یارکشائر : برطانیہ میں بڑی جسامت والے چوہوں نے دہشت پھیلارکھی ہے، ایک بلی جتنے بڑے چوہے کو پکڑے جانے کی خبر سوشل میڈیا پر وائرل ہوگئی۔
انگلینڈ کے علاقے نارتھ یارکشائر میں ایک گھر سے ایسا دیو ہیکل چوہا پکڑا گیا ہے جسے دیکھ کر لوگ حیران رہ گئے۔
برطانوی میڈیا رپورٹ کے مطابق اس چوہے کا سائز ایسا تھا کہ اس کی ناک سے دم تک کی لمبائی 22انچ تھی یعنی اس کا سائز ایک چھوٹی بلی جتنا تھا۔
یہ "جناتی چوہا” ایسن کے ایک گھر سے مقامی پیسٹ کنٹرول ٹیم نے نکالا اور کاؤنسلرز ڈیوڈ ٹیلر اور اسٹیفن مارٹن نے اس کی تصویر سوشل میڈیا پر شیئر کی۔
کاؤنسلرز نے لکھا کہ یہ تو بلی کے برابر ہے! اور ساتھ ہی خبردار کیا کہ یہ واقعہ علاقے میں چوہوں کی بڑھتی ہوئی وبا کی نشاندہی کرتا ہے۔
انہوں نے کہا کہ ہم ضلعی انتظامیہ سے مطالبہ کرتے ہیں کہ اس مسئلے کو سنجیدگی سے لیا جائے۔ چوہے ختم کرنے کے لیے مکمل سروے، مارنے کیلیے زہر، اضافی فنڈنگ اور مقامی اتھارٹیز، ماہرین اور مکان مالکان کے درمیان تعاون ضروری ہے۔”
کاؤنسلرز کا کہنا تھا کہ اس مسئلے کو ختم کرنے کیلیے جتنی دیر کریں گے، مسئلہ اتنا ہی زیادہ بڑھے گا، عوام کو صرف مشورہ نہیں عملی اقدامات درکار ہیں۔
واضح رہے کہ اگست 1854ء میں لندن میں ہیضے کی وبا پھوٹ پڑی تھی جس کے نتیجے میں چند روز کے دوران 600 سے زائد افراد ہلاک ہوگئے تھے۔ متاثرہ علاقوں سے لوگوں کی بہت بڑی تعداد نقل مکانی کرگئی تھی۔
یہ لندن میں ہیضے کی وبا پھوٹنے کا بدترین واقعہ تھا۔ اگرچہ اس کا سبب چوہے نہیں بلکہ آلودہ پانی تھا، مگر عام افراد کے ساتھ ساتھ ماہرین صحت بھی ان خدشات کا اظہار کررہے ہیں چوہوں کی وجہ سے وہ کسی وبا کی لپیٹ میں آسکتے ہیں۔
