ARYNews.tv | Urdu – Har Lamha Bakhabar

Tag: انڈیا

  • حکام کو گن پوائنٹ پر یرغمال بنا کر سڑک کی مرمت کروائی گئی

    حکام کو گن پوائنٹ پر یرغمال بنا کر سڑک کی مرمت کروائی گئی

    بھارت کے ایک گاؤں میں مقامی افراد نے خراب سڑک پہ ہونے والے حادثات سے تنگ آ کر حکام کو گن پوائنٹ پر یرغمال بنایا اور ان سے سڑک کی مرمت کروائی۔

    بھارتی میڈیا کے مطابق واقعہ بھارتی شہر گرو گرام سے ملحقہ ایک گاؤں نورنگ پور میں پیش آیا جو گروگرام کی مقامی انتظامیہ کے زیر اتنظام ہے۔

    گروگرام میٹرو پولیٹن ڈویلپمنٹ اتھارٹی کے سرکاری اہلکار ایک پرائیوٹ کنٹریکٹر کے ساتھ ایک اور قریبی سڑک کی تعمیر میں مصروف تھے جب 30 کے قریب گاؤں والے وہاں پہنچے اور سرکاری اہلکاروں کو گن پوائنٹ پر یرغمال بنا لیا۔

    اس کے بعد وہ انہیں اپنے گاؤں کے قریب لے گئے اور وہاں کی ٹوٹی ہوئی سڑک کی راتوں رات مرمت کروائی۔

    واقعے کے بعد پولیس نے 30 افراد پر مقدمہ درج کر کے انہیں گرفتار کرلیا، پولیس کا کہنا ہے کہ واقعے کا مرکزی کردار ہوشیار سنگھ نامی شخص ہے جو ایک پیٹرول پمپ کا مالک ہے اور وہ اپنے پمپ کے سامنے کی سڑک تعمیر کروانا چاہتا تھا۔

    تاہم ہوشیار سنگھ نے ان الزامات کی تردید کرتے ہوئے کہا ہے کہ گاؤں والے خستہ حال سڑک سے پریشان تھے، پچھلے چند ماہ میں ٹوٹی سڑک پر 20 کے قریب حادثات پیش آچکے ہیں۔

    ہوشیار سنگھ کا یہ بھی کہنا ہے کہ مقامی انتظامیہ کو بارہا سڑک تعمیر کرنے کی درخواست دی گئی لیکن انہوں نے توجہ نہیں دی۔

    پولیس کے مطابق واقعے کے ذمہ دار افراد نے سرکاری اہلکاروں پر تشدد بھی کیا ہے لہٰذا ان پر سنگین نوعیت کے چارجز عائد کیے گئے ہیں۔ مذکورہ افراد سرکاری مشینری کو اپنے ساتھ لے گئے اور اہلکاروں سے زبردستی کام کروایا۔

  • بالی ووڈ کی 70 فیصد فلمیں فلاپ، کیا بھارتی فلم انڈسٹری زوال پذیر ہورہی ہے؟

    بالی ووڈ کی 70 فیصد فلمیں فلاپ، کیا بھارتی فلم انڈسٹری زوال پذیر ہورہی ہے؟

    نئی دہلی: ایک طویل عرصے تک اپنا تسلط قائم رکھنے والا بالی ووڈ اب بحران کا شکار ہوگیا ہے جس کا ثبوت یہ ہے کہ رواں سال ریلیز ہونے والی 70 فیصد سے زائد فلمیں ناکام رہی ہیں۔

    برطانوی اخبار دی گارڈین کے رپورٹ کے مطابق رواں سال انڈین باکس آفس پر 77 فیصد ریلیز فلمیں فلاپ ہونے کے بعد سنیما ہالز بے حد خاموش ہیں اور کبھی نہ ختم ہونے والے بالی ووڈ کے تسلط کے مستقبل پر اب غیر یقینی کے بادل منڈلا رہے ہیں۔

    فلم انڈسٹری پر نظر رکھنے والے تجزیہ کار سومت کادل کا اس حوالے سے کہنا ہے کہ جہاں تک باکس آفس کا تعلق ہے، یہ سال ہندی فلم انڈسٹری کے لیے انتہائی خراب رہا۔

    انہوں نے کہا کہ صرف 3 یا 4 ہٹ فلمیں تھیں، جبکہ باقی سب کچھ تباہ ہو چکا ہے۔ انہوں نے کہا کہ یہ ایک ایسی صنعت کے لیے بہت بڑی تباہی ہے جو اپنی بقا کے لیے سال میں 10 کامیاب فلموں پر انحصار کرتی ہے۔

    سومت کادل کے مطابق گذشتہ دو یا تین دہائیوں میں یہ بالی وڈ کا بدترین دور ہے جس سے انڈسٹری گزر رہی ہے۔

    بالی وڈ کی حالیہ ناکامی کا ملبہ کرونا وبا پر ڈالا جا رہا ہے جس کے باعث پوری دنیا میں سنیما گھروں کو بحران کا سامنا کرنا پڑا۔

    وبا کے دوران چونکہ انڈیا کا عام طور پر سینما جانے والا ہجوم اپنے گھروں تک ہی محدود تھا، نیٹ فلکس، ایمیزون پرائم اور ہاٹ سٹار جیسے پلیٹ فارمز کی مقبولیت میں اضافہ ہوا۔

    یہ پلیٹ فارمز انڈیا کی ایک ارب 40 کروڑ آبادی کا ایک چوتھائی حصہ استعمال کرتا ہے۔ وہ فلمیں جو پہلے صرف سنیما گھروں میں قابل رسائی تھیں اب ان پلیٹ فارمز پر ملٹی پلیکس ٹکٹ کی قیمت کے ایک حصے میں دیکھی جا سکتی ہیں۔

    تجزیہ کار سومت کادل کے مطابق وبا کے بعد موجودہ حالات میں فلم بین صرف ایسی مووی کے لیے اتنی قیمت ادا کر کے سنیما گھروں کا رخ کرتے ہیں جس کے لیے وہ متجسس ہوں۔

    آن لائن پلیٹ فارمز پر فلمیں اور سیریز دیکھنے والے شائقین کی فلموں کے حوالے سے پسند میں بھی تنوع آیا ہے۔

    اب بالی وڈ کے بڑے ناموں والی فلموں اور انڈسٹری کے طویل عرصے سے قومی سنیما کے تصور کو بھی پیچھے چھوڑ دیا گیا۔

    سوشل میڈیا پر تبصروں کو دیکھ کر اب ہندی سینما کے ناظرین اپنے گھروں میں تامل (کولی وڈ)، تیلگو (ٹالی وڈ)، ملیالم، کنڑ (سندل وڈ) اور مراٹھی زبان کی فلمیں بھی دیکھ رہے ہیں۔

    صحافی و مصنف انا ایم ایم ویٹیکاد کے مطابق علاقائی سینما دیکھنے والے اب ہندی سینما کی یکسانیت سے اکتا چکے ہیں اور فلمیں بنانے والے اس بات کا بروقت احساس کرنے میں ناکام ہیں کہ شائقین کے پاس اب زیادہ آپشنز ہیں۔

  • نئی دہلی میں فضائی آلودگی میں خطرناک اضافہ

    نئی دہلی میں فضائی آلودگی میں خطرناک اضافہ

    نئی دہلی: بھارتی دارالحکومت نئی دہلی میں فضائی آلودگی میں ایک بار پھر تشویش ناک اضافہ ہونے گا، اس سے قبل بارش کی وجہ سے شہر کی فضا قدرے صاف تھی۔

    سینٹرل پولوشن کنٹرول بورڈ کے جاری کردہ ایئر بلیٹن کے مطابق گزشتہ روز دہلی کےعلاقے آنند وہار میں ہوا کا معیار 418 رہا، اس سے ایک دن قبل یعنی پیر کے روز اے کیو آئی 405 تھا۔

    اس سے قبل دہلی میں بارش کی وجہ سے ہوا کا معیار قدرے بہتر ہوا تھا۔ اتوار کی شام تقریباً 7 بجے اے کیو آئی 50 ریکارڈ کیا گیا جو کہ بہتر قرار دیا جاتا ہے۔

    محکمہ موسمیات کا کہنا ہے کہ 21 ستمبر سے دوبارہ ہوا کی رفتار میں اضافے کے ساتھ ہلکی بوندا باندی کا امکان ہے، اس کے ساتھ درجہ حرارت میں بھی کمی آئے گی۔ ایسی صورتحال میں آلودگی کی سطح بہتر یا تسلی بخش ہو سکتی ہے۔

    خیال رہے کہ اے کیو آئی اگر صفر سے 50 کے درمیان ہو تو اسے بہتر، 51 سے 100 ہو تو تسلی بخش، 101 سے 200 ہو تو معتدل، 201 سے 300 ہو تو خراب، 301 سے 400 ہو تو بہت زیادہ خراب، اور 401 سے 500 ہو تو اسے بدترین قرار دیا جاتا ہے۔

  • جیکولین فرنینڈس فراڈ کے ملزم سے شادی کرنا چاہتی تھیں

    جیکولین فرنینڈس فراڈ کے ملزم سے شادی کرنا چاہتی تھیں

    نئی دہلی: بالی ووڈ اداکارہ جیکولین فرنینڈس نے اپنے دوست سکیش چندر شیکھر سے متعلق نئے انکشافات کیے ہیں، سکیش 200 کروڑ روپے کی بھتہ خوری اور منی لانڈرنگ میں ملوث اور قید ہے۔

    بھارتی میڈیا کے مطابق 200 کروڑ روپے کی بھتہ خوری اور منی لانڈرنگ میں ملوث، تہاڑ جیل میں قید ملزم سکیش چندر شیکھر سے اپنے تعلق سے متعلق اداکارہ جیکولین فرنینڈس نے نئے انکشافات کیے ہیں۔

    منی لانڈرنگ کیس کے مرکزی ملزم سکیش کی منی لانڈرنگ میں مدد کرنے اور اس سے تحائف لینے کے الزام میں آج کل بھارتی اداکارائیں جیکولین فرنینڈس اور مشہور رقاصہ نورا فاتحی کو تفتیش کا سامنا ہے۔

    دہلی پولیس کے اقتصادی جرائم ونگ کی جانب سے دونوں اداکاراؤں سمیت بالی ووڈ کی مزید مشہور شخصیات سے بھی تفتیش کی جا رہی ہے۔

    اسپیشل کمشنر آف پولیس رویندر یادو نے میڈیا سے گفتگو کے دوران جیکولین کی جانب سے دیے گئے بیان سے متعلق بتایا ہے۔

    رویندر یادو نے بتایا ہے کہ تفتیش کے دوران اداکارہ جیکولین نے اعتراف کیا ہے کہ ان کے ملزم سکیش کے ساتھ تعلقات تھے، جیکولین سکیش سے متعلق کافی سنجیدہ تھیں اور اسے اپنے خوابوں کا شہزادہ سمجھتی تھیں، جیکولین کا سکیش چندر شیکھر سے شادی کا بھی ارادہ تھا۔

    دوسری جانب بھارتی میڈیا رپورٹس کے مطابق جیکولین فرنینڈس سکیش چندر شیکھر کے جرائم بے نقاب ہونے کے باوجود بھی مسلسل ان سے رابطے میں تھیں۔

    واضح رہے کہ گزشتہ روز رویندر یادو نے اس کیس سے متعلق کہا تھا کہ اداکارہ جیکولین کے لیے زیادہ پریشانی کی بات ہے کیونکہ اس نے سکیش کے مجرمانہ کردار کو جاننے کے بعد بھی اس سے تعلق نہیں توڑا مگر سکیش سے متعلق جب نورا کو شک ہوا کہ کچھ گڑبڑ ہے تو نورا نے خود ہی سے سکیش سے رابطہ ختم کر لیا تھا۔

  • لائیو ٹی وی رپورٹ کے دوران سڑک پر حادثہ، ویڈیو وائرل

    لائیو ٹی وی رپورٹ کے دوران سڑک پر حادثہ، ویڈیو وائرل

    بھارت میں بارش کے بعد خراب سڑکوں سے متعلق ایک ٹی وی رپورٹ کے دوران ہی سڑک پر حادثہ پیش آگیا اور ایک رکشہ الٹ گیا جو کیمرے میں ریکارڈ ہوگیا۔

    مذکورہ ویڈیو جو اب وائرل ہوچکی ہے، بھارتی ریاست اتر پردیش کی ہے، ویڈیو دراصل ایک ٹی وی رپورٹ ہے جس میں ایک صحافی، ایک راہ گیر سے سڑکوں کی حالت کے بارے میں دریافت کر رہا ہے۔

    راہ گیر اپنے پیچھے سڑک کے بارے میں بتا رہا ہے کہ اس کی خستہ حالی کی وجہ سے آئے روز یہاں حادثات ہوتے رہتے ہیں، حکام سے کئی بار اس کی مرمت کے لیے کہا جاچکا ہے لیکن تاحال اس سڑک کی حالت جوں کی توں ہے۔

    رپورٹ کے دوران ہی پیچھے سے گزرتا ایک رکشہ اچانک دھماکے سے الٹ جاتا ہے جس پر راہ گیر پیچھے پلٹتے ہوئے کہتا ہے، یہ دیکھیئے۔

    ایک اور ویڈیو میں دیکھا جاسکتا ہے کہ آس پاس موجود لوگ فوری طور پر رکشے کی طرف بھاگتے ہیں اور اسے سیدھا کر کے اندر موجود لوگوں کو نکالنے کی کوشش کرتے ہیں۔

  • بھارت میں دلت بہنوں کا ریپ اور قتل، 6 افراد گرفتار

    بھارت میں دلت بہنوں کا ریپ اور قتل، 6 افراد گرفتار

    نئی دہلی: بھارت میں 2 دلت لڑکیوں کو زیادتی کے بعد قتل کردینے اور ان کی لاشیں درخت سے لٹکا دینے کے بعد ایک بار پھر احتجاج کا سلسلہ جاری ہے، پولیس نے اب تک 6 افراد کو گرفتار کیا ہے۔

    بھارتی میڈیا کے مطابق ریاست اتر پردیش میں نچلی ذات سے تعلق رکھنے والی 2 لڑکیوں کے ریپ اور قتل کے الزام میں 6 افراد کو گرفتار کیا گیا ہے۔

    ریاستی حکام کا کہنا ہے کہ ان دو دلت لڑکیوں کی لاشیں درخت سے لٹکی ہوئی ملی تھیں۔

    مقامی پولیس کے مطابق 15 اور 17 سالہ دو لڑکیوں کی لاشیں بھارت کی سب سے زیادہ گنجان آباد ریاست اتر پردیش کے ضلع لکھم پور کھیری سے ملی ہیں۔

    مقامی پولیس کے عہدے دار سنجیو سمن نے بتایا کہ ملزمان میں سے چار افراد لڑکیوں کو جھانسہ دے کر کھیتوں میں لے گئے اور وہاں ان کے ساتھ جنسی زیادتی کی۔

    سنجیو کے مطابق واقعے کی تفصیلی تحقیقات جاری ہیں تاہم ابتدائی تحقیقات سے پتا چلا ہے کہ لڑکیوں کو گلا گھونٹ کر قتل کرنے کے بعد ان کے ڈوپٹوں کے ساتھ انہیں درخت سے لٹکا دیا گیا۔

    بھارت میں ابھی تک ذات پات کا نظام قائم ہے اور بالخصوص کمتر سمجھی جانے والی ذاتوں کی خواتین پر تشدد کے واقعات معمول بن چکے ہیں۔

    دوسری جانب مقتولہ لڑکیوں کے خاندانوں نے مقامی ذرائع ابلاغ کو بتایا کہ ان لڑکیوں کو موٹر سائیکل سواروں نے اغوا کیا، اس کے بعد ان کا ریپ کر کے انہیں قتل کر دیا۔

    اتر پردیش کے نائب وزیر اعلیٰ براجیش پاتھک نے کہا ہے کہ حکومت متاثرہ خاندانوں کو انصاف کی فراہمی کو یقینی بنائے گی۔

    انہوں نے کہا کہ ہماری حکومت اس قسم کے واقعات کو بہت سنجیدہ لیتی ہے، ہم قانون کے مطابق سخت ترین ایکشن لیں گے۔

  • بچے کو بچانے کے لیے ہہادر ماں خونخوار شیر سے گتھم گتھا ہوگئی

    بچے کو بچانے کے لیے ہہادر ماں خونخوار شیر سے گتھم گتھا ہوگئی

    نئی دہلی: ہر ماں اپنے بچے کو مشکل سے بچانے کے لیے دنیا کے ہر خطرے سے لڑ جاتی ہے، ایسی ہی ایک ماں نے اپنے بچے کو شیر کے جبڑوں سے بھی چھڑا لیا۔

    بھارتی میڈیا کے مطابق بھارت کے شہر نئی دہلی میں بہادر ماں اپنے بچے کو شیر کے جبڑے سے بچانے کے لیے نہتی لڑ پڑی اور اپنے بیٹے کو شیر کے چنگل سے چھڑا لیا لیکن اس کوشش میں وہ خود بھی زخمی ہوگئی۔

    یہ واقعہ اس وقت پیش آیا جب ارچنا چوہدری نامی خاتون اپنے 15 ماہ کے بیٹے کے ساتھ بھارتی ریاست مدھیا پردیش کے گاؤں میں گھر کے قریب رفع حاجت کے لیے جارہی تھیں۔

    مقامی عہدیدار سنجویو شریواستو نے مقامی میڈیا کو بتایا کہ شیر قریبی بندھو گڑھ ٹائیگر ریزرو سے بھٹک کر یہاں پہنچا تھا، جس کے بعد اس نے بچے پر حملہ کردیا، شیر نے اپنے جبڑے سے بچے کے سر پر حملہ کیا تھا۔

    ماں یہ دیکھ کر لمحے بھر کو تو ساکت رہ گئی لیکن پھر اس نے فوراً اپنے آپ کو سنبھالتے ہوئے بیٹے کو شیر سے بچانے کی کوشش کی، تب شیر نے ان پر بھی حملہ کردیا۔

    ماں کی چیخ و پکار سننے پر گاؤں والے جمع ہوگئے اور ماں اور بچے کو بچانے کی کوشش کی، ہجوم کو دیکھ کر شیر جنگل کی جانب فرار ہوگیا۔

    سنجویو شریواستو کا کہنا ہے کہ خاتون کو اسپتال منتقل کردیا گیا ہے، ماں اور بچے کی حالت اب خطرے سے باہر ہے۔

    حکام کی جانب سے علاقے کا سرچ آپریشن کیا جارہا ہے جبکہ مقامی شہریوں کو ہدایت کی گئی ہے کہ وہ رات کے وقت گھر سے باہر نہ نکلیں۔

  • گووندا نے شاہ رخ کو خود سے بہتر اداکار قرار دے دیا

    گووندا نے شاہ رخ کو خود سے بہتر اداکار قرار دے دیا

    معروف بھارتی اداکار گووندا نے کنگ خان شاہ رخ کی تعریفوں کے پل باندھ دیے، انہوں نے کہا کہ شاہ رخ نے فلم انڈسٹری کے ماحول اور چیزوں کے بارے میں بہت کم عمری میں سمجھنا شروع کیا، جو کہ میرے جیسا اداکار بھی نہیں کر پایا۔

    بھارتی میڈیا کے مطابق بالی ووڈ کے سینیئر اداکار اور کئی سنجیدہ اور کامیڈی فلموں سے شہرت حاصل کرنے والے گووندا کا کہنا ہے کہ شاہ رخ خان فلم انڈسٹری کے سمجھدار ترین اداکار ہیں اور وہ ہمیشہ بالکل درست فیصلے کرتے ہیں، وہ بہت پڑھے لکھے آدمی ہیں۔

    معروف کامیڈین شو کپل شرما کے ایک پرانے شو میں کپل سے گفتگو کے دوران انہوں نے کہا کہ شاہ رخ نے سب سے پہلے پیار اپنے آپ سے کیا۔

    گووندا کے مطابق شاہ رخ نے فلم انڈسٹری کے ماحول اور چیزوں کے بارے میں بہت کم عمری میں سمجھنا شروع کیا، جو کہ میرے جیسا اداکار بھی نہیں کر پایا۔

    گووندا کی اس گفتگو پر بہت سارے پرستاروں نے سوشل میڈیا پر اپنے ردعمل کا اظہار کیا، لوگوں نے کہا کہ دونوں سیلف میڈ اور عظیم اداکار ہیں۔

    خیال رہے کہ 58 سالہ گووندا نے اپنے فلمی کیریئر کا آغاز 1986 کی فلم لو 86 سے کیا تاہم بعض افراد کا خیال ہے کہ ان کی ڈیبیو فلم تن بدن ہے جو اسی سال ریلیز ہوئی۔

    لو 86 کے بعد گوندا نے پیچھے مڑکر نہیں دیکھا اور اگلے 4 برسوں میں چالیس فلموں میں اداکاری کے جوہر دکھائے۔

    وہ 1980 اور 1990 کے عشرے کے صف اول کے اداکار رہے اور انہوں نے فلم الزام، آنکھیں، راجہ بابو، ہیرو نمبر ون، بڑے میاں چھوٹے میاں اور حسینہ مان جائے گی جیسی کامیاب فلمیں کیں۔

    بالی ووڈ کے کنگ خان شاہ رخ اور گووندا نے کبھی بھی اکٹھے کسی فلم میں کام نہیں کیا۔

  • کان میں معمولی درد کے علاج کے لیے آنے والی خاتون کا بازو کاٹ دیا گیا

    کان میں معمولی درد کے علاج کے لیے آنے والی خاتون کا بازو کاٹ دیا گیا

    نئی دہلی: بھارتی شہر پٹنہ میں اسپتال کے عملے کی مجرمانہ غفلت کی وجہ سے کان میں معمولی درد کے علاج کے لیے آنے والی نوجوان خاتون کا بازو کاٹنا پڑا، اہل خانہ نے انصاف کے لیے عدالت سے رجوع کرلیا۔

    بھارتی میڈیا کے مطابق طبی مجرمانہ غفلت کا واقعہ ریاست بہار کے شہر پٹنہ میں پیش آیا۔

    لڑکی کے اہل خانہ کا کہنا تھا کہ ان کی بہن ریکھا کے کان میں تکلیف تھی جس کی ایک معمولی سرجری ہونی تھی، اس کے لیے وہ مہاویر ہیلتھ انسٹی ٹیوٹ گئیں، وہاں ایک نرس نے ڈاکٹر کا تجویز کردہ انجکشن دیا۔

    اہل خانہ کے مطابق انجکشن کے بعد ریکھا کو بائیں ہاتھ میں تکلیف ہونے لگی، ہاتھ کا رنگ سبز ہونے لگا اور ہاتھ بھی ٹھیک سے کام نہیں کر رہا تھا۔ اس کے بعد انہوں نے وہاں کی نرسوں اور ڈاکٹروں سے اس کی شکایت کی لیکن کسی نے نہیں سنی۔

    کافی دیر بعد ڈاکٹرز نے دیکھا تو کہا کہ ٹھیک ہو جائے گا، لیکن انجکشن لگنے کے بعد سے ہی ریکھا تکلیف کا شکار تھی۔

    بعد ازاں وہ ایک پرائیوٹ اسپتال میں دکھانے گئے جہاں ڈاکٹروں نے بتایا کہ ہاتھ کاٹنا پڑے گا۔ مذکورہ خاندان مریضہ کو لے کر مختلف اسپتالوں میں گھومتا رہا لیکن کہیں سے اس کا علاج نہ ہوسکا،جس کے بعد بالآخر انہیں آپریشن کے ذریعے ہاتھ کٹوانا ہی پڑا۔

    اہل خانہ کا کہنا ہے کہ ان کی بچی کی یہ حالت مہاویر ہیلتھ انسٹی ٹیوٹ کی وجہ سے ہوئی ہے، انہوں نے انصاف کے لیے عدالت کا رخ کیا ہے اور انسٹی ٹیوٹ کو بند کرنے کا مطالبہ کیا ہے۔

  • لوگ کہتے تھے دپیکا تمہاری اوقات سے باہر ہے: رنویر سنگھ

    لوگ کہتے تھے دپیکا تمہاری اوقات سے باہر ہے: رنویر سنگھ

    معروف بالی ووڈ اداکار رنویر سنگھ نے انکشاف کیا ہے کہ جب ان کی شادی اداکارہ دپیکا پڈوکون سے نہیں ہوئی تھی تب لوگ انہیں کہتے تھے کہ دپیکا تمہاری اوقات سے باہر ہے۔

    رنویر سنگھ نے حال ہی میں فلم فیئر ایوارڈز کی تقریب کی میزبانی کی جبکہ ایوارڈز تقریب میں رنویر سنگھ کو بہترین اداکار کا ایوارڈ بھی ملا۔

    تقریب کی میزبانی کے دوران رنویر سنگھ نے خود کو اور وکی کوشل کو خوش قسمت ترین انسان قرار دیتے ہوئے کہا کہ وہ دونوں شہزادوں کی زندگی گزار رہے ہیں، انہوں نے کہا کہ میں اور وکی خوبصورت اور دراز قد کے نوجوان ہیں۔

    ان کا کہنا تھا کہ انہوں نے فلم انڈسٹری میں 12 سال تک محنت کر کے مشکل سے اپنی کمائی سے حال ہی میں کروڑوں روپے کی مالیت کا عالیشان گھر خریدا ہے۔

    اداکار نے بتایا کہ جب ان کی اور دپیکا پڈوکون کی شادی نہیں ہوئی تھی اور جب وکی کوشل اور کترینہ کیف بھی میاں بیوی نہیں بنے تھے تب لوگ انہیں اور وکی کوشل کو طعنے دیا کرتے تھے کہ دپیکا اور کترینہ ان کی اوقات سے باہر ہیں۔

    واضح رہے کہ دپیکا پڈوکون اور رنویر سنگھ نے نومبر 2018 میں شادی کی تھی جبکہ وکی کوشل اور اداکارہ کترینہ کیف نے دسمبر 2021 میں شادی کی تھی۔