Tag: انڈیا

واشنگٹن: امریکا کی بھارت نوازی ایک بار پھر سامنے آ گئی ہے، بھارت کو مذہبی آزادی پر تشویش والے ممالک میں شامل نہیں کیا گیا۔

تفصیلات کے مطابق مذہبی آزادی کی خلاف ورزی کرنے والے ممالک کی نئی فہرست جاری کر دی گئی ہے، امریکا نے بھارت کو مذہبی آزادی پر تشویش والے ممالک میں شامل نہیں کیا، بھارت کا نام واچ لسٹ میں بھی شامل نہیں کیا گیا۔

دوسری طرف پاکستان، چین، سعودیہ عرب اور ایران کو سب سے زیادہ خدشات والے ممالک میں شامل کر دیا گیا ہے، جب کہ برما، اریٹیریا، شمالی کوریا، تاجکستان، اور ترکمانستان بھی خدشات والے ممالک میں شامل کیے گئے ہیں۔ روس، ازبکستان، نائجیریا اور کیوبا کو اسپیشل واچ لسٹ میں شامل کیا گیا ہے۔

امریکی وزیر خارجہ مائیک پومپیو نے کہا ہے کہ مذہبی آزادی امریکی محکمہ خارجہ کی اوّلین ترجیح ہے، دنیا بھر میں مذہبی آزادی کے لیے اپنی مہم جاری رکھیں گے، ہر شخص کو مذہب کے حوالے سے مکمل آزادی ہونی چاہیے۔

خیال رہے کہ بھارت کی مودی سرکار نے مسلمان مخالف شہریت کا متنازع قانون پاس کر لیا ہے، جس کے بعد بھارت میں پر تشدد مظاہروں کا سلسلہ شروع ہو گیا ہے، ریاستی پولیس مظاہرین پر بد ترین تشدد کا مظاہرہ کر رہی ہے۔

اس سے قبل وادیٔ جموں و کشمیر کی خصوصی حیثیت کا خاتمہ کر کے مودی سرکار نے لاکھوں کشمیری مسلمانوں کو کرفیو اور لاک ڈاؤن کے ذریعے محصور بنا کر بنیادی حقوق سے محروم کر دیا ہے۔

واشنگٹن: مقبوضہ کشمیر پر امریکی کانگریس کے لیڈرز کی تنقید کے بعد مودی سرکار بوکھلاہٹ کا شکار ہو گئی ہے، جس کے باعث اسے امریکی کانگریس کمیٹی کے سلسلے میں شرمندگی اٹھانی پڑ گئی ہے۔

تفصیلات کے مطابق واشنگٹن پوسٹ نے خبر دی ہے کہ مودی سرکار نے کشمیر کی صورت حال پر تنقید کرنے والے رکن کانگریس کو نکالنے کا مطالبہ کیا تھا، تاہم امریکی کانگریس کے اراکین نے کسی رکن کو کانگریس کمیٹی سے نکالنے سے انکار کر دیا۔

اس صورت حال کا سامنا نہ کر سکنے والے بھارتی وزیر خارجہ سبرا منیم جے شنکر نے گھبراہٹ میں سینئر کانگریس ارکان سے ملاقات ہی منسوخ کر دی۔

واشنگٹن پوسٹ کا کہنا ہے کہ بھارت نے کانگریس رکن پرامیلا جیا پال کو دورہ مقبوضہ کشمیر سے بھی روک دیا تھا۔ بھارت نے کشمیر میں انٹرنیٹ اور موبائل سروسز معطل کر رکھی ہے۔

یہ بھی پڑھیں:  بھارتی خاتون نے امریکی ایوان میں مقبوضہ کشمیر پر بل پیش کر دیا

کانگریس رکن پرامیلا جیا پال نے رد عمل میں کہا ہے کہ مقبوضہ کشمیر پر قرارداد جلد پیش کروں گی، ثابت ہو گیا ہے کہ مودی سرکار مخالف آواز سننے کا حوصلہ نہیں رکھتی۔

یاد رہے کہ 8 دسمبر کو امریکی ایوان نمایندگان میں بھارتی نژاد خاتون رکن پرامیلا جیا پال نے ایوان میں مقبوضہ کشمیر میں جاری بھارتی مظالم پر ایک بل پیش کیا تھا، جس میں مطالبہ کیا گیا تھا کہ بھارت مقبوضہ کشمیر میں مواصلات کی بندش اور نظر بندیاں فوری طور پر ختم کرے۔

نئی دہلی: بھارت میں شہریت کے متنازع قانون کے خلاف احتجاج میں دن بہ دن شدت آتی جا رہی ہے، منگلور اور لکھنؤ میں پولیس نے مظاہرین پر فائرنگ کھول دی، جس سے تین افراد ہلاک ہو گئے۔

تفصیلات کے مطابق شہریت کے متنازع قانون کے خلاف دہلی، ممبئی، لکھنؤ، مدھیہ پردیش سمیت دیگر علاقوں میں مظاہرے جاری ہیں، بھارتی میڈیا کا کہنا ہےکہ پولیس کی فائرنگ اور تشدد سے منگلور اور لکھنؤ میں 3 افراد جان سے ہاتھ دھو بیٹھے، مظاہرین نے بھی پولیس پر شدید پتھراؤ کیا اور موٹر سائیکل اور گاڑیاں جلا دیں۔

بھارتی میڈیا کا کہنا ہے کہ بھارت میں ملک گیر احتجاج میں اب تک 8 افراد ہلاک ہو چکے ہیں۔

یہ بھی پڑھیں:  مودی نے پاکستان کے خلاف پھر زبانی جنگ شروع کر دی: مشہور بھارتی پروفیسر

بھارتی میڈیا کے مطابق ممبئی میں ہونے والے مظاہرے میں 30 ہزار افراد نے شرکت کی، منگلور میں کرفیو لگا دیا گیا ہے، دہلی ہریانہ روڈ بند کر دی گئی، پولیس نے 100 سے زائد افراد کو گرفتار کر لیا، بھارتی رائٹر رام چندراگو کو بھی گرفتار کیا جا چکا ہے۔

شہریت کے متنازع قانون کے خلاف صرف بھارت کے اندر ہی احتجاج نہیں کیا جا رہا ہے، ادھر واشنگٹن میں بھارتی سفارت خانے کے باہر بھارتی طالب علموں نے مظاہرہ کیا، جس میں مظاہرین نے شہریت کا متنازع قانون منسوخ کرنے کا مطالبہ کیا، مظاہرین نے گاندھی کے مجسمے پر پوسٹر لگا دیا اور مودی حکومت کے خلاف نعرے بازی کی۔