Tag: انگلینڈ

سابق انگلش کرکٹر ای این بوتھم کا کہنا ہے کہ انگلینڈ کی ’باز بال‘ کرکٹ کی وجہ سے ٹیسٹ کرکٹ میں نئی جان پڑگئی ہے۔

موجودہ کمنٹیٹر اور ہاؤس آف لارڈز کے ممبر سر ای این بوتھ کا کہنا تھا کہ آپ کو صرف لوگوں کی تعداد کو دیکھنا ہے۔ کراؤڈ اب ٹیسٹ کرکٹ میں واپس آنا شروع ہو گیا ہے۔ آج سے 20، 30 سال پہلے بھارت میں گراؤنڈ بھرے ہوئے ہوتے تھے۔

انھوں نے کہا کہ اچانک ہی آئی پی ایل آیا اور اسی طرح ایک روزہ کرکٹ بھی آئی اور پھر لوگوں کی پسند بھی تبدیل ہوگئی۔

بوتھم نے کہا کہ اب لوگ ٹیسٹ کرکٹ کو دیکھنے واپس آرہے ہیں اور ’باز بال‘ کرکٹ دیکھنا چاہتے ہیں۔ اگر آپ چاہتے ہیں کہ لوگ آپ کا کھیل دیکھنے آئیں تو آپ کو انھیں تفریح فراہم کرنا ہوگی۔

68 سالہ انگلش کرکٹر کا کہنا تھا کہ وہ کسی کو 1.2 رنز فی اوور کے حساب سے اسکور کرتے ہوئے نہیں دیکھنا چاہتے، وہ کھیل سے لطف اندوز ہونا چاہتے ہیں۔

انگلینڈ نے اس طرح کی کرکٹ کھیلتے ہوئے تقریباً 15 ٹیسٹ کھیلے ہیں اور ان میں سے 12 میں فتح حاصل کی ہے۔ انگلینڈ اس طرح کھیلتا ہے کہ پانچوں دن کھیل میں دلچسپی موجود ہوتی ہے۔

واضح رہے کہ دوسرے ٹیسٹ میں میزبان بھارت نے انگلینڈ کو 106 رنز کے مارجن سے شکست دی تھی۔ مہمان سائیڈ چوتھی اننگز میں 399 رنز کے ہدف کے تعاقب میں چوتھے دن 292 رنز پر ڈھیر ہوگئی تھی۔

اس سے قبل سیریز کے پہلے مقابلے میں انگلینڈ نے شاندار کارکردگی کا مظاہر کرتے ہوئے بھارتی ٹیم کو چت کیا تھا جس میں انگلش اسپنرز نے اہم کردار ادا کیا تھا۔ اس وقت پانچ میچز کی ٹیسٹ سیریز 1-1 سے برابر ہے۔

انگلش ٹیم نے دوسرے ٹیسٹ میچ میں اسپن وکٹ کے امکان کو مدنظر رکھتے ہوئے نوعمر شعیب بشیر کو بھی ٹیم کا حصہ بنانے کا فیصلہ کرلیا۔

تفصیلات کے مطابق بھارت کے خلاف دوسرے ٹیسٹ میچ کے لیے انگلینڈ نے اپنی پلیئنگ الیون کا اعلان کردیا۔ ویزا ایشو کی وجہ سے تاخیر سے بھارت پہنچنے والے آف اسپنر شعیب بشیر بھی ٹیسٹ میچ میں اپنا ڈیبیو کریں گے۔

فاسٹ بولر جیمز اینڈرسن کی بھی ٹیم میں واپسی ہوئی ہے۔ جمعہ 2 فروری سے وشاکاپٹنم میں ہونے والے دوسرے ٹیسٹ میچ میں جیمز اینڈرسن کو مارک ووڈ کی جگہ پر ٹیم کا حصہ بنایا گیا ہے۔

انگلینڈ نے اپنے ٹرمپ کارڈ پاکستانی نژاد اسپنر شعیب بشیر کو بھی دوسرے ٹیسٹ میں کھلانے کا فیصلہ کیا ہے۔ وہ پہلے ٹیسٹ میچ میں کھیلنے سے قاصر رہے تھے۔

انگلش سائیڈ نے شعیب کو پلیئنگ الیون میں منتخب کرکے اپنے اسپن ڈپارٹمنٹ کو مضبوط کیا ہے۔ حیدرآباد ٹیسٹ میں انگلینڈ کو ایک پراپر آف اسپنر کی کمی کا سامنا رہا تھا۔ شعیب کو زخمی جیک لیش کی جگہ ٹیم میں شامل کیا گیا ہے۔

We have named our XI for the second Test in Vizag! 🏏

🇮🇳 #INDvENG 🏴󠁧󠁢󠁥󠁮󠁧󠁿 | #EnglandCricket

— England Cricket (@englandcricket) February 1, 2024

انگلینڈ کی ٹیم کپتان بین اسٹوکس، جیک کرولی، بین ڈکٹ، اولی پوپ، جو روٹ، جونی بیرسٹو، بین فاکس، ریحان احمد، ٹام ہارٹلے، شعیب بشیر اور جیمز اینڈرسن پر مشتمل ہوگی۔

واضح رہے کہ پہلے ٹیسٹ میچ میں انگلینڈ نے چوتھی اننگز میں اپنے اسپنرز کی شاندار کارکردگی کی بدولت بھارت کو 28 رنز سے شکست دی تھی۔

انگلش ٹیم کے اہم اسپن ہتھیار کی انجری کے سبب مہمان ٹیم کی مشکلات میں اضافہ ہوگیا، باؤنڈری بچاتے ہوئے جیک لیش اپنا گھٹنا زخمی کروا بیٹھے۔

انگلینڈ کے لیے حیدرآباد ٹیسٹ کا آغاز کچھ اچھا نہیں ہوسکا تھا اور پوری ٹیم پہلے ہی دن 246 رنز بنا کر پویلین لوٹ گئی تھی۔ اب بھارت کی پہلی اننگز کے دوران فیلڈنگ کرتے ہوئے ٹیم کے اہم اسپنر جیک لیش کو بائیں گھٹنے میں چوٹ لگ گئی۔

جیک کے مکمل فٹ نہ ہونے کی صورت میں انگلینڈ کی مشکلات میں اضافہ ہوسکتا ہے کیوں کہ بھارت پہلی اننگز میں 175 رنز کی اہم برتری حاصل کرچکا ہے۔

بین اسٹوکس اور انگلش ٹیم کو جیک لیش سے کافی امیدیں وابستہ ہیں جبکہ ابھی سیریز کے چار ٹیسٹ میچز باقی ہیں۔

جمعہ کے صبح کے سیشن میں جیک کے گھٹنے کی تکلیف میں اضافہ ہوگیا تھا اور وہ دن کے 87 اوورز میں سے صرف 16 اوورز ہی کرپائے تھے۔

اسپن بولنگ کوچ جیتن پٹیل کا کہنا ہے کہ کھیل کے دوران جیک لیش کے بائیں گھٹنے کی دو بار بینڈج کرنا پڑی تھی، جس کے باعث وہ ٹھیک طرح سے فیلڈنگ بھی نہیں کرپائے تھے۔

جیتن پٹیل نے بتایا کہ آپ نے فیلڈنگ کے دوران دیکھا ہوگا کہ وہ گیند تک جلد نہیں پہنچ پارہے تھے۔ تاہم اس کے باوجود انھوں نے کافی اچھی باؤلنگ کی ہے۔

انگلینڈ کے اسپن باؤلنگ کوچ کا کہنا تھا کہ یہ چوٹ ان کے لیے کافی سنجیدہ ہوسکتی ہے مگر وہ اپنی ذمہ داری نبھائیں گے۔ میرے خیال میں وہ چوتھی اننگز تک بالکل ٹھیک ہوجائیں گے۔