اسلام آباد: انگور اڈہ افغانستان کے حوالے کرنے کے حوالے سے وزراتِ داخلہ نے تحفظات کا اظہار کردیا ہے۔
ذرائع کے مطابق گزشتہ دنوں پاکستان آرمی کی جانب سے انگوری اڈہ چیک پوسٹ کے مکمل انتظامات افغان حکام کے حوالے کرنے کے حوالے سے وزارتِ داخلہ نے تحفظات پر مبنی مراسلہ وزیراعظم پاکستان کو بھیج دیا ہے۔
مراسلے میں مؤقف اختیار کیا گیا ہے کہ ملک کی کوئی بھی جگہ یا مقام کسی دوسرے ملک یا ادارے کے حوالے کرنے کے حوالے سے آئینِ پاکستان میں باقاعدہ نظام واضح کیا گیا ہے۔
وزارتِ داخلہ نے مؤقف اختیار کیا ہے کہ انگور اڈہ افغان حکام کے حوالے سے آئینی راستہ اختیار نہیں کیا گیا، وفاقی وزیر داخلہ پاکستان چوہدری نثار وطن واپسی پر وزیر اعظم سے ملاقات کر کے اپنے تحفظات کا اظہار بھی کریں گے۔
دوسری جانب اس حوالے سے وزارتِ دفاع کی جانب سے بھی شدید تحفظات کا اظہار کیا ہے۔
مزید پڑھیں: انگوراڈہ کی سرحدی گزرگاہ افغان حکام کے حوالے
واضح رہے گزشتہ روز ڈی جی آئی ایس پی آر نے گزشتہ روز ایک ٹوئیٹ کے ذریعے جذبہ خیرسگالی کے تحت انگوری اڈہ کراسنگ سینٹر کو افغان حکام کے حوالے کرنے کا اعلان کیا تھا۔
ڈی جی آئی ایس پی آر کے مطابق اس عمل سے دونوں ممالک کے درمیان بارڈرمینجمنٹ کے نظام کو بہتر بنایا جاسکتا ہے۔
