Tag: اورنگزیب عالمگیر

خانِ جہاں بہادر ظفر جنگ کوکلتاش کے بارے میں بہت کم معلومات حاصل ہوسکی ہیں، لیکن محققین کے مطابق وہ مغلیہ دور میں شہر لاہور کا صوبے دار اور سالار رہا ہے۔ تاریخ کے اوراق میں لکھا ہے کہ کوکلتاش بادشاہ عالمگیر کے عہد میں‌ زیرِعتاب آیا اور بدترین حالات میں اس کی موت ہوگئی۔

مؤرخین کا خیال ہے کہ منصب سے معزولی کے بعد اور قید کے دوران خانِ لاہور میں 23 نومبر 1697ء کو کوکلتاش کا انتقال ہوگیا تھا۔ شاہی عہد میں اس کا مقام و رتبہ کیا تھا اور مغل دربار کے لیے اس نے کیا خدمات انجام دیں، اس بارے میں بھی کچھ خاص معلوم نہیں‌ ہوسکا۔ البتہ مشہور مؤرخ خافی خان نظامُ الملک کی ایک تصنیف منتخبُ اللباب میں خانِ جہاں کا مختصر خاکہ پڑھنے کو ملتا ہے۔ وہ لکھتے ہیں‌ کہ عہدِ عالمگیر کے اس بڑے منصب دار کا اصل نام میر ملک حسین تھا۔ اسے بہادر خان، خانِ جہاں اور کوکلتاش کے ناموں سے بھی پکارا گیا۔ 1673ء میں مغل بادشاہ اورنگزیب عالمگیر نے میر ملک حسین کو ’’خانِ جہاں بہادر کوکلتاش‘‘ اور 1675ء میں ظفر جنگ کا خطاب دیا تھا۔

یہ 1680ء کی بات ہے جب لاہور میں انتظامی سطح کے اختلافات زور پکڑ گئے تو بادشاہ اورنگزیب عالمگیر نے اس سے نمٹنے کے لیے شہزادہ محمد اعظم کو صوبہ دار مقرر کردیا۔ بعد ازاں اِس منصب پر مکرم خان اور سپہ دار خان بھی فائز ہوئے۔ لیکن 1691ء میں یہ عہدہ خانِ جہاں کو سونپ دیا گیا۔ وہ لگ بھگ ڈھائی سال تک لاہور کی نظامت کرتا رہا۔ لیکن 1693ء میں کسی بات پر بادشاہ اس سے ناراض ہوگیا۔ عالمگیر نے نہ صرف کوکلتاش کی معزولی کا فرمان جاری کیا بلکہ اسے زیرِ عتاب بھی رکھا۔ مؤرخین کے مطابق یہ سلسلہ چار سال بعد اُس وقت ختم ہوا جب کوکلتاش اپنی جان سے گیا۔

تاریخی کتب میں لکھا ہے کہ خانِ جہاں بہادر باوقار شخصیت کا مالک اور صاحبِ تدبیر امیر تھا۔ اس نے مغلیہ دور میں بڑی جنگوں میں حصّہ لیا اور سپہ سالار کی حیثیت سے محاذ پر پیش پیش رہا اور ہر بار شاہی دربار سے اپنی وفاداری کو ثابت کیا۔

مشہور ہے کہ کوکلتاش کی تدفین مغل پورہ کے نزدیک ایک مقام پر کی گئی اور بعد میں اس پر ایک مقبرہ تعمیر کیا گیا۔ آج کوکلتاش کا یہ مقبرہ نہایت خستہ حالت میں ہے، لیکن اسے دیکھ کر مغل طرزِ تعمیر کی یاد تازہ ہوجاتی ہے۔ کہا جاتا ہے کہ مقبرہ سترہویں صدی عیسوی میں اورنگزیب عالمگیر کے عہدِ حکومت کے آخری چند برسوں میں تعمیر کروایا گیا تھا۔ محققین کے مطابق یہ مغل دور کے لاہور میں تعمیر کردہ آخری مقابر میں سے ایک ہے۔

تاہم آج محققین میں اس بات پر اختلاف ہے کہ اس مقبرے میں کون شخصیت ابدی نیند سورہی ہے۔ جب کہ سترہویں صدی اور اٹھارہویں صدی عیسوی میں مؤرخین یہی لکھتے آئے کہ اس جگہ خانِ جہاں بہادر ظفر جنگ کوکلتاش مدفون ہے۔

مشاہیر کی زندگی اور تاریخی واقعات کا ایک راز یہ ہے کہ ان سے منسوب جو قصّے اور باتیں مشہور ہو جاتی ہیں، ان کی صحت بھی بہت حد تک مشتبہ ہو جاتی ہے۔ آج مغل شہنشاہ اورنگزیب عالمگیر کا یومِ وفات ہے جن کی ذاتی زندگی اور عہدِ حکومت سے متعلق کئی واقعات اور قصّے مشہور ہیں۔

صدیوں‌ پہلے تاریخ کی مستند کتابوں‌ میں‌ جس ہندوستان کا ذکر ملتا ہے وہ دنیا کا امیر ترین ملک تھا۔ اس عہد کے مؤرخین نے اس ملک کی معاشرت اور حکم رانی کا آنکھوں دیکھا حال رقم کیا اور مغل خاندان، شاہی دربار کے فیصلے اور اشرافیہ کے حالات بھی کتاب میں‌ محفوظ کر لیے۔ لیکن عوام اورنگزیب عالمگیر سے ایسے قصّے بھی منسوب ہیں‌ جن کا کوئی مستند حوالہ موجود نہیں۔

ہندوستان میں تختِ شاہی پر محی الدّین اورنگزیب کے لقب سے متمکن ہوئے تھے جن کے والد شاہجہان نے انھیں عالمگیر کا خطاب دیا تھا۔ اورنگزیب 3 نومبر 1618ء کو پیدا ہوئے۔ ان کی والدہ ارجمند بانو بیگم تھیں جو ممتاز محل کے نام سے مشہور تھیں۔

اورنگزیب عالمگیر نے قرآن حفظ کیا اور اسلامی علوم کے علاوہ ترکی ادب کی تعلیم بھی حاصل کی۔ انھوں نے خطاطی بھی سیکھی اور اس فن میں‌ ماہر ہوئے۔ اس دور کے رواج کے مطابق گھڑ سواری، تیراندازی اور فنونِ سپہ گری میں بھی عالمگیر کو کمال حاصل تھا۔ سترہ برس کی عمر میں 1636ء دکن کا صوبیدار مقرر ہوئے۔ اس دوران کئی بغاوتوں کو فرو کیا۔ اور چند نئے علاقے فتح کیے۔

شاہجہان کی بیماری کے بعد افراتفری اور سلطنت کے علاقوں میں انفرادی حکومت قائم ہوجانے کے بعد عالمگیر نے ان سے اور اپنے بھائی سے جنگ کر کے تاج اور تخت حاصل کیا تھا۔ کہتے ہیں‌ کہ اپنے دور میں‌ بادشاہ نے ہندوؤں اور مسلمانوں میں‌ رائج کئی فضول رسموں کا خاتمہ کیا اور نشہ آور اشیاء پر پابندی عائد کی۔ اسی طرح‌ کھانے پینے کی مختلف اجناس کو محصول سے آزاد کیا۔

اورنگزیب نے 49 سال تک 15 کروڑ افراد پر حکومت کی۔ ان کے دور میں مغل سلطنت اتنی وسیع ہوئی کہ پہلی بار تقریباً پورا برصغیر اس سلطنت کا حصّہ بنا۔

بادشاہ عالمگیر احمد نگر میں بیمار ہوئے تھے اور 3 مارچ 1707ء کو جب ان کی عمر نوّے برس تھی، دارِ بقا کو لوٹ گئے۔ انھیں ان کی وصیت کے مطابق خلد آباد میں دفن کیا گیا۔ اکثر مؤرخین نے بادشاہ کو پرہیز گار، مدبر اور اعلیٰ درجے کا منتظم لکھا ہے۔ ان کے بارے میں‌ یہ بھی مشہور ہے کہ وہ قرآن مجید لکھ کر اور ٹوپیاں سی کر گزارہ کرتے تھے۔ وہ فارسی کے اچھے مضمون نویس تھے جن کے خطوط رقعاتِ عالمگیر کے نام سے مرتب ہوئے۔ ہندوستان کی اسلامی تاریخ میں اس مغل بادشاہ کی کتاب فتاویٰ عالمگیری کو بھی خاص اہمیت اور شہرت حاصل ہے۔

ہندوستان کے بادشاہ اورنگزیب نے اپنی پہلی اولاد کا نام زیبُ النساء رکھا تھا جسے مؤرخین نے عالم فاضل اور فارسی زبان کی شاعرہ لکھا ہے۔ آج زیبُ النساء کا یومِ‌ وفات ہے۔ وہ علم و ادب کی دلدادہ اور قدر دان تھی۔

1638 زیبُ النساء کی ولادت کا سنہ ہے جس کی ماں جس کا نام دلرسن بانو بیگم تھا۔ زیبُ النساء نے جس قسم کی تعلیم پائی تھی اور خود اس کا مذاق طبیعت جس قسم کا واقع ہوا تھا، اس کے لحاظ سے وہ سیاست سے بالکل نا آشنا تھی، تاہم عالمگیر کے پُرپیچ عہدِ حکومت میں وہ بھی اس بدنامی سے نہ بچ سکی۔ زیبُ النساء نے شادی نہیں کی۔ عالمگیر زیب النساء کی نہایت عزت کرتا تھا۔ جب وہ کہیں باہر سے آتی تھی تو اس کے استقبال کے لیے شہزادوں کو بھیجتا تھا۔ سفر و حضر میں اس کو ساتھ رکھتا تھا۔ کشمیر کے دشوار سفر میں بھی وہ ساتھ تھی۔

زیب النساء نے دلّی میں قیام کیا اور وہیں پیوندِ زمین ہوئی۔ عالمگیر اس زمانے میں دکن کی فتوحات میں مصروف تھا۔ یہ خبر سن کر سخت غم زدہ ہوا۔ بے اختیار آنکھوں سے آنسو نکلے اور باوجود انتہا درجہ کے استقلال مزاج کے صبر کی تاب نہ لا سکا۔ سیّد امجد خاں، شیخ عطاء اللہ اور حافظ خان کے نام حکم صادر ہوا کہ اس کے ایصال ثواب کے لیے زکوٰۃ و خیرات دیں۔ اور مرحومہ کا مقبرہ تیار کرائیں۔

تمام مؤرخین نے بہ تصریح لکھا ہے کہ زیب النساء علومِ عربیہ اور فارسی زبان دانی میں کمال رکھتی تھی۔ زیب النساء نے قرآنِ مجید حفظ کیا تھا۔ نستعلیق، نسخ اور شکستہ خط نہایت عمدہ لکھتی تھی۔ لیکن اس کی تصنیفات سے آج کوئی چیز موجود نہیں۔ عام طور پر مشہور ہے کہ وہ مخفی تخلص کرتی تھی۔ اور دیوان مخفی جو چھپ کر شائع ہو چکا ہے اسی کا ہے۔ لیکن یہ صحیح نہیں۔ کسی تاریخ یا تذکرہ میں اس کے تخلص یا دیوان کا ذکر نہیں۔

اس سے انکار نہیں ہوسکتا کہ وہ شاعر تھی لیکن معلوم ہوتا ہے کہ اس کا کلام ضائع ہوگیا۔زیب النساء کی تصنیفات و تالیفات سے زیب المنشات کا ذکر البتہ تذکروں میں آیا ہے۔ تذکرہ الغرائب کے مصنف نے لکھا ہے کہ میں نے اس کو دیکھا ہے، زیب النساء کے خطوط اور رقعات کا مجموعہ ہے۔

زیبُ النساء نے خود کوئی تصنیف کی ہو یا نہ کی ہو لیکن اس نے اپنی نگرانی میں اہلِ فن سے بہت سی عمدہ کتابیں تصنیف کرائیں۔ زیب النّساء دِیدہ زیب عمارات تعمیر کروانے کی بے حد شوقین تھی۔ شہزادی نے لاہور اور دہلی میں کئی عمارات تعمیر کروائیں۔ مؤرخین کے مطابق لاہور میں واقع چوبرجی باغ اور اپنا مقبرہ اس نے خود تعمیر کروایا تھا۔ مقبرے کی تعمیر میں سنگِ سُرخ اور سنگِ مرمر استعمال کیا گیا، جب کہ اس میں خالص سونے کا کلس بھی نصب تھا۔

شہزادی کی ایک ذاتی لائبریری بھی تھی، جس میں قدیم زمانے کے عربی مخطوطات بھی موجود تھے، جن کا اس نے فارسی میں ترجمہ کروایا۔

1702 میں‌‌ آج ہی کے دن شہزادی نے یہ دنیا ہمیشہ کے لیے چھوڑ دی تھی۔ شہزادی کی آخری آرام گاہ پر مؤرخین میں اختلاف ہے اور چند کا خیال ہے کہ وہ دہلی میں آسودۂ خاک ہیں اور بعض نے لکھا ہے کہ لاہور میں ملتان روڈ پر واقع مقبرہ زیب النّساء کا ہے۔