اسلام آباد : ہیومن رائٹس کمیشن آف پاکستان نے نگران وزیراعظم انوارالحق کاکڑ کی جانب سے پی ٹی آئی چیئرمین اور دیگر گرفتار رہنماؤں کے بغیر شفاف انتخابات کے بیان پر سخت ردعمل دیتے ہوئے اسے غیرجمہوری قرار دے دیا۔
تفصیلات کے مطابق نگراں وزیراعظم انوار الحق کاکڑ کے چیئرمین پی ٹی آئی اور اسیررہنماؤں کے بغیر شفاف انتخابات کے بیان پر پاکستان کمیشن برائے انسانی حقوق کا ردعمل آگیا.
ایچ آر سی پی نے اعلامیے میں کہا ہے کہ نگراں وزیراعظم انوارالحق کاکڑ کے دعوے غیر جمہوری اور غیرمعقول ہیں، نگراں حکومت قبل ازانتخابات سیاسی انتقام کاسلسلہ بندکرے۔
پاکستان کمیشن برائے انسانی حقوق کا کہنا تھا کہ وزیراعظم کا بیان غیرمناسب ہے، پی ٹی آئی سربراہ بدعنوانی کے ایک مقدمےمیں جیل میں بند ہیں اور کئی پی ٹی آئی رہنما نو مئی کے فسادات کے بعد سے زیرحراست ہیں۔
اعلامیے میں کہا ہے کہ عدالت نےتمام مقدمات میں قید لوگوں کو ابھی مجرم ثابت نہیں کیا۔
ایچ آر سی پی نے ہائیکورٹ کے حکم کےباوجود پرویزالٰہی کی گرفتاری کی مذمت کرتے ہوئے کہا کہ نگران حکومت کو اپنے مینڈیٹ سے ہٹ کر غیرذمہ دارانہ، جانب دارانہ بیانات سے گریز کرنا چاہیے اور حکومت کو یقینی بنانا چاہیے کہ آزادانہ، شفاف، مصدقہ اور جامع انتخابات کا ماحول پیدا کیا جائے اور اس سے برقرار رکھا جائے۔
خیال رہے کہ نگران وزیراعظم انوارالحق کاکڑ نے گزشتہ روز غیر ملکی خبر ایجنسی ’اے پی‘ کو انٹرویو میں کہا تھا کہ چیئرمین پی ٹی آئی عمران خان اور ان کے رہنماؤں کے بغیر منصفانہ انتخابات ممکن ہیں۔
ان کا کہنا تھا کہ پی ٹی آئی کے وہ ہزاروں کارکنان جو غیر قانونی سرگرمیوں میں ملوث نہیں تھے وہ سیاسی عمل کو چلائیں گے اور انتخابات میں حصہ لیں گے، عمران خان کو توشہ خانہ کیس میں جیل بھیج دیا گیا تھا تاہم سزا معطلی کے بعد وہ سائفر کیس میں جیل کاٹ رہے ہیں۔
نگران وزیراعظم انوارالحق کاکڑ نے انٹرویو میں کہا تھا کہ یہ بات انتہائی مضحکہ خیز ہے کہ سابق وزیراعظم کی انتخابات میں کامیابی روکنے کے لیے فوج انتخابی نتائج میں ہیرا پھیری کرے گی۔
انہوں نے کہا تھا کہ انتخابات فوج نہیں بلکہ الیکشن کمیشن آف پاکستان کرائے گا اور موجودہ چیف الیکشن کمشنر کی تقرری خود چیئرمین پی ٹی آئی نے کی تھی تو وہ عمران خان کے خلاف کیوں ہوں گے۔
