اسلام آباد : وفاقی وزیردفاع خواجہ آصف کا کہنا ہے کہ مقبوضہ کشمیر میں بھارتی فوجی مرکز پر حملہ بھارت کا اپنا منصوبہ تھاجو اسے بہت مہنگا پڑے گا۔
تفصیلات کےمطابق وفاقی وزیر دفاع خواجہ آصف کا انٹرویو کے دوران کہنا تھا کہ بھارت گزشتہ کئی سالوں سے پاکستان میں دہشت گردی کے مختلف واقعات میں ملوث رہا ہے اور اوڑی حملہ بھی بھارت کا اپنا بنایا ہوا منصوبہ تھا۔
وفاقی وزیر دفاع نے گزشتہ روز سماجی رابطے کی ویب سائٹ ٹوئٹر پر ٹویٹ کی جس میں انہوں نے اوڑی حملے کو تناؤ بڑھانے کے ساتھ کشمیر کے موضوع سے دھیان ہٹانے کا ہتکنڈہ قرار دیا۔
وزیر دفاع کا کہنا تھا کہ ہندوستان ہر طرح سے پاکستان کے خلاف بات کررہا ہے، لیکن اس سب کے باوجود بھی کسی ملک نے اس کی تائید نہیں کی، جبکہ ہمارے مؤقف پر چین ساتھ کھڑا ہوا۔
اُوڑی حملے کے حوالے سے خواجہ آصف نے کہا کہ بھارت اب تک ایک بھی ثبوت پاکستان کے خلاف سامنے نہیں آیا جس سے یہ بات ثابت ہورہی ہے کہ یہ سب کچھ خود ہندوستان کا مرتب کردہ ایک منصوبہ تھا۔
یاد رہے کہ اس سے قبل وزیراعظم نوازشریف نے کہا تھاکہ بھارت کی جانب سے اوڑی حملے کا الزام پاکستان پر لگایا گیا ہے انہوں نے کہا کہ یہ بھارت کی پرانی عادت ہے کہ ہر حملے کا الزام پاکستان پرلگاتا ہے۔
مزید پڑھیں کشمیر کے بغیر بھارت سے بات چیت کا کوئی فائدہ نہیں،وزیراعظم نواز شریف
واضح رہے کہ وزیراعظم نواز شریف نے اقوام متحدہ کی جنرل اسمبلی کے 71 ویں اجلاس سے خطاب کرتے ہوئے کہا تھا کہ پاکستان پڑوسی ملک ہندوستان کے ساتھ امن اور اچھے تعلقات کا خواہاں ہے لیکن دونوں ممالک کے درمیان امن مسئلہ کشمیر کے حل کے بغیر ممکن نہیں ہے۔
