنگ کی تعلیم مکمل کر کے اسسٹنٹ پروفیسر کی حیثیت سے تدریس کا سلسلہ شروع کیا، مگر بعد میں سیاسی مصروفیات کی وجہ سے یہ سلسلہ ترک کر دیا۔ سوشلسٹ پارٹی کے یہ راہ نما پرتگال کے وزیرِ اعظم کے عہدے تک پہنچے اور آج اقوامِ متحدہ کے جنرل سیکرٹری کی حیثیت سے خدمات انجام دے رہے ہیں۔

  • وزیر اعظم عمران خان سے اقوام متحدہ کے سیکریٹری جنرل کی ملاقات

    وزیر اعظم عمران خان سے اقوام متحدہ کے سیکریٹری جنرل کی ملاقات

    اسلام آباد: وزیر اعظم عمران خان سے اقوام متحدہ کے سیکریٹری جنرل انتونیو گوتریس کی ملاقات ہوئی، ملاقات میں مقبوضہ کشمیر کی صورتحال زیر غور آئی۔

    تفصیلات کے مطابق وزیر اعظم عمران خان سے اقوام متحدہ کے سیکریٹری جنرل انتونیو گوتریس کی ملاقات ہوئی، ملاقات میں وزیر خارجہ شاہ محمود قریشی بھی شریک تھے۔

    ملاقات میں باہمی دلچسپی کے امور اور مقبوضہ کشمیر کی صورتحال زیر غور آئی۔

    خیال رہے کہ اقوام متحدہ کے سیکریٹری جنرل انتونیو گوتریس اور وزیر اعظم عمران خان نے افغان مہاجرین کی میزبانی کے 40 سال مکمل ہونے پر خصوصی کانفرنس میں شرکت کی تھی۔

    کانفرنس سے خطاب کرتے ہوئے وزیر اعظم کا کہنا تھا کہ امیر ممالک مہاجرین کے مسئلے کو تقسیم کے لیے استعمال کرتے ہیں۔

    انہوں نے کہا کہ نائن الیون کے بعد ہمیں اسلامو فوبیا کا سامنا کرنا پڑا، اسلام اور دہشت گردی کو ایک نظر سے دیکھا گیا اور مسلمان مہاجرین کو دیگر کی نسبت زیادہ تکالیف کا سامنا رہا۔

    وزیر اعظم کا کہنا تھا کہ یقین ہے افغان مہاجرین نے دنیا میں سب سے زیادہ تکالیف اٹھائیں، ہماری حکومت نے شروع سے ہی افغان امن کی کامیابی کے لیے بھرپور کوشش کی، پاکستان میں 14 لاکھ رجسٹرڈ افغان مہاجرین موجود ہیں اور یہ دنیا میں افغان مہاجرین کو پناہ دینے والا دوسرا بڑا میزبان ہے۔