Tag: اننت امبانی

عالمی شہرت یافتہ گلوکار عاطف اسلم کی لندن میں منعقدہ اننت امبانی اور رادھیکا مرچنٹ کی شادی سے پہلے کی تقریب میں شرکت کی افواہیں سوشل میڈیا پر زیر گردش ہیں۔

میڈیا رپورٹس کے مطابق عالمی شہرت یافتہ گلوکار عاطف اسلم نے لندن کے شاندار اسٹوک پارک اسٹیٹ میں منعقدہ ایشیا کے امیر ترین شخص بھارتی بزنس ٹائیکون مکیش امبانی کے سب سے چھوٹے بیٹے اننت امبانی اور رادھیکا مرچنٹ کی پری ویڈنگ تقریبات میں پرفارم کیا۔

بھارتی میڈیا کے مطابق لندن میں اننت امبانی اور اُن کی منگیتر رادھیکا مرچنٹ کی پری ویڈنگ تقریبات کا آغاز ہوگیا ہے جس میں پاکستانی گلوکار عاطف اسلم نے بھی اپنی اہلیہ سارہ بھروانہ کے ہمراہ شرکت کی۔

 

View this post on Instagram

 

A post shared by Atif Aslam (@atifaslam)

دوسری جانب گلوکار عاطف اسلم نے اپنے آفیشل انسٹاگرام اکاؤنٹ پر اپنی اور اہلیہ سارہ کی تصاویر شیئر کیں جس میں دونوں کو شاندار گاڑی سے اترے ہوئے دیکھا جاسکتا ہے۔

عاطف اسلم نے تصاویر کے ساتھ کیپشن میں لکھا’ ٹیم اے اے، یہ رات کبھی نہیں بُھلائی جاسکتی‘ ساتھ ہی انہوں نے پوسٹ کے ہیش ٹیگ میں لندن بھی لکھا جو اس بات کی طرف اشارہ ہے کہ یہ تصاویر اننت امبانی کی پری ویڈنگ تقریب میں شرکت کے دوران لی گئیں، تاہم انہوں نے یہ بات واضح نہیں کی کہ وہ کس تقریب میں شرکت کررہے ہیں۔

اس کے علاوہ یحییٰ شاٹس نامی فوٹوگرافر نے اپنے آفیشل انسٹاگرام ہینڈل پر عاطف اسلم اور اُن کی اہلیہ سارہ کی چند تصاویر پوسٹ کیں تھی جس کے کیپشن میں بتایا تھا کہ یہ تصاویر اننت امبانی اور رادھیکا مرچنٹ کی پری ویڈنگ تقریب میں شرکت کے دوران لی گئیں۔

لیکن یحییٰ شاٹس نامی فوٹوگرافر نے یہ تصاویر وائرل ہونے کے بعد اپنی پوسٹ ہی ڈیلیٹ کردیں، اس کے علاوہ مختلف میڈیا رپورٹس کے مطابق اس تقریب میں عاطف اسلم کے علاوہ  راحت فتح علی خان، وارث بیگ سمیت چند پاکستانی فنکاروں نے شاندار پرفارم کیا۔

ایشیا کے امیر ترین شخص بھارتی بزنس ٹائیکون مکیش امبانی کے سب سے چھوٹے بیٹے اننت امبانی اور رادھیکا مرچنٹ کی پری ویڈنگ تقریبات کا آغاز ہوگیا ہے، جبکہ دونوں جولائی میں شادی کے بندھن میں بندھ جائیں گے۔