Tag: انڈونیشیا

جکارتہ: انڈونیشیا میں ایک بس بریک فیل ہونے کے باعث پہاڑ سے ٹکرا گئی، حادثے میں 13 افراد جاں بحق ہو گئے۔

تفصیلات کے مطابق اتوار کو انڈونیشیا کے جزیرے جاوا پر فیکٹری ورکرز کو لے جانے والی ایک ٹور بس کے حادثے میں کم از کم 13 افراد ہلاک اور 34 زخمی ہو گئے ہیں۔

پولیس حکام کا کہنا ہے کہ حادثہ گاڑی کے بریک فیل ہونے کے سبب پیش آیا، بریک فیل ہونے کے بعد گاڑی بے قابو ہو گئی تھی، یہ حادثہ انڈونیشیا کے صوبے یوگیاکارتا میں پیش آیا۔

زندہ بچ جانے والے مسافروں کا کہنا ہے کہ بریک فیل ہونے کی وجہ سے ڈرائیور گھبراہٹ کا شکار ہو گیا تھا، رفتار کم کرنے کے لیے مسلسل گیئر شفٹ کرتا رہا۔

بنتول ریجنسی کے ضلعی پولیس سربراہ احسان نے میڈیا کو بتایا کہ ہم نے جن عینی شاہدین سے پوچھ گچھ کی انھوں نے بتایا کہ انھوں نے ڈرائیور کو گھبراتے ہوئے دیکھا، وہ گیئر اسٹک کو سنبھالنے کی جدوجہد کر رہا تھا، اس لیے اس بات کا اشارہ ملتا ہے کہ بریک کام نہیں کر رہا تھا۔

انھوں نے بتایا کہ بس اتوار کی دوپہر 2 بجے کے قریب کھڑی ڈھلان سے نیچے جا رہی تھی کہ ڈرائیور کا گاڑی پر سے کنٹرول ختم ہو گیا، حادثے میں ڈرائیور بھی نہ بچ سکا۔

بس کے مسافروں نے یہ بھی بتایا کہ حادثے سے کچھ ہی دیر قبل مسافروں کو عارضی طور پر اترنے کے لیے کہا گیا تھا، کیوں کہ بس کو اوپر جانے میں دشواری ہو رہی تھی۔

27 کروڑ آبادی پر مشتمل اس جزیرے والے ملک میں جان لیوا ٹریفک حادثات عام ہیں، جہاں گاڑیاں اکثر پرانی ہیں اور ان کی دیکھ بھال بھی ناقص ہے، اور سڑک کے قوانین کو معمول کے مطابق نظر انداز کیا جاتا ہے۔

یاد رہے کہ گزشتہ سال مارچ میں بھی مغربی جاوا صوبے کے شہر سمیدانگ میں درجنوں زائرین کو لے جانے والی ایک بس گہری کھائی میں گر گئی تھی جس کے نتیجے میں 29 افراد ہلاک ہو گئے تھے۔

جکارتہ: انڈونیشیا کے ایک گاؤں میں شدید بارش کی وجہ سے ٹھنڈے لاوے کا ایک تودا گر گیا۔

تفصیلات کے مطابق انڈونیشیا میں بارش سے آتش فشانی مواد کی لینڈ سلائیڈنگ ہوئی ہے، ٹھنڈے لاوے میں متعدد گاڑیاں پھنس گئیں۔

جمعرات کے روز انڈونیشیا کے ماؤنٹ میراپی کی ڈھلوان کے ارد گرد ہونے والی شدید بارش سے یوگیاکارتا کے سلیمان ضلع میں دریائے بویونگ کے کنارے، ٹھنڈے لاوے کا تودا گر گیا۔

حکام کا کہنا ہے کہ لاوے کی لینڈ سلائیڈنگ میں کسی بھی قسم کے جانی نقصان کی کوئی اطلاع نہیں ہے، بدھ کو ماؤنٹ میراپی سے آتش فشانی کی صورت میں لاوا اور سفید دھواں بھی نکلتے دیکھا گیا۔

واضح رہے کہ دنیا کے سب سے زیادہ فعال آتش فشاں میں سے ایک، ماؤنٹ میراپی، وسطی جاوا اور یوگیاکارتا کے صوبوں کے درمیان سرحد پر واقع ہے۔

دریائے بویونگ کے کنارے ماؤنٹ میراپی سے نکلنے والے ٹھنڈے لاوے کے مواد میں پھنسی گاڑیوں کو مقامی لوگوں نے اپنی مدد آپ کے تحت نکالا۔

جکارتہ: انڈونیشیا میں کرونا وبا زور پکڑ چکی ہے، وائرس سے ایک مہینے میں 30 ڈاکٹرز ہلاک ہو چکے ہیں۔

تفصیلات کے مطابق انڈونیشیا میں کرونا وائرس کے بڑھتے کیسز کی وجہ سے تقریباً ایک مہینے میں 30 ڈاکٹرز ہلاک ہو چکے ہیں، محکمہ صحت کے حکام نے مئی کے بعد سے کیسز میں اضافے کا خدشہ ظاہر کیا تھا۔

وبا کے آغاز سے لے کر اب تک انڈونیشیا میں کرونا وائرس سے 58 ہزار 24 افراد ہلاک ہو چکے ہیں، مجموعی کیسز کی تعداد بڑھ کر 21 لاکھ 56 ہزار ہو چکی ہے، جب کہ پیر کو اس وبا سے مزید 463 افراد ہلاک ہوئے، اور 20 ہزار 467 نئے کیسز سامنے آئے۔

وائرس سے ہیلتھ ورکرز بھی بہت زیادہ تعداد میں متاثر ہونے لگے ہیں، اور اب تک 405 ڈاکٹرز اور سیکڑوں ہیلتھ کیئر ورکرز ہلاک ہوئے ہیں، کیسز میں اضافے کی وجہ سے اسپتالوں اور کمیونٹی ہیلتھ سینٹرز پر مریضوں کا بوجھ بھی بڑھتا جا رہا ہے۔

انڈونیشیا کے میڈیکل ڈاکٹرز ایسوسی ایشن کے سربراہ ڈاکٹر ادیب خمیدی نے اتوار کو صحافیوں کو بتایا تھا کہ کرونا وائرس کی وجہ سے چار مزید ڈاکٹرز انتقال کر گئے ہیں، اس سے جون میں وبا سے ہلاک ہونے والے ڈاکٹروں کی تعداد 30 ہو گئی ہے۔

انھوں نے مزید بتایا کہ انڈونیشیا کے سب سے زیادہ آبادی والے جزیرے جاوا کے قدوس ریجنسی میں 853 ڈاکٹر اس بیماری سے متاثر ہوئے تھے، جن میں سے 231 کا علاج ہوا جب کہ مشرقی جاوا میں کرونا وائرس سے متاثرہ پانچ کی حالت تشویش ناک تھی، جب کہ صوبے میں کم از کم 277 طبی عملے کے ارکان کرونا وائرس سے ہلاک ہو چکے ہیں۔

سرکاری اعداد و شمار کے مطابق 21 جون تک انڈونیشیا میں 14 لاکھ پانچ ہزار 320 طبی عملے کے ارکان کی ویکسینیشن ہو چکی ہے۔