اسلام آباد: وزیراعظم عمران خان نے مستقل معذوری کا شکار افراد اور اُن کے خاندانوں کو صحت سہولت کارڈ فراہم کرنے کی منظوری دے دی۔
تفصیلات کے مطابق وزیراعظم عمران خان نے نادرا (نیشنل ڈیٹا بیس ریگولرٹی اتھارٹی) کے ریکارڈ میں موجود تمام مستقل معذور افراد اور ان کے خاندانوں کے لئے صحت سہولت پروگرام کی توسیع دیتے ہوئے متاثرہ افراد کو انصاف کارڈ فراہم کرنے کی منظوری دے دی۔
نمائندہ اے آر وائی کے مطابق معذوری کا شکار افراد اور اُن کا اہل خانہ ہر سال سات لاکھ 20 ہزار روپے تک کی علاج معالجے کی سہولت مفت حاصل کر سکے گا۔ صحت سہولت پروگرام میں توسیع کی منظور ی کے بعد اب دارالحکومت اسلام آباد، آزادجموں و کشمیر، گلگت بلتستان اور تھرپارکر سے تعلق رکھنے والے تمام مستقل معذور افراد اس سہولت سے استفادہ کریں گے۔
مزید پڑھیں: 22 لاکھ صحت کارڈ تقسیم کر دیے، مزید 90 لاکھ تقسیم کریں گے: وفاقی وزیر صحت
دوسری جانب وزیراعظم نے ضلع تھرپارکر کے تمام خاندانوں کے لئے بھی صحت سہولت پروگرام کو توسیع دینے کی منظوری دے دی۔جس کے مطابق تھرپارکر کے تقریباً تین لاکھ خاندان تقریباً سات لاکھ 20 ہزار روپے تک کے علاج معالجے کی مفت سہولت سے فائدہ اٹھا سکتے ہیں۔
یاد رہے کہ وزیراعظم نے گزشتہ دنوں انصاف سہولت کارڈ پروگرام کا افتتاح کیا تھا، 7 اپریل کو وفاقی وزیر صحت عامر کیانی کا کہنا تھا کہ ملک بھر میں اب تک 22 لاکھ صحت کارڈ تقسیم کیے جاچکے جبکہ حکومت نے 90 لاکھ کا ہدف مقرر کیا ہے۔ اُن کا کہنا تھا کہ ملک میں 25 فی صد سرکاری جب کہ 75 فی صد نجی اسپتال کام کر رہے ہیں، بنیادی سہولتوں کی فراہمی ریاست کی ذمےداری ہے۔
