Tag: اندلس

جزیرہ نما ہسپانیہ میں مسلمانوں کی آٹھ سو سالہ تاریخ، اسلامی تاریخ کا نہایت مہتم بالشّان باب بھی ہے اور عبرت کا نہایت اندوہ ناک مرقع بھی۔ یہ ملک ولید اوّل کے عہدِ حکومت میں طارق اور موسیٰ کے ہاتھوں مفتوح ہو کر خلافتِ دمشق کا ایک صوبہ قرار پایا تھا۔

خلافتِ بنو امیّہ کے زوال کے بعد جب خلافتِ عباسیہ کا عروج ہوا تو عبدالرّحمٰن نامی ایک اموی شہزادہ عباسیوں کے ہاتھوں قتل سے کسی طرح بچ کر مشرق سے بھاگ کر بکمال پریشانی و سرگردانی اندلس (ہسپانیہ) پہنچ گیا اور وہاں محض اپنی مردانگی و فرزانگی سے ایک آزاد سلطنت قائم کرنے میں‌ بھی کام یاب ہوگیا۔

عظیم الشّان تہذیب کے بطن سے یورپ کے نشاۃِ ثانیہ کی ولادت ہوئی۔ عبدالرّحمن کی اولاد میں آٹھویں تاج دار عبدالرّحمن ثالث نے خلیفہ کا لقب اختیار کیا۔ دسویں صدی ہجری میں خلافتِ اندلس کا آفتاب نصفُ النّہار پر پہنچ گیا اور اس عظیم الشّان سلطنت کا دارُالخلافہ "قرطبہ” دنیا کا ایک ‘گوہرِ آب دار’ بن گیا۔

صدیٔ مذکورہ میں تمام یورپ اور افریقہ کی عنانِ سیاست اسی شہر کے ہاتھوں میں رہی۔ یہ حیرت انگیز سلطنت اپنے زمانے کا عجوبہ تھی اور اس کی طاقت سے تمام دنیائے مسیحی کانپ اٹھتی تھی۔ اس کا ایک ہزار سے زائد تجارتی جہازوں کا بیڑا دنیا کے تمام سمندروں پر قابضانہ تصرف رکھتا تھا اور دنیا بھر کی دولت اس ملک میں سمٹ آئی تھی۔

خلفائے قرطبہ نے علوم و فنون کی اس فراخ دلی سے قدر دانی کی کہ خزانۂ شاہی ان کے لیے تنگ ہو گیا۔ ہر کمال را زوال کے مصداق اس سلطنت کو بھی اسی بوسیدگی نے آن دبایا جو ہر سلطنت کا حصّہ ہوا کرتی ہے۔ دولت و حشمت کی بہتات سے، کیا اہلِ دربار اور کیا عوام النّاس اپنے اخلاقِ کریمہ کو زندہ نہ رکھ سکے اور عیش پرستی و فسق و فجور میں مبتلا ہو گئے۔ یہاں تک کہ گیارہویں صدی کے ربع اوّل میں خلافتِ قرطبہ اپنی عمرِ طبعی کو پہنچ کر ختم ہو گئی۔

خلافتِ عظمٰی کے کھنڈرات پر بے شمار چھوٹی بڑی ریاستیں قائم ہو گئیں۔ اگرچہ ان کے حکم رانوں کے دربار علوم و فنون اور تہذیب و تمدن کے شان دار گہوارے تھے لیکن وہ باہمی رشک و حسد میں ایک دوسرے سے دست و گلو رہنے لگے۔ ان خانہ جنگیوں نے عیسائیوں کے مفاد کو بڑی تقویت پہنچائی اور ان کو بازیافت اندلس کا خیال پیدا ہوا۔

اسی زمانے میں افریقہ میں المرابطین کی سلطنت قائم ہوئی۔ اس وقت یوسف بن تاشفین ان کا حکم راں تھا جس نے شہر ‘مراکش’ قائم کر کے اس کو اپنا دارالخلافہ بنایا۔ اس نے اندلس آ کر زلاقہ کے مقام پر ایک فیصلہ کن معرکہ میں عیسائیوں کو فاش شکست دی جس کی وجہ سے اندلس میں مسلمانوں کا قیام بقدر چار سو سال کے بڑھ گیا۔ مگر یوسف کے مراکش واپس ہوتے ہی ملوک الطوائف پھر عیش و طرب میں پڑ گئے اور اپنے تاج و تخت کو برقرار رکھنے کے لیے یوسف کے مقابلے میں الٹا عیسائیوں کی مدد کرنے لگے۔ اس امر کو محسوس کر کے یوسف نے سلاطینِ اندلس کو معزول کر کے وہاں اپنی سلطنت قائم کر لی۔ المرابطین نے اندلس پر تقریباً پچاس سال حکومت کی لیکن یہ پورا زمانہ اندلس میں خانہ جنگیوں میں صرف ہوا۔ یہاں تک کہ افریقہ میں ایک اور سیاسی انقلاب رونما ہوا اور سلطنتِ مرابطین الموحدین کے ہاتھوں زیر و زبر ہو گئی۔

الموحدین کے سلاطین نے بھی اندلس پر تقریباً اسی (80) سال حکومت کی۔ ان کے زمانے میں اندلس ایک نہایت مہذب و متمدن سلطنت تھی جس کے ہاتھ میں مغربی یورپ کی پالیسی تھی۔ اس خاندان کے اوّل تین سلاطین بڑے قابل فرماں روا ثابت ہوئے۔ یہ لوگ ابنِ ماجہ، ابنِ طفیل اور ابنِ رشد جیسے فلاسفہ کے مربّی تھے۔ ان کے زمانے میں اشبیلیہ کو اندلس کا دارالخلافہ بنایا گیا اور اس کو خوب صورت عمارتوں سے مزین کیا گیا تھا۔ اس شہر میں ایک حسین و جمیل مینار بطور ان کی یادگار اب تک باقی ہے۔

(ماخوذ از تاریخِ اسلامی ہسپانیہ)

مؤرخین نے ہشام اوّل کو نرم دل، رعایا پرور اور نیک و عبادت گزار حکم راں لکھا ہے جو بہترین نظم و نسق اور اپنے حسنِ سلوک کی وجہ سے بھی مشہور ہے۔ وہ امارتِ قرطبہ کے بانی اور پہلے حکم ران عبدالرّحمٰن الداخل کا بیٹا تھا جو اپنے والد کی وفات کے بعد تخت پر بیٹھا۔

ہشام بن عبدالرحمٰن الداخل کا سنِ پیدائش 26 اپریل 757ء بتایا جاتا ہے جس کی زندگی کا سفر آج ہی کے دن 796ء میں ہمیشہ کے لیے تمام ہو گیا تھا۔ تاریخ کے اوراق بتاتے ہیں‌ کہ وہ امارتِ قرطبہ کے دوسرے حکم ران کی حیثیت سے 788ء میں تخت پر بیٹھا تھا۔ ہشام ایک علم پرور، ادب دوست خلیفہ ہی مشہور نہیں بلکہ اپنے محاسن و اخلاق کی بنا پر عوام میں‌ بھی مقبول رہا۔

وہ قرطبہ میں پیدا ہوا تھا۔ ہشّام کی کنیت ابوالولید تھی۔ اسے عبدالرحمٰن الدّاخل نے اپنی زندگی میں ہی اپنا ولی عہد مقرر کر کے بطور جانشین اس کے نام کا اعلان کر دیا تھا۔ ہشّام کے بھائی سلیمان کو والد کا یہ فیصلہ سخت گراں‌ گزرا تھا، لیکن مجال نہ تھی کہ اختلاف کرتا۔

مؤرخین اس سے متعلق ایک واقعہ پیش کرتے ہیں جو کچھ یوں ہے: ایک مرتبہ عبدالرحمٰن الدّاخل نے اپنے ان دونوں بیٹوں کی ذہانت اور قابلیت کی آزمائش کے لیے انھیں‌ اشعار سنا کر شاعر کا نام پوچھا۔ ہشام نے شعر سن کر بتایا کہ اس کا حافظہ کہتا ہے یہ اشعار امرؤ القیس کے ہیں اور میرا گمان ہے کہ یہ اشعار اس نے ہمارے امیر ہی کی شان میں کہے ہیں۔ عبدالرحمٰن نے اسے سراہا اور اس کا جواب قبول کیا اور پھر دوسرے اشعار سلیمان کے سامنے پڑھے مگر اُس نے کہا کہ مجھے عربوں کے اشعار یاد کرنے کی فرصت نہیں، کیوں کہ مجھے اس سے زیادہ دوسرے ضروری کام کرنے ہوتے ہیں۔ عبدالرحمٰن یہ سن کر خاموش ہو گیا۔ یہ واقعہ احمد محمد المقری کی مشہور تصنیف میں موجود ہے۔

788ء میں عبدالرحمٰن الدّاخل کا انتقال ہو گیا۔ ابن خلدون نے لکھا ہے کہ: ’’جس وقت عبدالرحمٰن نے سفرِ آخرت اختیار کیا تو اُس وقت اُس کا بڑا بیٹا سلیمان طلیطلہ میں حکم رانی کر رہا تھا اور اُس کا دوسرا بیٹا ہشام ماردہ کا انتظام سنبھالے ہوئے تھا۔ عبدالرحمٰن نے اِسی کو اپنا ولی عہد بنایا تھا۔ تیسرا بیٹا عبد اللہ مسکین وفات کے وقت قرطبہ میں موجود تھا۔ اپنے باپ کے مرنے پر اپنے بھائی ہشام کی حکومت کی بیعت کر لی اور اُس کو خبر پہنچائی۔ چنانچہ ہشام ماروہ سے قرطبہ آیا اور حکم رانی کی عبا پہن کر حکم رانی کرنے لگا۔

ہشام کی حکومت قائم ہوتے ہی اُس کے بڑے بھائی سلیمان نے بغاوت کر دی اور اپنے ہمراہ طلیطلہ کے باشندوں سمیت جنگ پر اتر آیا۔ ہشام کا چھوٹا بھائی عبد اللہ بھی پسِ پردہ سلیمان سے جا ملا اور محض غائبانہ بیعت کی آڑ میں موقع پاکر قرطبہ سے فرار ہو گیا اور سلیمان کے پاس پہنچ کر بغاوت کے منصوبے میں اُس کا شریکِ کار ہو گیا۔ ہشام نے دونوں کو پیش قدمی کرنے کا موقع نہ دِیا خود فوج لے کر روانہ ہو گیا۔ طلیطلہ شہر کا محاصرہ کرتے ہوئے وہاں مقابلہ نہ کرنے کا سوچا۔ طلیطلہ کے محاصرے کو دو مہینے گزر گئے مگر مقابلے کے لیے سلیمان کی کوئی سپاہ نہ نکلی اور ہشام واپس قرطبہ آگیا۔ عبد اللہ نے جب دیکھا کہ ہشام کی فتح مندی عروج پر ہے تو وہ سلیمان کو چھوڑ کر تمرد چلا گیا اور ہشام پر بھروسا کرتے ہوئے بغیر امان طلب کیے بغیر کسی اطلاع کے قرطبہ میں آگیا جہاں ہشام اُس سے حسنِ سلوک سے پیش آیا۔ چند روز بعد سلیمان نے مصالحت کرنی بہتر سمجھی اور ہشام نے اُسے اپنے خاندان سمیت اندلس سے چلے جانے کی اجازت دے دی۔ جہاں سے وہ مراکش میں بربر قبائل کے ساتھ سکونت پر آمادہ ہو گیا اور یوں جنگ کا خاتمہ ہو گیا۔

ہشام نے محض 39 سال کی عمر میں قرطبہ میں وفات پائی۔ اس نے اپنے بیٹے الحکم بن ہشام کو اپنا جانشین مقرر کیا تھا۔ ہشام کی تدفین قصرِ قرطبہ میں‌ کی گئی۔