جان کیٹس بیماری سے لڑتا لڑتا زندگی ہار گیا۔ وہ ایک جوانِ رعنا تھا جس کی زندگی نے ابھی اترانا سیکھا تھا اور جس نے ابھی خواب نگر میں قدم رکھے ہی تھے۔ اسے زندگی کے 26 برس اور شاعری کرنے کو چند سال ہی ملے، لیکن 1821ء میں آج ہی کے روز آنکھیں موند لینے والے جان کیٹس کو بعد از مرگ رومانوی شاعر کے طور پر لازوال شہرت نصیب ہوئی۔
کیٹس نے کسی کھاتے پیتے گھرانے میں آنکھ نہیں کھولی تھی۔ وہ 31 اکتوبر 1795ء کو ایک ایسے گھر میں پیدا ہوا جس کا سربراہ شراب خانے میں ساقیا تھا۔ اس کی ایک بہن اور تین بھائی تھے۔ جان کیٹس کی تعلیم کسی اچھے اسکول یا ادارے میں نہیں ہوئی لیکن خراب مالی حالات کے باوجود وہ طب کے مضمون میں سند یافتہ ہوا۔ اُسے برطانیہ کے جس سستے اسکول میں داخلہ ملا تھا، وہاں خوش قسمتی سے جان کلارک جیسا ذہین، قابل اور ادبی ذوق رکھنے والا استاد اس کی زندگی میں آیا۔ کلارک نے کیٹس کو برطانوی زبان میں ادب پاروں کا مطالعہ کرنے پر اکسایا اور کلاسیکی ادب کے تراجم سے واقف کرایا۔ کیٹس کا خاندان غربت کی چکی میں پِس رہا تھا اور ایک دن اس کا باپ گھوڑے سے گِر کر مر گیا۔ یوں یہ خاندان معمولی آمدنی سے بھی محروم ہوگیا۔ چند ماہ گزرے تھے کہ کیٹس کی ماں نے دوسری شادی کر لی، مگر وہ ایک برا آدمی ثابت ہوا۔ اس کی ماں نے اس شخص سے طلاق لے لی اور بچّوں کے ساتھ ان کی دادی کے پاس چلی گئی۔ وہاں بدقسمت بچّوں کو چند مہینے بعد ماں کے سائے سے بھی محروم ہونا پڑا۔
کیٹس کو اسکول سے اٹھا لیا گیا اور خاندان کے ایک واقف سرجن کے پاس مقامی اسپتال میں سرجری کی تعلیم و تربیت کے لیے بھیج دیا گیا۔ کیٹس نے اس دوران 1814 سے 1816 تک ادویات اور سرجری کی تعلیم حاصل کی اور اسے اسپتال میں ایک معمولی نوکری بھی مل گئی۔ اس نے اسپتال میں سرجری کی کلاسیں لینے کے علاوہ جراحی کی تربیت کے دوران شاعری کا آغاز کر دیا۔ 1816 میں اسے ادویہ سازی اور سرجری کی ایک سند بھی مل گئی۔ وہ اس پیشے میں آگے بڑھ سکتا تھا، لیکن اس کا دل نہیں مانا۔ وہ دادی کے گھر واپس آگیا اور اپنا زیادہ وقت ادبی سرگرمیوں کو دیا۔
جان کیٹس نے جس دور میں شاعری شروع کی، اس وقت دو ادبی رسائل تنقید کی آڑ میں نئے لکھنے والوں کو آڑے ہاتھوں لے رہے تھے۔ اس کے ہم عصر اور برطانیہ کے مقبول شعرا میں شیلے اور بائرن بھی شامل ہیں اور انھیں بھی بے جا تنقید اور ادبی دنیا میں رکاوٹوں کا سامنا کرنا پڑ رہا تھا۔ ان ناموافق حالات میں لی ہنٹ جو کہ خود بھی ایک اہم شاعر تھا، اس نے ایک رسالہ نکال کر نئے لکھنے والوں کو متعارف کروانے اور ان کو اہمیت دینے کا سلسلہ شروع کیا اور ہنٹ نے کیٹس کی نظمیں اپنے رسالے میں چھاپنی شروع کر دیں، یوں کیٹس کی حوصلہ افزائی ہوئی اور پھر اس کی نظموں کا پہلا مجموعہ چھپ کر منظرِعام پر آ گیا۔ اس کا نام تو باذوق برطانوی جاننے لگے، لیکن ان ادبی رسائل نے بے جا تنقید کے ساتھ کیٹس کی شاعرانہ صلاحیت اور کسی بھی امکان کو مسترد کردیا اور لکھا کہ اسے شاعری کی یہ کوششیں ترک کرکے ادویہ فروخت کرنے پر توجہ دینا چاہیے۔ یہ ایک حساس اور زود رنج شاعر کے لیے ناقابل برداشت بات تھی اور وہ موت کے قریب ہوتا چلا گیا۔ ٹی بی اس زمانے میں مہلک اور ناقابلِ علاج مرض تھا۔ کیٹس کا بھائی اس بیماری میں مبتلا تھا اور کیٹس اس کی دیکھ بھال کے دوران جراثیم کا شکار ہوچکا تھا۔ بائرن، لی ہنٹ اور شیلے اس کے ہمدرد اور شاعری کے معترف تھے جنھوں نے کڑی تنقید اور سخت باتوں سے ملول ہونے پر اس کی دل جوئی کی، مگر جب انسان جسمانی طور پر بیمار ہو تو وہ حساس بھی ہوتا ہے اور منفی رویے اور تضادات اسے بری طرح متأثر کرتے ہیں۔ یہی جان کیٹس کے ساتھ ہوا۔
دوسری طرف وہ اپنی پڑوسی فینی بران کی محبت میں گرفتار تھا اور اس سے ملاقاتوں کا سلسلہ بھی جاری تھا۔ بیماری کے دنوں میں فینی کی محبت نے اسے زندہ رکھا۔ کہتے ہیں کہ جان کیٹس کی مشہور نظم برائٹ اسٹار فینی سے ایک ملاقات ہی میں لکھی گئی تھی۔ وہ ایک دوسرے کو خط بھی لکھتے تھے جو انگریزی ادب میں اعلیٰ رومانوی خطوط کے طور پر محفوظ ہیں۔
کیٹس نے حسن و عشق، جذبے اور تخیل کو اس طرح شاعری میں سمویا کہ بعد میں اسے ایک دبستان قرار دیا گیا۔ اس کی مختصر زندگی میں دکھ درد، مشکل، تنگی اور ادب کے نام نہاد بڑوں کی وہ سب تکلیف دہ باتوں اور فینی کے عشق نے اسے لازوال بنا دیا۔ کیٹس نے عشق کے رنگوں کو اپنی شاعری میں اس خوبی سے برتا کہ وہ عدیم النظیر اور بے مثال ثابت ہوئی۔
ناقدین کہتے ہیں کہ کیٹس کی زندگی کے درد و داغ، رکاوٹیں اور عشق شاعری میں ڈھل گئے تھے۔ جان کیٹس یونانی دیومالائی کرداروں سے متاثر تھا اور ان کا ذکر جا بجا اپنی شاعری میں کیا ہے۔
وہ روم میں قیام پذیر تھا جہاں ایک صبح اس کی طبیعت بگڑ گئی اور زندہ نہ رہا۔ اس عظیم رومانوی شاعر کی تدفین روم ہی میں کی گئی۔
