قطر: وزارت صحت کی جانب سے سالانہ انفلوئنزا ویکسینیشن مہم شروع کردی گئی ہے، جبکہ مراکز صحت پر مفت ویکسین فراہم کی جارہی ہے۔
بین الاقوامی خبر رساں ادارے کی رپورٹ کے مطابق فلو ویکسین 90 مراکز صحت پر مفت دستیاب ہوں گی، جن میں 31 پی ایچ سی سی ہیلتھ سینٹرز، حماد میڈیکل کارپوریشن کے آؤٹ پیشنٹ کلینکس اور قطر بھر کے کئی نیم سرکاری اور نجی اسپتالوں اور کلینکس کے علاوہ ہیں۔
ڈاکٹر عبداللطیف الخال جوکہ ایچ ایم سی میں متعدی امراض کے ڈویژن کی سربراہی کے امور انجام دے رہے ہیں، اُن کا کہنا ہے کہ لوگوں کے لئے یہ ضروری ہے کہ وہ جلد از جلد فلو سے خود کو محفوظ بنائیں۔
ڈاکٹر عبداللطیف الخال نے کہا کہ ”ہمیں یاد رکھنے کی ضرورت ہے کہ فلو ایک سنگین بیماری ہے جو ہسپتال میں داخل کروا سکتی ہے اور بعض اوقات اس سے موت بھی ہو سکتی ہے، اور اسے کبھی کم نہیں سمجھا جانا چاہیے۔
گردش کرنے والے فلو کے وائرس سال بہ سال تبدیل ہوتے رہتے ہیں، اسی لیے یہ اتنا ضروری ہے کہ آپ سالانہ فلو کی ویکسین حاصل کریں۔
انہوں نے کہا کہ میں ہر ایک کی حوصلہ افزائی کرتا ہوں کہ وہ جلد از جلد اپنی مفت فلو ویکسین حاصل کریں۔
فلو وائرس سے جنگ ہم میں سے ہر ایک کر سکتا ہے یہ ویکسین ملک بھر کے سرکاری، نجی اور نیم نجی کلینکس پر دستیاب ہے جس کی وجہ سے ویکسین حاصل کرنا پہلے سے کہیں زیادہ سہل بنا دیا گیا ہے۔
انہوں نے بتایا کہ دنیا بھر میں لاکھوں افراد نے گزشتہ 50 سالوں کے دوران فلو کی ویکسین محفوظ طریقے سے حاصل کی ہے اور اس ویکسین کی حفاظت کے لیے وسیع تحقیق کی گئی ہے۔
ڈاکٹر عبداللطیف الخال کی جانب سے کمیونٹی کو یقین اس بات کا دلایا گیا کہ فلو شاٹ سے فلو نہیں لگ سکتا اور یہ کہ فلو ویکسین سب سے محفوظ اور سب سے زیادہ قائم شدہ ویکسین میں سے ایک ہے۔
