لاہور: پنجاب اسمبلی کی تاریخ میں طویل عرصے بعد ان کیمرا اجلاس کا انعقاد ہوگا جس میں اراکین کو سانحہ ساہیوال پربریفنگ دی جائے گی۔
تفصیلات کے مطابق سانحہ ساہیوال پر پنجاب اسمبلی کا ان کیمرا اجلاس آج ہوگا، حکام محکمہ داخلہ پنجاب اور وزیرقانون سانحہ ساہیوال پربریفنگ دیں گے۔
پنجاب اسمبلی کی تاریخ میں طویل عرصے بعد ان کیمرا اجلاس کا انعقاد ہوگا، پنجاب اسمبلی کے آج کے ایجنڈے پر ان کیمرا اجلاس کے سوا کچھ نہیں۔
یاد رہے کہ گزشتہ روز پنجاب اسمبلی کے اجلاس کے دوران سانحہ ساہیوال پراپوزیشن اراکین نے شدید ہنگامہ آرائی کی تھی اور جے آئی ٹی کی رپورٹ زیربحث لانے کا مطالبہ کیا تھا۔
وزیرقانون راجہ بشارت کا کہنا تھا کہ پنجاب حکومت ایوان میں سانحہ ساہیوال کی جے آئی ٹی رپورٹ پر بحث کے لیے تیار ہے۔
دوسری جانب وزیراعظم عمران خان کی زیرصدارت گزشتہ روز پارلیمانی پارٹی کا اجلاس ہوا تھا جس میں سانحہ ساہیوال کی تحقیقات کے لیے جوڈیشل کمیشن بنانے کا عندیہ دیا گیا تھا۔
ساہیوال: مبینہ جعلی مقابلے میں دوخواتین سمیت 4 افراد ہلاک، بچہ زخمی
واضح رہے کہ 19 جنوری 2018 کو جی ٹی روڈ پر ساہیوال کے قریب سی ٹی ڈی کے مبینہ جعلی مقابلے میں ایک بچی اور خاتون سمیت 4 افراد مارے گئے تھے۔
عینی شاہدین کے مطابق کار سواروں نے نہ گولیاں چلائیں، نہ مزاحمت کی، گاڑی سے اسلحہ نہیں بلکہ کپڑوں کے بیگ ملے۔