مالی سال 2017 سے 2022 کے دوران سولر پینل کی درآمد کے حوالے سے 69.5 ارب کی اوور انوائسنگ کا انکشاف ہوا ہے۔
ایف بی آر کی دستاویز میں بتایا گیا ہے کہ 6232گڈز ڈیکلریشن پر63 امپورٹس میں درآمد کنندگان نے اوورانوائسنگ کی۔ 2 نجی کمپنیز نے پانچ مالی سالوں کے دوران 2718 گڈز ڈیکلریشن پر 37.76 ارب کی اوور انوائسنگ کی۔
دستاویز سے یہ بھی ظاہر ہوتا ہے کہ 2 نجی کمپنیز کی جانب سے 72 ارب کی رقم منتقل کی گئی اور 45 ارب کے سولرپینل درآمد کیے گئے۔ رقم منتقلی کے دوران کمرشل بینکوں کی جانب سے احتیاط نہ برتنے کی غفلت بھی سامنے آئی۔
سلیم مانڈوی والاکی زیرِصدارت سینیٹ کی قائمہ کمیٹی خزانہ کے اجلاس میں چیئرمین ایف بی آر کی جانب سے اس معاملے میں بریفنگ دی گئی۔
چیئرمین ایف بی آر زبیر امجد نے کہا کہ اوور انوائسنگ میں ملوث افراد کے خلاف ایف آئی آر درج کرلی ہے، رقم ٹرانسفر کے دوران کمرشل بینکوں نے فنانشل مانیٹرنگ یونٹ رولز کو نظرانداز کیا۔
زبیر امجد نے کہا کہ چین سے سولرپینل درآمد کیے گئے جب کہ نجی کمپنیوں نے دبئی، سنگاپور رقم ٹرانسفر کی۔ ملوث عناصر کے خلاف اینٹی منی لانڈرنگ ایکٹ کے تحت کارروائی ہوگی۔
خزانہ کمیٹی کی جانب سے ایف بی آر کو اینٹی منی لانڈرنگ ایکٹ کے تحت کارروائی جاری رکھنے کی ہدایت گئی ہے۔