اسلام آباد : قومی ادارہ صحت نے انفلوئنزا وائرس کے بارے ہنگامی ہدایت نامہ تیار کر لیا، جس میں کہا ہے کہ بروقت اقدامات نہ کرنے پر انفلوئنزا وبائی صورتحال اختیار کر سکتا ہے۔
تفصیلات کے مطابق قومی ادارہ صحت نے موسمی انفلوئنزا سے متعلق خطرے کی گھنٹی بجا دی ، زرائع وزارت صحت نے کہا ہے کہ قومی ادارہ صحت نے انفلوئنزا بارے ہنگامی ہدایت نامہ تیار کر لیا ہے، ہنگامی ہدایت نامہ وفاق،صوبوں کو بھجوایا جائے گا۔
مراسلے میں صوبائی محکمہ صحت کو انفلوئنزا سے بچائو کیلئے پیشگی اقدامات کرنے کی ہدایت کرتے ہوئے کہا گیا ہے کہ دنیا میں ہر سال فلو وائرس کی نئی اقسام رپورٹ ہو رہی ہیں، پاکستان میں موسم سرما کے دوران انفلوئنزا کیسز رپورٹ ہوتے ہیں، دسمبر تا فروری درجہ حرارت گرنے پر فلو کیسز میں اضافہ ہوتا ہے اور انفلوئنزا کیسز میں اضافے سے اسپتال داخلے کی شرح بڑھ جاتی ہے۔
قومی ادارہ صحت نے کہا کہ انفلوئنزا سے بچوں، معمر افراد کی اموات رپورٹ ہوتی ہیں اور معمولی علامات سے شروع ہونے والا انفلوئنزا شدت اختیار کر سکتا ہے، بچے، بزرگ، حاملہ خواتین سمیت شوگر،عارضہ قلب کے مریض، فربہ افراد موسمی انفلوئنزا کا آسان شکار ہیں۔
مراسلے میں کہا گیا ہے کہ شوگر،عارضہ قلب کے مریض، فربہ افراد انفلوئنزا کا آسان شکار ہیں ، 6 ماہ تا 6 سالہ بچوں کو موسمی انفلوئنزا باآسانی لاحق ہوتا ہے اور سانس، دائمی امراض کا شکار افراد کو انفلوئنزا سے پیچیدگیاں ممکن ہیں۔
محکمہ صحت، ادارے انفلوئنزا پر قابو کیلئے پیشگی اقدامات کریں، بروقت اقدامات نہ کرنے پر انفلوئنزا وبائی صورتحال اختیار کر سکتا ہے،بروقت اقدامات کر کے انفلوئنزا کی وبائی صورتحال سے بچائو ممکن ہے۔
زکام، بخار کا شکار اور بیمار افراد دیگر سے میل جول میں احتیاط برتیں، بیمار افراد سے ملنے کے بعد ہاتھ، منہ، آنکھوں کو مت چھوئیں اور بیمار افراد سے ملاقات کے بعد ہاتھ صابن سے دھوئیں، بیمار افراد کھانستے، چھینکتے وقت ناک، منہ ڈھانپیں کیونکہ میل جول میں احتیاط سے انفلوئنزا کا پھیلاؤ روکنا ممکن ہے۔
انفلوئنزا کے مریض کو ڈبلیو ایچ او کی تجویز کردہ ویکسین دی جائے، حاملہ خواتین، بچے، ضعیف افراد انفلوئنزا کی ویکسین لگوائیں، ہائی رسک گروپ کیلئے انفلوئنزا سے بچائو کا موثر حل ویکسینیشن ہے، ڈبلیو ایچ او نے بچے، بوڑھے افراد کیلئے انفلوئنزا ویکسین تجویز کی ہیں۔
دائمی امراض کا شکار،حاملہ خواتین انفلوئنزا ویکسین لگوا سکتی ہیں، انفلوئنزا سے بچاؤ ویکسین مشتبہ مریضوں کو لگائی جا سکتی ہے، انفلوئنزا کی تصدیق تھوک کے کلینکل ٹیسٹ سے ممکن ہے، انفلوئنزا کی تصدیق کیلئے نمونے فورا لیبارٹری بھجوائیں جائیں، موسمی انفلوئنزا کے مشتبہ کیس کی فوری تشخیص انتہائی ضروری ہے، اسپتال عملہ مریض کی نگہداشت کے دوران ماسک، گلوز کا استعمال کریں، دوران نگہداشت انفیکشن کنٹرول بارے حفاظتی اقدامات یقینی بنائے جائیں۔
