Tag: انٹرنیٹ سروس

اسلام آباد : انٹرنیٹ سروس تاحال مکمل بحال نہ ہونے سے صارفین رُل گئے، صارفین کو براؤزنگ اور ڈاؤن لوڈنگ میں مسائل کا سامنا ہے۔

تفصیلات کے مطابق وفاقی دارالحکومت اسلام آباد اورراولپنڈی میں معمولات زندگی مکمل بحال ہوگئی تاہم جڑواں شہروں میں انٹرنیٹ سروس تاحال مکمل بحال نہ ہوسکی۔

بیشتر علاقوں میں موبائل ڈیٹا پر انٹرنیٹ سروس جزوی معطل ہے، دونوں شہروں میں انٹرنیٹ صارفین کو براؤزنگ اور ڈاؤن لوڈنگ میں مسائل کا سامنا ہے جبکہ شہریوں کوڈاکیومنٹس اوروائس نوٹس بھیجنے میں بھی شدیدمشکلات ہورہی ہے۔

سوشل میڈیا ایپلی کیشنز وی پی این کے بغیر سست روی کا شکارہیں، انٹرنیٹ سست ہونے سے آئی ٹی سمیت آن لائن کاروبارکرنے والوں کوبھی شدید پریشانی ہورہی ہے۔

شہریوں کا یہی کہنا ہے انٹرنیٹ سروس کو فوری اور مکمل بحال کیا جائے۔

دوسری جانب ملک کے مختلف حصوں میں وائی فائی پر انٹرنیٹ کی رفتار نہایت سست ہوگئی ہے جبکہ موبائل نیٹ ورک میں بھی خلل ہے، جس کی وجہ سے شہریوں کو کال ملانے، سوشل میڈیا پر وائس نوٹ،تصاویر،ویڈیوز اپلوڈنگ،ڈاؤن لوڈنگ میں بھی مشکلات کا سامنا ہے۔

اس حوالے سے حکومت کی جانب سے اب تک کوئی وجوہات نہیں بتائی گئیں۔

کراچی : سندھ ہائیکورٹ نے انٹرنیٹ سروس بند نہ کرنے سے متعلق حکم امتناع برقرار رکھتے ہوئے پی ٹی اے اور دیگر کو بلاتعطل انٹرنیٹ سروس فراہم کرنے کا حکم دے دیا۔

تفصیلات کے مطابق سندھ ہائی کورٹ میں ملک میں بلاجواز انٹرنیٹ سروس کی بندش کے خلاف درخواست پر سماعت ہوئی۔

پی ٹی اے اور وفاقی حکومت نے تحریری جواب جمع کرانے کیلئے مہلت مانگ لی ، جس پر عدالت نے 6 فروری کو پی ٹی اے، وفاقی حکومت اور دیگر سے رپورٹ طلب کرلی ہے۔

سندھ ہائیکورٹ نے انٹرنیٹ سروس بند نہ کرنے سے متعلق حکم امتناع برقرار رکھا ، وکیل نے بتایا کہ الیکشن ہونے والے ہیں، انٹرنیٹ پر زیادہ رش کی وجہ سے سروس سلو ہوجاتی ہے،پی ٹی آئی مقبول جماعت ہے، دنیا بھر سے فالورزسرچ کرتےہیں اس وجہ سے مسائل ہیں۔

چیف جسٹس عقیل عباسی نے ریمارکس دیے انٹرنیٹ تو ہمارا بھی بند ہو جاتا ہے اور کہا جاتا ہے سمندر میں کیبل میں خرابی ہوگئی، جس پر جبران ناصر کا کہنا تھا کہ سیاسی جماعتوں اور امیدواروں کی ویب سائٹس بند کردی گئی ہیں، ایک سیاسی جماعت کی ویب سائٹس پچھلے 7دن سے بند ہے، پچھلے سال مئی میں 3 دن مسلسل انٹرنیٹ سروس بند رہی۔

عدالت نے پی ٹی اے اور دیگر کو بلاتعطل انٹرنیٹ سروس فراہم کرنے کا حکم دے دیا۔

سندھ ہائی کورٹ میں درخواست پی ایس 110 سے آزاد امیدوار جبران ناصر ایڈووکیٹ نے دائر کی تھی۔

کراچی : سندھ ہائی کورٹ نے الیکشن تک تمام شہریوں کو انٹرنیٹ سروس بلا تعطل فراہم کرنے کا حکم دیتے ہوئے حکم امتناع جاری کردیا۔

تفصیلات کے مطابق سندھ ہائیکورٹ میں ملک میں انٹرنیٹ سروس کی بار بار بندش اور تعطل کیخلاف درخواست پر سماعت ہوئی۔

چیف جسٹس عقیل احمد عباسی کی سربراہی میں دورکنی بینچ نے درخواست کی سماعت کی، عدالت کو بتایا گیا کہ 17 دسمبر،7 اور 20جنوری کو ملک بھرمیں انٹرنیٹ کی سروس اور سوشل میڈیا تک رسائی معطل رہی۔

جبران ناصر ایڈووکیٹ نے کہا کہ مسلسل کی کئی روز سے ملک بھر میں انٹرنیٹ سروس تعطل کا شکار ہے۔

درخواست میں کہا گیا ہے کہ انٹرنیٹ سروس کی بلاجواز بندش اور تعطل سے امیدواروں کو انتخابی مہم چلانا مشکل ہوگیا ہے۔

درخواست میں وزارت داخلہ ،وزارت آئی ٹی و مواصلات اور پی ٹی اے کو فریق بنایا گیا ہے اور استدعا کی گئی ہے کہ فریقین کو ہدایت کی جائے کہ عام انتخابات تک شہریوں کو سوشل میڈیا تک رسائی میں مداخلت نہ کریں۔

عدالت نے الیکشن تک تمام شہریوں کو انٹرنیٹ سروس بلا تعطل فراہم کرنے کا حکم دیتے ہوئے حکم امتناع جاری کرتے ہوئے فریقین سے 29جنوری کو جواب طلب کرلیا۔

پی ایس 110سے امیدوار جبران ناصر ایڈووکیٹ نے سندھ ہائی کورٹ سے رجوع کیا تھا۔