انقرہ : ترک صدر کے اختیارات میں اضافے کے حوالے سے رواں سال اپریل میں ریفرنڈم ہوگا،جس کے بعد صدر کے پاس وزراکی تقرری کا بھی اختیار ہوگا۔

تفصیلات کےمطابق ترک صدر رجب طیب اردگان کے اختیارات میں اضافے کے حوالے سے رواں سال 16اپریل کو ریفرنڈم کرایاجائےگا،جس کے بعد وہ بہت سے قوانین سے متعلق حکم جاری کرسکیں گے۔

رجب طیب اردگان نےجمعے کےروزاصلاحات کے بل پر دستخط کیے تھے جس سے رائے شماری کی راہ ہموار ہو گئی ہے۔صدر کے پاس نئی اصلاحات کی منظوری کے بعد نئے اختیارات ہوں گے جن کے تحت وہ وزرا کا تقرر کر سکیں گے۔

ترک صدر کا کہنا ہے کہ یہ تجویز کردہ اصلاحات ترکی کو مزید مستحکم کرنے میں مدد دیں گے تاہم ناقدین صدر پر آمرانہ رویے کا الزام لگا رہے ہیں۔

مقامی میڈیا کےمطابق اس بل میں یہ بھی تجویز دی گئی ہے کہ ملک میں پارلیمانی اور صدارتی انتخابات ایک ہی وقت میں منعقد ہوں گے جس کے لیےممکنہ تاریخ تین نومبر 2019 ہے۔

مزید پڑھیں:صدر کے اختیارات میں توسیع‘ترک پارلیمنٹ نے منظوری دے دی

یاد رہےکہ گزشتہ ماہ ترک پارلیمنٹ نےصدر کے اختیارات بڑھانے سے متعلق نئے قانون کی منظوری دے دی تھی۔

واضح رہےکہ نئی اصلاحات کے تحت ملک کے وزیراعظم کا عہدہ موجودہ وزیراعظم بن علی یلدرم کے بجائے کسی اور شخصیت کے پاس جائے گا یا پھر اس عہدے کے جگہ نائب صدر لیں گے۔

ماسکو : روسی صدرولادی میر پیوٹن نےدنیابھرمیں روسی سفارتی مشنزکی سیکیورٹی بڑھانے کی ہدایت کردی۔’

تفصیلات کےمطابق ترکی میں روسی سفیر کے قتل کے بعد ماسکومیں روسی صدرولادی میرپیوٹن سےوزیرخارجہ سرگئی لاروف نے ملاقات کی۔روسی صدر سے ملاقات میں ڈائریکٹرفارن انٹیلی جنس اورڈائریکٹرفیڈرل سیکیورٹی سروس بھی موجود تھے۔

صدرپیوٹن نےدنیابھرمیں روسی سفارتی مشنزکی سیکیورٹی سخت کرنےکی ہدایت کی۔ولادی میر پیوٹن نے بتایاکہ روسی تحقیقاتی کمیٹی نےقتل کی تحقیقات کاآغازکردیاہے۔تحقیقاتی کمیٹی جلدورکنگ گروپ تشکیل دےکرترکی جائےگی۔

روسی صدرپیوٹن کاکہناتھاکہ ٹیلیفونک گفتگومیں ترک صدر اردگان نے قتل کی مشترکہ تحقیقات پرآمادگی ظاہرکی ہے۔

مزید پڑھیں:ترکی: روسی سفیر دوران خطاب فائرنگ سے ہلاک

یاد رہے کہ گزشتہ شب ترکی میں روسی سفیر آندرے کارلوف پراسپیشل فورس کے اہلکار نے فائرنگ کی جس کے باعث وہ شدید زخمی ہوگئے اور انہیں اسپتال منتقل کردیا گیا جہاں وہ جانبر نہ ہوسکے۔

واضح رہے کہ روسی سفیر پرحملہ ایک ایسے وقت میں ہوا ہے جب ترک وزیرخارجہ میلود چاووش اوغلو،روسی وزیر خارجہ سرگئی لارووف اور ایران کے وزیر خارجہ جواد ظریف ماسکو میں شام کے معاملے پر ایک غیر معمولی سہ فریقی مذاکرات شروع کرنے والے تھے۔

انقرہ : ترک صدر رجب طیب اردگان نے خبردار کیا ہے کہ اگر یورپی یونین کی جانب سے ترکی کے ساتھ مذاکرات معطل ہوئےتوتارکین وطن کی بڑی تعداد کو یورپ سفر کرنے کی اجازت ہوگی۔

تفصیلات کےمطابق جمعے کے روزاستنبول میں اپنی ایک تقریرمیں اردگان نے یورپین یونین کو مخاطب کرتے ہوئے کہا کہ’میری بات سنیے،اگرآپ نے مزید کچھ کیا تو پھریہ ذہن میں رکھیے کہ سرحدیں کھول دی جائیں گی‘۔

مزید پڑھیں:ترکی میں بغاوت کی کوشش عوام نے ناکام بنادی، 250 سے زائد افراد ہلاک

خیال رہے کہ مذاکرات کو اس وقت دھچکا لگاجب یورپین پارلیمنٹ میں جمعرات کو ترکی سے رکنیت کے معاملے پر بات نہ کرنے کے لیے پیش ہونے والی قرار داد کے حق میں ووٹ ڈالے گئے تھے

یورپین پارلیمنٹ کے مطابق قرارداد پیش کرنےکی وجہ ترکی میں رواں سال ناکام بغاوت کے بعد ہونے والے کریک ڈاؤن کو قرار دیا گیا تھا۔

اس سے قبل رواں سال 18 مارچ کو تارکین وطن کی یورپ کی جانب ہجرت کو روکنے کے لیے انقرہ اور برسلزکے درمیان معاہدہ ہوا تھا۔

معاہدے کے تحت ترکی کے ساتھ وعدہ کیا گیا تھا کہ اس کے شہریوں کو ویزا فری سفر کی اجازت دی جائے گی اور ترکی کے یورپی یونین کے رکن بننے کے لیے مذاکرات میں تیزی سے پیش رفت کی جائے گی۔

یاد رہےکہ گزشتہ سال دس لاکھ سے زائد تارکین وطن یورپ پہنچےتھے ان میں سے زیادہ تر ترکی کے راستے یورپ میں داخل ہوئےتھے۔

واضح رہے کہ ترکی میں اس وقت تقریباً 30 لاکھ تارکین وطن موجود ہیں جن میں زیادہ تر شام سے آئے ہیں۔

انقرہ : ترک حکام نے رواں سال جولائی میں ناکام فوجی بغاوت کی کوشش میں ملوث ہونے کے الزام میں دس ہزار سرکاری ملازمین کو فارغ کردیا۔

تفصیلات کےمطابق ترک حکومت کی جانب سے جاری حکم نامے میں سرکاری ملازمین اساتذہ،ڈاکٹرزاور نرسیں شامل ہیں جن کو نوکریوں سے برطرف کیا گیا ہے اس کے علاوہ 15ذرائع ابلاغ کے دفاتربندکرنے کاحکم دیا گیاہے۔

ترک صدر طیب اردگان کا کہنا ہے کہ بغاوت میں ملوث افراد کو سزائے موت کے لیے پارلیمنٹ سے منظوری کی سفارش کریں گے۔

رجب طیب اردگان کا کہنا تھا کہ ہماری حکومت یہ تجویز پارلیمنٹ میں لے کر جائے گی۔یقین ہے کہ پارلیمنٹ سے اس کی منظوری مل جائےگی،اور یہ فیصلہ مجھ تک آئے گا تومیں اس کی توثیق کر دوں گا۔

مزید پڑھیں: ترکی میں بغاوت کی کوشش عوام نے ناکام بنادی، 250 سے زائد افراد ہلاک

خیال رہے کہ ترک حکومت کی جانب سے فتح اللہ گولن پر ناکام فوجی بغاوت کی منصوبہ بندی کا الزام لگایا جاتا ہے۔

ترکی میں ناکام بغاوت کی کوشش کے بعد 18000 ہزار گرفتاریاں عمل میں لائی جاچکی ہیں۔پبلک سیکٹر میں کام کرنے والے 66000 افراد کو نوکریوں سے نکالا جا چکا ہے اور 50 ہزار کے پاسپورٹ منسوخ کیے جا چکے ہیں۔

یاد رہے کہ ترکی میں حکام کے مطابق 15 جولائی کی ناکام فوجی بغاوت میں تقریباً نو ہزار فوجیوں نے حصہ لیا تھا۔حکام کا کہنا تھا کہ بغاوت میں حصہ لینے والے فوجی اہلکاروں کے پاس 35 جہاز، 37 ہیلی کاپٹر، 74 ٹینک اور تین بحری جہاز تھے۔

مزید پڑھیں: ترکی میں 20 ٹی وی اور ریڈیو سیٹ بند کرنے کا حکم

واضح رہے کہ رواں ماہ ترک حکومت نے جولائی کی ناکام فوجی بغاوت کے بعد نافذ ایمرجنسی کے تحت 20 ٹیلی ویژن اور ریڈیو اسٹیشنوں کو بند کرنے کے احکامات جاری کیے تھے۔

انقرہ: ترکی کے دارالحکومت انقرہ میں پولیس آپریشن کے دوران 2 خودکش حملہ آوروں نے خود کو دھماکے سے اڑالیا۔

تفصیلات کےمطابق انقرہ کے گورنر ارجان توپاجا کامیڈیا سے بات کرتے ہوئےکہناتھاکہ اس بات کا امکان ہے کہ حملہ آوروں کا تعلق کالعدم کردستان ورکرز پارٹی سے ہوسکتا ہے۔

ان کا مزید کہنا تھا کہ خودکش حملے میں میں جو مواد استعمال کیا گیا،اس سے کردستان ورکرز پارٹی کی جانب ہی اشارہ ہوتا ہے۔

انقرہ کے گورنرکا کہناتھاایک حملہ آور مرد تھا، جس کی شناخت کی جاچکی ہے جبکہ ایک خاتون تھیں،جن کی شناخت نہیں کیا جاسکی۔

مزید پڑھیں: ترکی میں بغاوت کی کوشش عوام نے ناکام بنادی، 250 سے زائد افراد ہلاک

یاد رہے کہ رواں برس 15 جولائی کو ترک صدر طیب اردگان کی حکومت کا تختہ الٹنے کے لیے ہونے والی فوجی بغاوت میں ناکامی کے بعد سے ترکی میں ایمرجنسی نافذ ہے اور بغاوت کی سازش میں ملوث افراد کے خلاف کریک ڈاؤن کا سلسلہ جاری ہے۔

واضح رہے کہ دوسری جانب کرد باغیوں کی جماعت کردستان ورکرز پارٹی کی جانب سے حملوں میں بھی اضافہ ہوگیا ہے،جسے ترکی جانب سے دہشت گرد تنظیم قرار دیا جاتا ہے۔