انجینئرنگ کے طلباء کی ڈریم کمپنی گوگل میں براہ راست داخلہ کا سنہری موقع ہے اور ہر ماہ 1,20,000 روپے وظیفہ بھی ملے گا۔
تفصیلات کے مطابق دنیا کی سب سے بڑی ٹیک کمپنی گوگل نے سال 2026 کے لیے اپنا "سمر سافٹ ویئر انجینئرنگ انٹرن شپ پروگرام” شروع کر دیا ہے، جو انجینئرنگ اور کوڈنگ کے شعبے سے تعلق رکھنے والے طلباء کے لیے ایک شاندار موقع ثابت ہو سکتا ہے۔
اس انٹرن شپ کے ذریعے طلباء کو گوگل اور اس کے ساتھ کام کرنے والی بڑی عالمی کمپنیوں کے حقیقی سافٹ ویئر پروجیکٹس پر کام کرنے کا موقع ملے گا، ساتھ ہی ماہانہ وظیفہ، مینٹرشپ اور جدید ٹیکنالوجی سے سیکھنے کی سہولت بھی فراہم کی جائے گی۔
ڈاکٹر اے پی جے عبدالکلام ٹیکنیکل یونیورسٹی (AKTU) لکھنؤ نے اپنے انجینئرنگ طلباء کو اس عالمی معیار کی انٹرن شپ سے فائدہ اٹھانے کی دعوت دی ہے۔
یونیورسٹی کے انوویشن ہب نے طلباء کو اس پروگرام میں حصہ لینے کی ترغیب دیتے ہوئے کہا ہے کہ یہ ان کے کیریئر کی کامیاب شروعات کے لیے ایک نادر موقع ہے۔
ماہانہ وظیفہ اور عملی تربیت
انوویشن ہب کے سربراہ پروفیسر مہیپ سنگھ نے کہا گوگل نے کوڈنگ اور ٹیکنالوجی سے وابستہ کئی بین الاقوامی کمپنیوں کے ساتھ شراکت داری کی ہے، جس کے تحت بھارت سمیت دنیا بھر کے باصلاحیت طلباء کو حقیقی پروجیکٹس پر کام کرنے کا موقع دیا جا رہا ہے۔ اس دوران ہر طالب علم کو ماہانہ وظیفہ بھی دیا جائے گا، جو کہ پروجیکٹ اور ورکشاپس کے لحاظ سے مختلف ہو سکتا ہے۔
گوگل طلباء کو صرف پروجیکٹس پر کام کرنے کی سہولت ہی نہیں دے گا بلکہ اپنے تجربہ کار انجینئرز کے ذریعے انہیں رہنمائی (Mentorship) اور مکمل ٹیکنیکل سپورٹ بھی فراہم کرے گا تاکہ طلباء مؤثر طریقے سے سیکھ سکیں اور عملی مہارت حاصل کریں۔
درخواست دینے کا طریقہ
طلباء کو گوگل کی آفیشل ویب سائٹ پر "Careers” سیکشن میں جا کر "Software Engineering Internship 2026” کے لیے درخواست دینا ہوگی۔
انٹرن شپ کا دورانیہ تقریباً 10 سے 12 ہفتے ہوگا اور زیادہ تر کام ورچوئل ہو گا۔ طلباء کو اپنی لوکیشن کے لیے بنگلور، حیدرآباد، پونے، ممبئی یا گڑگاؤں میں سے کسی ایک کا انتخاب کرنا ہوگا۔
گوگل انٹرن شپ کے نمایاں فوائد
گوگل کی عالمی مصنوعات پر براہ راست کام کرنے، تجربہ کار انجینئرز کے ساتھ رہنمائی اور تعاون جبکہ تکنیکی ورکشاپس اور نیٹ ورکنگ ایونٹس میں شرکت کا بھی موقع ملے گا.
اہلیت کے معیار
کمپیوٹر سائنس یا متعلقہ فیلڈ میں ڈگری ، ایک یا زیادہ پروگرامنگ زبانوں (C++, Java, Python وغیرہ) کا تجربہ جبکہ یونکس/لینکس پلیٹ فارمز پر کام کرنے کی سوجھ بوجھ ہو۔
گوگل سمر انٹرن شپ پروگرام 2026 نہ صرف طلباء کو عملی تربیت فراہم کرے گا بلکہ انہیں عالمی سطح پر کام کرنے اور اپنی صلاحیتیں نکھارنے کا موقع بھی دے گا۔ جو طلباء سافٹ ویئر انجینئرنگ یا کوڈنگ کے میدان میں مضبوط بنیاد رکھتے ہیں، ان کے لیے یہ پروگرام ایک انمول تجربہ اور کامیاب کیریئر کی شروعات ثابت ہو سکتا ہے۔
