نوشکی : بلوچستان کے ضلع نوشکی میں انسداد پولیو ٹیم پر فائرنگ کے نتیجے میں ایک پولیس اہلکار شہید ہوگیا۔
تفصیلات کے مطابق بلوچستان کے ضلع نوشکی کے علاقے کلی محمد حسنی میں نامعلوم افراد کی فائرنگ سے پولیس اہلکار شہید ہوگیا، حکام نے بتایا کہ شہید پولیس اہلکار انسداد پولیو ٹیم کی حفاظت پر مامور تھا۔
اس حوالے سے ترجمان حکومت بلوچستان شاہد رند نے کہا کہ نوشکی میں انسداد پولیو ٹیم پر فائرنگ سے ایک پولیس اہلکار شہید ہوا، شہید اہلکار وحید کا تعلق جمال آباد نوشکی سے تھا۔
ترجمان کا کہنا تھا کہ انسدادپولیو مہم قومی فریضہ ہے اس پرحملہ ناقابل برداشت ہے، جام شہادت نوش کرنیوالےاہلکارکوخراجِ عقیدت پیش کرتےہیں، یہ حملہ قومی انسدادپولیومہم کوسبوتاژ اور خوف و ہراس پھیلانے کی سازش ہے۔
شاہدرند کا کہنا تھا کہ تخریب کاروں کیخلاف کارروائی میں مزید تیزی لائی جائے گی اور حکومت انسدادپولیوٹیموں ،سیکیورٹی اہلکاروں کی حفاظت کو مزید مؤثر بنائے گی۔
وزیراعظم شہبازشریف نے انسداد پولیو مہم ٹیم پرحملے کی مذمت کرتے ہوئے فائرنگ سے پولیس اہلکار عبد الوحید کی شہادت پر اظہار افسوس کیا۔
وزیر اعظم نے شہید اہلکار کے اہلخانہ سے ہمدردی،اظہار تعزیت کرتے ہوئے صبر و استقامت کی دعا کی۔
ان کا کہنا تھا کہ بچوں کا مستقبل محفوظ بنانےوالی انسدادپولیوٹیم پرحملہ ناقابل برداشت ہے، انسداد پولیو مہم پر حملہ کرنیوالے شرپسند عناصر سے سختی سے نمٹا جائے گا۔
وفاقی وزیرداخلہ محسن نقوی کی نوشکی میں فائرنگ کی مذمت کرتے ہوئے شہید پولیس اہلکار عبدالوحیدکو خراج عقیدت پیش کیا اور لواحقین سے ہمدردی واظہار تعزیت کیا۔
انھوں نے کہا کہ پولیس اہلکار عبدالوحید نے شہادت کا عظیم رتبہ پایا، بچوں کےمستقبل کومحفوظ بنانے کیلئےمامور ٹیم پرحملہ ناقابل برداشت ہے، بچوں کے صحت مند مستقبل پر حملہ کرنیوالوں سے آہنی ہاتھوں سے نمٹا جائے گا۔
