مظفر آباد: آزاد کشمیر کے عوام اپنے حقوق کے لیے سراپا احتجاج بن گئے ہیں، مظفر آباد میں آج سستی بجلی، اور آٹے پر سبسڈی کے لیے ہڑتال کا تیسرا روز ہے۔
تفصیلات کے مطابق آزاد کشمیر کے دارالحکومت مظفر آباد میں عوامی ایکشن کمیٹی کی کال پر مارکیٹیں اور کاروباری مراکز بند پڑے ہوئے ہیں، جب کہ انتظامیہ کی جانب سے مختلف علاقوں میں موبائل اور انٹرنیٹ سروس بند کر دیا گیا ہے۔
حکومت نے پونچھ ڈویژن میں انٹرنیٹ سروس بند کر دی ہے، میرپور سے شروع ہونے والا لانگ مارچ پونچھ کی حدود میں داخل ہو گیا ہے، دوسری طرف میرپور کوٹلی سمیت مختلف اضلاع سے قافلے مظفر آباد کے لیے آج روانہ ہوں گے۔
اضلاع کے جلوس آج راولاکوٹ پہنچیں گے، جہاں استقبالیہ کیمپ لگا دیے گئے ہیں، مارچ کے شرکا کے لیے ہوٹلز ایسوسی ایشن نے مفت کھانے کا اعلان کر رکھا ہے، یہ مارچ دوپہر کو راولاکوٹ سے مظفر آباد کے لیے روانہ ہوگا۔
پولیس کی بھاری نفری مظفر آباد کے داخلی اور خارجی راستوں پر موجود ہے، احتجاجی قافلوں کو روکنے کے لیے راستے میں رکاوٹیں بھی کھڑی کر دی گئی ہیں۔
https://urdu.arynews.tv/pm-azad-kashmir-awami-action-committee/
