Tag: انٹرنیشنل اولمپک کمیٹی

سوئزرلینڈ : پاکستانی شوٹرزکو ویزانہ دینے پر انٹرنیشنل اولمپک کمیٹی نے بھارت میں اولمپک ایونٹس پرپابندی لگادی جبکہ اولمپک کمیٹی نے مینز پچیس میٹررپیڈ فائرایونٹ کا کوالیفیکیشن اسٹیٹس بھی واپس لے لیا ہے۔

تفصیلات کے مطابق کھیل میں سیاست پر بھی بھارت کومنہ کی کھاناپڑی، پاکستانی شوٹرز کو ویزانہ دینے پر انٹرنیشنل اولمپک کمیٹی نے برہمی کا اظہار کرتے ہوئے بھارت میں اولمپک کےحوالے سے ایونٹس پرپابندی لگادی اور کہا بھارت میں کوئی اولمپک ایونٹ آرگنائز نہیں کیا جائے گا۔

انٹرنیشنل اولمپک کمیٹی کے ایگزیکٹو بورڈ نے فیصلہ کیا کہ آئندہ بھارت میں اولمپک مقابلوں کے انعقاد کے لیے دیے جانے والے این او سی سے متعلق بات چیت اس وقت تک معطل رہے گی جب تک بھارتی حکومت تعصب سے پاک برتاؤ کے اولمپکس قوانین پر عملدرآمد نہ کرے۔

اولمپک کمیٹی نے بھارت میں ہونے والے مینز پچیس میٹررپیڈ فائرایونٹ کا کوالیفیکیشن اسٹیٹس بھی واپس لے لیا ہے۔

گذشتہ روز پاکستان کے دوشوٹرز کو بھارت میں ہونے والے ورلڈ کپ مقابلوں میں حصہ لینا تھا لیکن پلوامہ حملے کے بعد بھارت نےآخری وقت میں پاکستانی شوٹرز کو ویزا دینے سے انکار کردیا تھا ، جس سے ٹورنامنٹ متاثر ہوا۔

مزید پڑھیں : پاکستانی شوٹرز کو ویزا نہ دینا بھارت کو مہنگا پڑگیا

انٹرنیشنل شوٹنگ فیڈریشن نے بھارت کو سنگین نتائج کی دھمکی دیتے ہوئے کہا تھا کہ بھارت کی اس اوچھی حرکت سے اس کے کھلاڑیوں پر پابندی بھی لگ سکتی ہے۔

اس سے قبل بھارت آئی سی سی ورلڈ کپ 2019 میں پاک بھارت میچ کو منسوخ کرنے کی کوششیں کر رہا ہے تاہم انٹرنیشنل کرکٹ کونسل نے تمام خبریں مسترد کرتے ہوئے کہا کہ ورلڈ کپ میں پاک بھارت میچ شیڈول کے مطابق ہوگا۔

خیال رہے کہ مقبوضہ کشمیر میں بھارتی فوجیوں پر حملے کے بعد بھارت نے حسب معمول پاکستان پر الزام تراشیوں کا سلسلہ شروع کر رکھا ہے اور بھارتی سیاستدان، اداکار اور میڈیا پاکستان کی مخالفت میں ہر حد سے گزر چکے ہیں۔