کینیڈا: امریکی کوسٹ گارڈ نے دعویٰ کیا ہے کہ ٹائٹن آبدوز کے ملبے سے انسانی باقیات ملی ہیں۔
تفصیلات کے مطابق ٹائٹینک کی سیاحت کے دوران حادثے کا شکار ہونے والی بدقسمت آبدوز نما ٹائٹن کا ملبہ نکال کر کینیڈا منتقل کر دیا گیا۔
ٹائٹن آبدوز کی باقیات کو امریکی کوسٹ گارڈ نے دریافت کیا تھا جس کے بعد اس کو باہر نکالنے کا مشن جاری تھا، رپورٹس کے مطابق آبدوز کے ملبے کو کینیڈا کے سینٹ جانز شہر کی بندرگاہ پر لایا گیا ہے، ملبے میں آبدوز کا لینڈنگ فریم اور پچھلی جانب موجود خول بھی شامل تھا۔
امریکی کوسٹ گارڈ کا کہنا ہے کہ ٹائٹن آبدوز کے ملبے سے انسانی باقیات بھی ملی ہیں، امریکی طبی ماہرین ملبے سے ملنے والی مبینہ باقیات کا باقاعدہ معائنہ کریں گے، اور ان کا تجزیہ کیا جائے گا۔
ماہرین کے مطابق آبدوز نما ٹائٹن کو سطح سمندر سے ساڑھے 12 ہزار فٹ نیچے حادثہ پیش آیا تھا، جس کے نتیجے میں ٹائٹن میں دھماکا ہوا۔ ٹائٹن آبدوز 18 جون کو زیر آب دباؤ کے باعث دھماکے سے تباہ ہو گئی تھی، حادثے میں 2 پاکستانیوں سمیت 5 افراد ہلاک ہو گئے تھے۔
حادثے کی وجوہ جاننے کے لیے تحقیقات جاری ہیں، جس کے لیے آبدوز کی باقیات سے بہت مدد ملے گی۔
