Tag: انڈیا

مودی سرکار کی انتہا پسند پالیسیوں سے بھارتی معیشت بیٹھ گئی

نئی دہلی: انتہا پسند اور جنگی جنون میں مبتلا مودی سرکار کی حکومت میں بھارت کی معیشت بیٹھ گئی، مودی سرکار کی پالیسیوں سے بھارت تیزی سے ابھرتی معیشت کا اعزاز کھو بیٹھا اور شرح نمو کم ترین سطح پر آگئی۔

تفصیلات کے مطابق بھارتی معیشت کی شرح نمو 6 سال کی کم ترین سطح پر آگئی، جولائی تا ستمبر بھارتی معاشی شرح نمو ساڑھے 4 فیصد رہی۔

رپورٹ کے مطابق گزشتہ سال جولائی تا ستمبر بھارتی معیشت کی شرح نمو 7 فیصد تھی، رواں سال اپریل سے جون 2019 میں بھارت شرح نمو 5 فیصد تھی۔

اسی طرح بھارت میں بے روزگاری کی شرح بھی 40 سال کی بلند ترین سطح پر آگئی۔ آٹو سیکٹر میں بھی بے انتہا سست روی اور صارفین کی قوت خرید میں نمایاں کمی دیکھی گئی۔

کچھ عرصہ قبل بھارتی ماہر معاشیات پروفیسر ارون کمار نے بی بی سی میں شائع اپنے ایک کالم میں لکھا کہ 15 ماہ قبل بھارت کی معیشت 8 فیصد کی رفتار سے ترقی کر رہی تھی جو اب نصف ہوچکی ہے۔

ان کے مطابق بھارت میں چاروں طرف سے معاشی سست رفتاری کی اطلاعات موصول ہو رہی ہیں۔ لدھیانہ میں سائیکلوں اور آگرہ میں جوتے جیسی صنعتوں سے وابستہ غیر منظم شعبے بڑی تعداد میں بند ہو چکے ہیں۔

پروفیسر ارون کمار کے مطابق 3 برسوں میں بھارتی معیشت کو تین بڑے جھٹکے لگے ہیں جس کی وجہ سے بے روزگاری میں اضافہ ہوا ہے۔ اعداد و شمار بتاتے ہیں کہ ملک میں ملازمین کی تعداد 45 کروڑ تھی جو کم ہو کر 41 کروڑ رہ گئی ہے۔

نومبر 30, 2019
بھارت نے خطے کا امن داؤ پر لگانے کے لیے ایک اور مذموم قدم اٹھا لیا

نئی دہلی: جنگی جنون میں مبتلا بھارت خطے کے امن کو داؤ پر لگانے کے درپے ہے، بھارتی فوج نے راجستھان میں جنگی مشقیں کرنے کا فیصلہ کر لیا ہے۔

تفصیلات کے مطابق جنگی جنون کے شکار پڑوسی ملک بھارت نے خطے کا امن داؤ پر لگانے کے لیے راجھستان میں فوجی مشقیں کرنے کا فیصلہ کر لیا ہے، ان مشقوں میں 40 ہزار سے زائد فوجی حصہ لیں گے۔

بھارتی میڈیا کے مطابق راجستھان میں ہونے والی مشقوں میں بھارتی فوج کا اسٹرائیک کور حصہ لے گا، مشقوں میں حریف کے علاقے میں آپریشن کی صلاحیتوں کو جانچا جائے گا اور فضائی اور زمینی جنگی صلاحیتوں کو پرکھا جائے گا۔

تازہ ترین: بھارت نے ایل اوسی پر اسرائیلی میزائل نصب کردئیے

بھارتی میڈیا کے مطابق ان جنگی مشقوں میں چالیس ہزار سے زائد فوجی حصہ لیں گے، مشقیں 28 نومبرسے 4 دسمبر تک جاری رہیں گی، 2015 کے بعد یہ سب سے بڑی بھارتی جنگی مشقیں ہیں۔

واضح رہے کہ جنگی جنون میں مبتلا بھارت نے ایل او سی پر بھی اینٹی ٹینک گائیڈڈ میزائل نصب کر دیے ہیں، یہ میزائل پاکستان کے خلاف استعمال کیے جا سکتے ہیں۔ اطلاعات کے مطابق یہ میزائل اسرائیلی ساختہ ہیں۔

ذرائع کا یہ بھی کہنا تھا کہ بھارت نے اسرائیل سے خریدے گئے 240 میزائل اور 12 لانچر وصول کر لیے ہیں۔

نومبر 27, 2019
جاسوسی کے لیے پاکستان میں داخل ہونے والے 2 بھارتی گرفتار

بہاولپور: جاسوسی کے لیے پاکستان میں داخل ہونے والے 2 بھارتیوں کو چولستان سے گرفتار کر لیا گیا ہے۔

تفصیلات کے مطابق ضلع بہاولپور کے شہر یزمان کے ایک علاقے سے 2 بھارتی باشندے گرفتار کر لیے گئے ہیں، پولیس نے غیر ملکیوں کے خلاف مقدمہ درج کر لیا۔

گرفتار شدہ بھارتی شہریوں میں پرشانت وائندم ولد بابو راؤ اور وری لعل ولد صوبی لعل شامل ہیں، پولیس کا کہنا ہے کہ دونوں بھارتی باشندوں کے خلاف ایل اوسی کی خلاف وزری کا مقدمہ درج کیا گیا ہے۔ پرشانت کا تعلق بھارتی شہر حیدر آباد جب کہ وری لال کا تعلق ریاست مدھیہ پردیش سے ہے۔

ایف آئی آر کے متن میں لکھا گیا ہے کہ دونوں بھارتی شہری بغیر دستاویز اور پاسپورٹ پاکستان میں آئے، بھارتی شہریوں نے لائن آف کنٹرول کی خلاف ورزی کی اور غیر قانونی طور پر پاکستان میں داخل ہوئے۔

یہ بھی پڑھیں: پاکستان میں دس سال سے مقیم بھارتی شہری پکڑا گیا

پولیس کی جانب سے ملزمان کو آج عدالت میں پیش کیا گیا جہاں پرشانت اور دری لعل کا راہداری ریمانڈ منظور ہونے کے بعد انھیں ایف آئی اے ملتان کے حوالے کر دیا گیا۔

یاد رہے کہ رواں برس 2 اگست کو بھی گوجرانوالہ سے ایک بھارتی شہری پنجم تیواری کو گرفتار کیا گیا تھا، اس کے بارے میں انکشاف ہوا کہ وہ دس سال سے پاکستان میں غیر قانونی طور پر مقیم ہے، پنجم تیواری نے مسلمان ہونے کا دعویٰ بھی کیا تھا۔ اس نے ایک بیان میں کہا کہ وہ بہ طور مسلمان پاکستان میں زندگی گزارنا چاہتا ہے۔

نومبر 18, 2019
بھارت کا ایک اور جنگی طیارہ خود کو فضا میں برقرار نہ رکھ کر زمیں بوس ہو گیا

نئی دہلی: پڑوسی ملک بھارت کا ایک اور جنگی طیارہ خود کو فضا میں برقرار نہ رکھ کر زمیں بوس ہو گیا ہے۔

تفصیلات کے مطابق بھارت کا جنگی طیارہ مگ 29 ٹریننگ کے دوران گوا میں گر کر تباہ ہو گیا، طیارے میں موجود دونوں پائلٹ جان بچانے میں کام یاب رہے۔

بھارتی میڈیا کی رپورٹس کے مطابق طیارے کے انجن میں آگ لگ گئی تھی جس کے باعث وہ گر کر تباہ ہوا، تاہم طیارہ اڑانے والے دونوں پائلٹس بروقت چھلانگ لگا کر بچ گئے۔

اطلاعات کے مطابق بھارتی طیارے نے جیسے ہی تربیتی اڑان بھری، کچھ ہی دیر میں گر کر تباہ ہو گیا، پائلٹس خود کو بروقت نکالنے میں کامیاب ہوئے۔ انڈین نیوی کے مطابق طیارے کے دائیں انجن سے ایک پرندہ ٹکرا گیا تھا جس کے باعث انجن میں آگ بھڑک اٹھی۔

یہ بھی پڑھیں: بھارت میں تربیتی طیارہ گر کر تباہ، 2 پائلٹ ہلاک

طیارہ کھلی اور محفوظ جگہ گرنے کے باعث کوئی جانی نقصان نہیں ہوا، ڈیفنس منسٹر راجناتھ سنگھ نے ایک ٹویٹ کے ذریعے کہا کہ ہمیں خوشی ہوئی کہ دونوں پائلٹس نے خود کو محفوظ رکھا، میں ان کی صحت کے لیے دعاگو ہوں۔

یاد رہے کہ 25 ستمبر کو بھی ایک بھارتی مگ 21 جنگی طیارہ شہر گوالیار میں گر کر تباہ ہو گیا تھا، اس حادثے میں بھی دونوں پائلٹ محفوظ رہے تھے۔ 8 اگست کو آسام کے علاقے تیز پور سے اڑنے والا لڑاکا طیارہ اچانک گر کر تباہ ہوا تھا جس کے نتیجے میں دونوں پائلٹ شدید زخمی ہو گئے تھے۔ پھر 27 اگست کو بھی بھارتی ریاست اترپردیش میں تربیتی طیارہ گر کر تباہ ہوگیا تھا، طیارے میں چھ مسافر سوار تھے جنھیں انتظامیہ نے محفوظ قرار دے دیا تھا۔

ابھی گزشتہ ماہ 6 اکتوبر کو بھی بھارتی ریاست تلنگانہ میں ایک اور تربیتی طیارہ گر کر تباہ ہو گیا تھا جس کے نتیجے میں 2 پائلٹ ہلاک ہو گئے تھے۔

نومبر 16, 2019
مقبوضہ کشمیر سے متعلق بھارت کی ایک اور گھناؤنی سازش سامنے آگئی

نئی دہلی: بھارت کی ایک اور گھناؤنی سازش سامنے آ گئی ہے، بھارت نے اب باضابطہ طور پر جموں و کشمیر کو الگ وفاقی یونٹ بنانے کا فیصلہ کر لیا ہے۔

تفصیلات کے مطابق غیر ملکی خبر رساں ایجنسی نے کہا ہے کہ بھارت مقبوضہ کشمیر پر گرفت کی مضبوطی چاہتا ہے، بھارت نے گزشتہ 3 ماہ سے کشمیر میں کرفیو لگا رکھا ہے، اب اس نے اسے الگ وفاقی یونٹ بنانے کا فیصلہ کر لیا ہے۔

خبر رساں ایجنسی کا کہنا ہے کہ بھارت نے پابندیوں کے ساتھ ساتھ اضافی فوجی بھیج رکھے ہیں، جب کہ مقبوضہ کشمیر میں پہلے ہی 9 لاکھ فوجی تعینات ہیں۔ اب مقبوضہ علاقے میں بھارتی حکومت کی جانب سے لیفٹیننٹ گورنرز کی تقرری عمل میں لائی گئی ہے۔

یہ بھی پڑھیں: آج 87 واں روز، کرفیو اور لاک ڈاؤن برقرار

خبر میں بتایا گیا ہے کہ گجرات کا جی سی مرمو جموں و کشمیر کے پہلے لیفٹیننٹ گورنر کا حلف اٹھائے گا، جی سی مرمو کا تعلق مودی کی ریاست گجرات سے ہے، جب کہ لداخ میں رادھا کشن لیفٹیننٹ گورنر کے پہلے عہدے کا حلف اٹھائے گا۔

واضح رہے کہ پانچ اگست کو مودی سرکاری کی جانب سے آرٹیکل 370 اے منسوخ کر کے جموں و کشمیر کی خصوصی حیثیت کا خاتمہ کر دیا گیا تھا، جس کے بعد بھارت نے وادی میں کرفیو لگا کر کشمیریوں پر مظالم کا ایک نیا انسانیت سوز سلسلہ شروع کیا، اس کرفیو کو آج 87 دن ہو چکے ہیں۔

وادی میں اسکول، کالجز اور تجارتی مراکز بند پڑے ہیں، ذرایع نقل و حمل اور ہر طرح کے مواصلاتی رابطے منقطع ہیں، کشمیری گھروں میں محصور ہو کر رہ گئے ہیں، ہزاروں کشمیریوں کو گرفتار کر کے لاپتا کیا جا چکا ہے۔

اکتوبر 30, 2019
مقبوضہ کشمیر: نوجوانوں پر نئے طریقوں سے بدترین ظلم کا انکشاف

سری نگر: مقبوضہ کشمیر میں ظلم و بربریت، خوف اور دھمکیوں کی کہانی جاری ہے، بھارتی صحافی اشوک سوائین مزید چشم کشا حقائق سامنے لے آئے۔

تفصیلات کے مطابق اشوک سوائین نے اخبار دی ہندو میں رپورٹ دی ہے کہ مقبوضہ کشمیر میں چھاپوں اور گرفتاریوں کا سلسلہ بدستور جاری ہے، جوانوں، بزرگوں، بچوں پر تشدد اور گرفتاریاں روز کا معمول بن گئی ہیں۔

رپورٹ میں کہا گیا ہے کہ بھارتی فوجی نہتے کشمیریوں کو دھمکیاں بھی دے رہے ہیں، اگر کسی نے بھی میڈیا سے بات کی تو اس کا برا حشر کیا جائے گا، بھارتی سرکار نے عوام سے تشدد اور بربریت کی شکایت کا حق بھی چھین لیا، کشمیری عوام کو میڈیا سے دور رکھنے کے لیے دھمکیاں دی جا رہی ہیں۔

رپورٹ کے مطابق جنوبی کشمیر میں وامہ، شوپیاں کے عوام بھارتی فوج کا نشانہ ہیں، شمالی کشمیر میں باندی پورا، سوپور میں بھی صورت حال مختلف نہیں، تشدد اور دباؤ کے نت نئے طریقے متعارف کرائے جا رہے ہیں، شوپیاں میں گرفتار 26 سالہ نوجوان کو جیپ سے باندھ کر گھسیٹا گیا، راشٹریہ رائفل کیمپ میں نوجوان کو برہنہ کر کے یخ بستہ پانی میں غوطے دیے گئے، اس کے بعد اسے ایک بد بودار سیال مادہ پینے پر بھی مجبور کیا گیا۔

اشوک سوائن نے رپورٹ میں لکھا ایک نوجوان کو بجلی کے کھمبے سے باندھا گیا، نوجوان کو تشدد کے ساتھ کرنٹ بھی لگایا جاتا رہا، چیل پورہ، ترن کے علاقوں میں بھی ایسی کہانیاں عام ہیں، دوسری طرف لوگوں نے خوف کے مارے اپنے لب سی رکھے ہیں، پنجورا نامی گاؤں میں لوگوں کو جنسی تشدد کا نشانہ بنایا گیا، لوگ ذہنی مریض بن رہے ہیں۔

رپورٹ میں انکشاف کیا گیا ہے کہ پلواما میں تاجر بھی میڈیا سے بات کرنے سے ڈرتے ہیں، ہمیں بھی دھمکی دی گئی کہ اگر میڈیا سے بات کی تو تمھارے بچوں کو ہزار کلو میٹر دور عقوبت خانوں میں بھیج دیا جائے گا، تاجروں نے کہا کہ یہ دھمکیاں پبلک سیفٹی جیسے ڈریکونئین قانون کے نام پر دی جاتی ہیں، پبلک سیفٹی ایکٹ کے تحت مقدمہ چلائے بغیر 6 ماہ سے 2 سال قید رکھا جا سکتا ہے۔

اشوک سوائن کے مطابق نئی دہلی نے اپنے انڈر کور ایجنٹ علاقے میں داخل کر دیے ہیں، کشمیری عوام بھارتی ایجنٹس کے ڈر سے سیاست پر بات ہی نہیں کر سکتے۔

اکتوبر 20, 2019
مقبوضہ کشمیر میں 66 ویں روز بھی کرفیو

سری نگر: مودی حکومت کی جانب سے آرٹیکل 370 اے ختم کرنے کے بعد مقبوضہ کشمیر میں 66 ویں روز بھی کرفیو جاری ہے، وادی میں موبائل فون، انٹرنیٹ سروس بند اور ٹی وی نشریات پوری طرح معطل ہیں۔

تفصیلات کے مطابق مقبوضہ کشمیر میں آج مسلسل 66 ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بھی بند کر رکھی ہے جب کہ ذرائع ابلاغ پر سخت پابندیاں عائد ہیں۔

کشمیر میڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث کشمیریوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔

کشمیر میڈیا سروس کا یہ بھی کہنا ہے وادی میں کرفیو کے باعث 3 ہزار 9 سو کروڑ کا نقصان ہو چکا ہے، وادی میں کھانا میسر ہے اور نہ ہی دوائیں۔ سرینگر اسپتال انتظامیہ کے مطابق کرفیو کے باعث روزانہ 6 مریض لقمہ اجل بن رہے ہیں۔

یاد رہے کہ 5 اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کر دیا تھا۔

راجیہ سبھا میں بل کے حق میں 125 جب کہ مخالفت میں 61 ووٹ آئے تھے، بھارت نے 6 اگست کو لوک سبھا سے بھی دونوں بل بھاری اکثریت کے ساتھ منظور کرا لیے تھے۔

اکتوبر 9, 2019
خالصتان تحریک کے پیچھے پاکستان کا ہاتھ نہیں: برطانوی حکومت کی رپورٹ

لندن: شدت پسندی کے خلاف برطانوی حکومت کی کمیشن کی رپورٹ جاری کر دی گئی، رپورٹ میں کہا گیا ہے کہ بھارت کے اندر خالصتان تحریک کے پیچھے پاکستان کا ہاتھ نہیں ہے۔

برطانوی حکومت کی رپورٹ میں واضح طور پر کہا گیا ہے کہ سکھ بھارتی پالیسیوں سے ناراض ہیں، بھارت نے خالصتان تحریک کو دہشت گرد قرار دیا جس پر سکھ ناراض ہوئے، برطانیہ میں مقیم ہندوؤں اور سکھوں کے درمیان بھی تناؤ موجود ہے۔

کمیشن کی رپورٹ میں کہا گیا ہے کہ اوورسیز سکھ کمیونٹی اپنی شناخت سے متعلق زیادہ حساس ہیں، وہ خالصتان تحریک کے حوالے سے سرگرمیوں میں بڑھ چڑھ کر حصہ لیتے ہیں۔

کمیشن کا یہ بھی کہنا ہے کہ گولڈن ٹیمپل حملے کے بعد سے خالصتان کے مطالبے میں شدت آئی ہے، بھارتی حکومت اور میڈیا کا رویہ بھی سکھ علیحدگی پسندی کو ہوا دے رہا ہے۔

یہ بھی پڑھیں: کرتارپور راہداری کی تقریب، پاکستان کا من موہن سنگھ کو دعوت دینے کا فیصلہ

کمیشن رپورٹ میں ایک سروے بھی شامل کیا گیا ہے، جس کے مطابق سکھوں کی اکثریت اب الگ ملک کا قیام چاہتی ہے۔

واضح رہے کہ بھارتی حکومت کی جانب سے پاکستان پر الزام لگایا جاتا رہا ہے کہ پاکستان خالصتان علیحدگی پسند تحریک کو ہوا دے رہا ہے۔

دوسری طرف پاکستان کی جانب سے بہترین ڈپلومیسی کے تحت کرتارپور راہداری کھولی گئی تاکہ انڈیا کے سکھ اپنے مقدس مقام کی زیارت کے لیے آسانی سے آ سکیں، اس سلسلے میں سکھوں کے لیے بہترین انتظامات بھی کیے گئے ہیں۔

اکتوبر 8, 2019
ناگالینڈ علیحدگی پسند تنظیم نے کشمیر کی خصوصی حیثیت ختم کرنے کو مسترد کر دیا

ناگالینڈ: بھارت کی شمال مشرقی ریاست کی علیحدگی پسند تنظیم نے بھی کشمیر کی خصوصی حیثیت ختم کرنے کے بھارتی اقدام کو مسترد کر دیا ہے۔

تفصیلات کے مطابق ناگالینڈ کی علیحدگی پسند تنظیم کے رہنما ازاک موویہ نے غیر ملکی میڈیا سے گفتگو کرتے ہوئے مقبوضہ کشمیر کے سلسلے میں بھارتی اقدام کو مسترد کر دیا۔

ازاک موویہ نے کہا کہ آرٹیکل 370 کا خاتمہ کشمیر کی حیثیت کے خلاف کیا گیا ہے، آرٹیکل کے خاتمے کو ہم مسترد کرتے ہیں۔

علیحدگی پسند تنظیم کے رہنما نے کہا مودی حکومت کا یہ اقدام کشمیری قوم کے ساتھ دھوکا ہے، ناگالینڈ کو بھی بھارتی آئین کے تحت خصوصی حیثیت حاصل ہے، خدشہ ہے بھارتی حکومت کا اگلا قدم ناگالینڈ ہوگا۔

تازہ ترین: مقبوضہ کشمیر میں کرفیو کا 63 واں روز

نیشنل سوشلسٹ کونسل آف ناگالم شمال مشرقی انڈیا کی سب سے بڑی باغی علیحدگی پسند تنظیم ہے، جس کے ارکان گزشتہ چار عشروں سے آزادی کے لیے لڑ رہے ہیں۔

واضح رہے کہ مقبوضہ کشمیر کی خود مختار حیثیت ختم کرنے پر ناگالینڈ کے حریت پسندوں نے اعلان آزادی کر دیا تھا، الگ دارالحکومت بنا کر قومی پرچم اور ترانہ بھی جاری کر دیا تھا۔

ناگالینڈ حکومت کا کہنا تھا کہ ناگالینڈ اب ایک آزاد ملک ہے جس پر بھارت نے زبردستی قبضہ کر رکھا تھا اور ناگالینڈ نے کبھی بھی بھارت کے ساتھ الحاق نہیں چاہا تھا۔

خیال رہے کہ بھارت نے 1947 میں ناگالینڈ پر زبردستی قبضہ جما لیا تھا، تب سے اب تک آزادی اور حقوق کی جدوجہد کے دوران بھارتی فوجی ناگا لینڈ کے ہزاروں لوگوں کو قتل کر چکے ہیں۔

اکتوبر 6, 2019
مقبوضہ کشمیر: بھارتی ویلفیئر پارٹی نے مودی سرکار کے مظالم کا پردہ چاک کر دیا

دہلی: مقبوضہ وادی کا دورہ کرنے والی بھارتی ویلفیئر پارٹی نے مودی سرکار کے مظالم سے پردہ اٹھا دیا.

تفصیلات کے مطابق بھارتی ویلفیئر پارٹی کے ترجمانوں نے اپنی پریس کانفرنس میں کہا ہے کہ مقبوضہ کشمیرمیں تینتالیس روز سے کرفیو نافذ ہے، وادی میں غذائی بحران شدید ہوگیا ہے.

پارٹی نے اپنے بیان میں کہا کہ چالیس ہزار کشمیری گرفتار کیا جاچکا ہے، بھارتی فیصلے پر وادی کے عوام شدید غم وغصے کا شکار ہیں، مودی سرکار پابندیاں ختم کرکےمذاکرات کرے.

یاد رہے کہ کشمیر میں ادویہ بھی نایاب ہوگئی ہیں، قابض بھارتی فوج نےمزید تین کشمیریوں کوشہید کردیا، گھروں میں محصورکشمیری جنازے میں بھی شریک نہ ہوسکے،مقبوضہ وادی کادورہ کرنےوالی بھارتی ویلفیئر پارٹی نےمظالم سےپردہ اٹھادیا.

مزید پڑھیں: بھارتی سپریم کورٹ کا مقبوضہ کشمیرمیں حالات ہرصورت معمول پرلانے کا حکم

خیال رہے کہ ۔ہیومن رائٹس واچ نے بھی گرفتارافراد کی فوری رہائی کامطالبہ کرتے ہوئے اسے بنیادی حقوق کے خلاف قرار دیا ہے۔

مودی سرکار نے 5 اگست کو غیر قانونی اقدام کرتے ہوئے مقبوضہ کشمیر کی خصوصی اہمیت ختم کر دی تھی، بھارت نے آرٹیکل 370 ختم کرتے ہوئے وادی میں کرفیو نافذ کر دیا۔

وادی میں ایک انسانی المیہ جنم لے چکا ہے، پاکستان نے اپنے کشمیروں بھائیوں کی بھرپور حمایت کا اعلان کیا ہے۔

ستمبر 16, 2019