کراچی (29 جولائی 2025): وزیر توانائی ناصر حسین شاہ نے کہا ہے کہ اوور بلنگ پر کے الیکٹرک کے خلاف حکمت عملی تیار کر رہے ہیں صارفین کو ریلیف ملے گا۔

سندھ کے وزیر توانائی ناصر حسین شاہ نے کراچی میں میڈیا سے گفتگو کرتے ہوئے کے الیکٹرک پر کڑی تنقید کی ہے اور کہا ہے کہ صوبائی حکومت اوور بلنگ کے معاملے پر کے الیکٹرک کے خلاف حکمت عملی تیار کر رہی ہے، اس سے صارفین کو ریلیف ملے گا۔

ناصر حسین شاہ نے مزید کہا کہ کے الیکٹرک کو نوری آباد پاور پلانٹ سمیت دیگر ہائبرڈ اور سولر پارکس سے سستی بجلی دی جا رہی ہے۔ آئندہ دنوں میں اس کو مزید سستی بجلی کی فراہمی متوقع ہے، اس لیے اب انکار کی گنجائش نہیں۔ لیکن کے الیکٹرک کے رویے پر افسوس ہے کہ وہ فوسل فیول پر بلاجواز تحفظات ظاہر کر رہا ہے۔

صوبائی وزیر کا کہنا تھا کہ نیپرا میں سندھ کی نمائندگی ضروری ہے اور وفاق سے مطالبہ کرتے ہیں کہ نیپرا میں سندھ کو نمائندگی دی جائے۔ نیپرا کمیٹی میں سندھ کے تین نمائندے ہونے چاہئیں۔ حکومت، بزنس کمیونٹی اور صارفین کا ایک ایک نمائندہ شامل ہونا چاہیے۔

ان کا کہنا تھا کہ سندھ حکومت سولر پر ٹیکس کی مخالفت کرتی ہے۔ یہ صاف اور سستی توانائی کا ذریعہ ہے۔ صوبائی حکومت قابل تجدید توانائی میں خود کفالت کی جانب بڑھ رہی ہے۔ صنعتکاروں کو ان منصوبوں میں سرمایہ کاری کی دعوت دیتے ہیں اور ان کے لیے ’’ون ونڈو آپریشن‘‘ بھی متعارف کرایا جا رہا ہے۔

ناصر حسین شاہ نے مزید کہا کہ توانائی بحران کا حل صرف پبلک پرائیویٹ پارٹنر شپ سے ہی ممکن ہے۔ صنعتی علاقوں کی بہتری کے لیے سندھ حکومت نے 5 ارب روپے مختص کیے ہیں۔

پاکستان کے اکثر بجلی صارفین کو بھاری بھرکم بلوں سمیت غلط ریڈنگ کی بھی شکایات ہیں وزارت توانائی نے اس مسئلے کا حل نکال لیا ہے۔

پاکستان میں بجلی پہلے ہی خطے کے دیگر ممالک کے تناسب سے مہنگی ہے۔ اس پر غلط اور زائد ریڈنگ بل صارفین کی مشکلات میں اضافہ کرتے ہیں۔ اکثر ایسی خبریں میڈیا کی زینت بنتی ہیں کہ بجلی تقسیم کار کمپنی نے ایک کمرے کے گھر کو لاکھوں کا بل بھیج دیا۔

وزارت توانائی نے اس مسئلے کا حل نکال لیا ہے اور اس سمت اہم قدم اٹھاتے ہوئے ’’اپنا میٹر، اپنی ریڈنگ‘‘ کے نام سے ایک نئی اسکیم متعارف کرانے کا اعلان کیا ہے۔

گزشتہ دنوں وفاقی وزیر توانائی اویس لغاری نے اعلان کیا تھا کہ اوور بلنگ کی شکایات دور کرنے کے لیے صارفین کو اپنی بلنگ خود کرنے کا اختیار دیا جا رہا ہے۔ اس کا مقصد بلوں کے نظام میں شفافیت پیدا کرنا، اوور بلنگ جیسے دیرینہ مسئلے کا موثر حل نکالنا اور صارفین کو اس عمل میں براہ راست شریک کرنا ہے۔

وفاقی وزیر نے اس حوالے سے ’’اپنا میٹر، اپنی ریڈنگ‘‘ کے نام سے ایک اسکیم کا اعلان کرتے ہوئے کہا تھا کہ اس اسکیم کے تحت بجلی صارفین اپنے موبائل فون سے اپنے میٹر کی ریڈنگ ایپ پر بھیج سکیں گے۔

اس سکیم کے تحت ملک بھر میں بجلی کے گھریلو صارفین کو یہ اختیار دیا جا رہا ہے کہ وہ ہر ماہ اپنے بجلی کے میٹر کی ریڈنگ خود لیں اور اسے ایک مخصوص موبائل ایپلیکیشن کے ذریعے متعلقہ بجلی کی تقسیم کار کمپنی کو ارسال کریں۔

اس مقصد کے لیے پاور انفارمیشن ٹیکنالوجی کمپنی (پی آئی ٹی سی) نے ایک موبائل ایپ تیار کی ہے جو عام اینڈرائیڈ فون پر استعمال کی جا سکے گی اور جسے اس انداز میں تیار کیا گیا ہے کہ عام صارف بھی اسے بآسانی استعمال کر سکے۔

صارف کو ہر ماہ مخصوص تاریخوں کے اندر اپنے میٹر کی واضح تصویر لینا ہو گی، جس میں ریڈنگ صاف دکھائی دے رہی ہو، اور اسے موبائل ایپ پر اپ لوڈ کرنا ہو گا۔ یہ تصویر اور ریڈنگ متعلقہ کمپنی کے ریکارڈ سے موازنہ کی جائے گی۔ اگر صارف کی بھیجی گئی اور سابقہ ریڈنگ میں کوئی فرق یا تضاد نہ پایا گیا تو اسے قبول کر لیا جائے گا۔

بصورتِ دیگر ادارہ میٹر ریڈر کے ذریعے اس کا جائزہ لے کر بل میں فوری طور پر درستگی کرے گا۔ اس نظام کی ایک خاص بات یہ بھی ہے کہ صارف کی بھیجی گئی تصویر بجلی کے بل پر بھی شائع کی جائے گی تاکہ اسے یقین ہو کہ اس کی فراہم کردہ معلومات پر عمل درآمد کیا گیا ہے۔

لاہور : بجلی صارفین کو کروڑوں روپے کی اوور بلنگ کے معاملے پر تحقیقاتی رپورٹ سامنے آگئی ، جس میں ذمہ داروں کی نشاندہی کی گئی ہے۔

تفصیلات کے مطابق لیسکو میں کروڑوں روپے اوور بلنگ انکوائری کے تنازع کے حوالے سے نیب لاہور نے تحقیقات مکمل کرلیں، ذرائع نے بتایا کہ چیف ایگزیکٹو لیسکو، سی ایس ڈی اور ڈائریکٹر کمرشل کو ابتدائی انکوائری میں ذمہ دار قرار دیا ہے۔

ذرائع نیب کا کہنا تھا کہ نیب لاہور کی جانب سے تحقیقاتی رپورٹ چیئرمین نیب کوپیش کی جائے گی ، لیسکو نے صارفین کو 2024 میں کروڑوں روپے کے اضافی بل دیئے۔

چیئرمین نیب کو بریفنگ کے بعد انکوائری پر حتمی فیصلہ کیا جائے گا، اووربلنگ کے ذمہ داران لیسکو افسران کیخلاف کارروائی کا امکان ہے۔.

ذرایع کا کہنا تھا کہ لیسکو افسران مبینہ طور پر انکوائری میں3،2ماہ سے تاخیری حربے استعمال کرتے رہے۔

مزید پڑھیں : اووربلنگ سے ایک سال میں شہریوں سے کتنے ارب روپے وصول کئے گئےِ؟ حیران کن انکشاف

یاد رہے گذشتہ سال جولائی لیسکو کی آڈٹ رپورٹ میں ایک سال کے دوران اووربلنگ کی مد میں شہریوں سے اربوں روپے وصولی کا انکشاف ہوا تھا۔

جس میں بتایا گیا تھا کہ اووربلنگ سے شہریوں سے ایک سال میں 1ارب 95 کروڑ وصول کیےگئے ، رپورٹ میں مختلف تعمیراتی منصوبوں میں 3 ارب 68 کروڑ کی بےضابطگیوں کی نشاندہی کی گئی اور بتایا گیا لائن لاسسزمد میں 8 ارب روپے سے زائد کا نقصان ہوا۔

بعد ازاں وزیراعظم نے بجلی چوری کیخلاف اقدامات اور اووربلنگ میں ملوث افسران کے خلاف سخت کارروائی کا حکم دیتے ہوئے کہا تھا کہ اوور بلنگ کسی طور قابل قبول نہیں، اوور بلنگ میں ملوث افسران کے خلاف سخت کاروائی ہو گی۔

لاہور : گھروں اور سرکاری دفاتر میں کروڑوں یونٹس کی اووربلنگ کا انکشاف سامنے آیا، جس سے عوام کو 40 ارب 80 کروڑ روپے کا نقصان اٹھانا پڑا۔

تفصیلات کے مطابق بجلی کی اووربلنگ میں ملوث عناصر کے خلاف کریک ڈاؤن جاری ہے،4 ماہ کے دوران چھاپہ مار ٹیموں کی جانب سے 48137 میٹرز کو چیک کیا، چھاپوں کے دوران 827 کنکشنز میں اووربلنگ کا انکشاف ہوا، جس کے بعد ملوث عناصر کے خلاف 80 انکوائریاں اور 32 مقدمات درج کئے گئے۔

گھروں، سرکاری دفاتر میں اوور بلنگ کی مد میں اربوں روپے بجلی کے بلوں میں وصول کئے، 4 ماہ کے دوران ملک بھر میں 1 ارب 10 کروڑ سے زائد یونٹس کی اووربلنگ کی گئی۔

اوور بلنگ سے عوام اور دیگر سرکاری اداروں کو 40 ارب 80 کروڑ روپے کا نقصان اٹھانا پڑا، ایف آئی اے لاہور زون نے 163 کنکشنز میں 92 کروڑ 70 لاکھ یونٹس کی اووربلنگ پکڑی، مجموعی طور پر 34 ارب 29 کروڑ سے زائد بلوں کی مد میں وصول کئے گئے۔

ایف آئی اے ملتان زون نے 39 کنکشنز میں 3 لاکھ سے زائد یونٹس کی اوور بلنگ، ایف آئی اے پشاور زون نے 403 کنکشنز میں 90 لاکھ سے زائد یونٹس کی اوور بلنگ پکڑی۔

ایف آئی اے کوہاٹ زون نے 26 کنکشنز میں 3 لاکھ سے زائد یونٹس کی اووربلنگ کی نشاندہی کی جبکہ ایف آئی اے حیدرآباد زون نے ابتک 14 کنکشنز میں 1لاکھ سے زائد یونٹس کی اووربلنگ پکڑی۔

ایف آئی اےلاہورکالیسکو افسران کواوور بلنگ پر سخت وارننگ دیتے ہوئے کہا کہ اوور بلنگ کسی صورت برداشت نہیں ہو گی اور بجلی کےصارفین پر اوور بلنگ کا بوجھ ڈالا گیا تو ایکشن ہوگا۔