کراچی : پولیس گلستان جوہر میں لڑکی کو ہراساں کرنے والے اوباش نوجوان کو تلاش کرنے میں ناکام ہے، پولیس نے انکشاف کیا ملزم نے منصوبہ بندی سے خاتون پر حملہ کیا، اس کے پاس موبائل فون بھی نہیں تھا۔
تفصیلات کے مطابق ایسٹ شعبہ تفتیش کے لیے کراچی کے علاقے گلستان جوہرمیں لڑکی کو ہراساں کرنے کے واقعے کے ملزم کی گرفتاری چیلنج بن گئی۔
پولیس کا کہنا ہے کہ کسی بھی ملزم کو اس کی غلطی کی وجہ سے پکڑا جاتا ہے، ملزمان چہرے اور نمبر پلیٹ کی وجہ س شناخت ہوتے ہیں اور ہائی پروفائل کیسز میں جیوفینسنگ کی جاتی ہے۔
،پولیس نے انکشاف کیا ملزم نے منصوبہ بندی سے خاتون پر حملہ کیا، اس کے پاس موبائل فون بھی نہیں تھا جبکہ ماسک کی وجہ سے نادرہ کا سافٹ وئیر بھی چہرہ شناخت نہیں کرسکتا اور نمبرپلیٹ نہ ہونے کی وجہ سے نام اورایڈریس نکالنا ناممکن ہے۔
پولیس کا کہنا ہے کہ چند نشانیوں کی بنا پر تین دن سے ملزم کو تلاش کر رہے ہیں،علاقے میں موجود کوئی شخص ملزم کو نہیں پہچانتا، پوری کوشش ہے ملزم کو جلد گرفتار کیا جائے۔
یاد رہے گلستان جوہر بلاک 4 میں لڑکی کو ہراساں کرنے کا مقدمہ 4 روز کے بعد سرکار کی مدعیت میں درج کر لیاگیا تھا، ایف آئی آر میں وقوعہ کا روز 3 جولائی دکھایا گیا ہے۔
مدعی مقدمہ اے ایس آئی کے مطابق وائرل ویڈیو موبائل پر دیکھی، ویڈیو میں نامعلوم شخص کالی شرٹ اور سفید شارٹ پہنے ہوا تھا۔
مقدمے کے متن میں کہا گیا تھا کہ فیس ماسک پہنے شخص نے لال کلر کی 70 موٹر سائیکل کو روکا، قریب سے پیدل گزرتی ہوئی لڑکی کا پیچھا کیا، لڑکی کو ہراساں کرنے کی کوشش کی لڑکی نے مزاحمت کی تو موٹر سائیکل پر فرار ہوگیا۔
