Tag: اوورسیز پاکستانیوں

اسلام آباد : اسلام آباد ہائی کورٹ نے اوورسیز پاکستانیوں کے لیے ووٹنگ کے طریقہ کار پر آئینی ترمیم کے خلاف درخواست مسترد کردی، چیف جسٹس نے ریمارکس دئیے کیا کورٹ پارلیمنٹ سے اس کے اختیار واپس لے لے؟

تفصیلات کے اسلام آباد ہائی کورٹ میں بیرون ملک پاکستانیوں کو ووٹ کے حق کے معاملے پر سماعت ہوئی ، سماعت اسلام آباد ہائیکورٹ کے چیف جسٹس اطہر من اللہ نے کی۔

وکیل درخواست گزار نے کہا کہ میں نے دنیا کے تمام قوانین عدالت کی خواہش پر اکھٹے کیے ہیں، جس پر چیف جسٹس نے استفسار کیا کیا بیرون ملک پاکستانیوں نے ووٹ کا حق استعمال نہیں کیا۔

عارف چوہدری ایڈووکیٹ نے بتایا کہ ضمنی انتخابات میں استعمال کیا تھا تو چیف جسٹس نے کہا کیا آپ آئین کا احترام کرتے ہیں، پارلیمان کا بھی احترام ہونا چاہیے۔

وکیل درخواست گزار کا کہنا تھا کہ 30 سال پہلے یہ سارا عمل شروع ہوا تھا، ہم چاہتے ہیں پراسیس جاری رہے، اسے روک دیا گیا ہے، جس پر چیف جسٹس کا ریمارکس میں کہنا تھا کہ امریکا کی تمام ریاستوں کے قوانین دیکھ لیں وہ بھی غیر ملکی ووٹرز پر مختلف ہیں۔

چیف جسٹس اطہر من اللہ نے درخواست گزار وکیل کے دلائل سن کر ناقابل سماعت قرار دے کر خارج کر دی۔

عدالت نے اوورسیز پاکستانیوں کےلیے ووٹنگ کے طریقہ کار پرآئینی ترمیم کےخلاف درخواست مسترد کرتے ہوئے ریمارکس دیئے کہ کیا یہ کورٹ پارلیمنٹ سے اس کے اختیار واپس لے لے، پارلیمان کابھی احترام ہونا چاہیے،امیدہے کہ الیکشن کمیشن اپنی آئینی ذمہ داری پوری کرے گا۔

مانچسٹر : اوورسیز پاکستانیوں نے شہباز حکومت کی جانب سے ووٹنگ کا حق ختم کرنے کی سازش کو مسترد کرتے ہوئے کہا امپورٹڈ حکومت کو اووسیز کا حق واپس نہیں لینے دیں گے۔

تفصیلات کے مطابق امریکا اور کینیڈا میں مقیم پاکستانیوں نے ووٹ کے حق کیخلاف بل پیش کرنے پر شدید ردعمل دیتے ہوئے حکومت کو آڑے ہاتھوں لیا۔

اوورسیز پاکستانیوں نے کہا کہ ووٹ کے حق سے محروم کرنے کی سازش کو مسترد کرتے ہیں ، 31ارب ڈالرسالانہ زرمبادلہ بھیجنےوالےہم لوگ ہیں۔

پاکستانیوں کا کہنا تھا کہ امپورٹڈ حکومت کو اووسیز کاحق واپس نہیں لینےدیں گے، ہم اس حق کے لیے لڑتے رہیں گے، یہ حق کسی ایک جماعت کیلئے نہیں تھا، دنیا بھر میں مقیم پاکستانیوں کو دیا گیا تھا۔

انھوں نے مزید کہا کہ بیرون ملک مقیم ہیں مگر دل پاکستانیوں کےساتھ دھڑکتاہے،زرمبادلہ اور جائیدادیں پاکستان میں ہیں ،کرپٹ ٹولے کی طرح ملکی دولت باہر لےکرنہیں گئے، حکومت اوورسیز میں عمران خان کی مقبولیت سے خوفزدہ ہے۔

گذشتہ روز قومی اسمبلی میں اوورسیز پاکستانیوں کو ووٹ کے حق سے محروم رکھنے کا بل اسمبلی میں پیش کیا گیا تھا، قومی اسمبلی میں یہ بل پی ٹی آئی کے منحرف رکن نورعالم خان کے ذریعے پیش کرایا گیا ، جس کی وفاقی وزیر قانون اور ن لیگی رہنما اعظم نذیر تارڑ نے مخالفت نہیں کی۔