ARYNews.tv | Urdu – Har Lamha Bakhabar

Tag: اوکاڑہ

  • منشیات فروشی کی ویڈیو سوشل میڈیا پر وائرل کرنے پر خاتون کو گولی مار دی گئی

    منشیات فروشی کی ویڈیو سوشل میڈیا پر وائرل کرنے پر خاتون کو گولی مار دی گئی

    اوکاڑہ: پنجاب کے شہر اوکاڑہ میں منشیات فروشی کی ویڈیو سوشل میڈیا پر وائرل کرنے پر ایک خاتون کو گولی مار دی گئی، جس سے وہ زخمی ہو گئی ہے۔

    تفصیلات کے مطابق منشیات فروشوں نے فائرنگ کر کے ایک خاتون آسیہ کو زخمی کر دیا، خاتون نے منشیات فروشی کی ویڈیو بنا کر سوشل میڈیا پر وائرل کر دی تھی۔

    پولیس حکام کے مطابق منشیات فروش نسرین نے ساتھیوں کے ساتھ مل کر فائرنگ کر کے آسیہ کو زخمی کیا، ملزمان کے خلاف منشیات فروشی کے مقدمات بھی درج ہیں۔

    متاثرہ خاتون کا کہنا ہے کہ پولیس ان کی درخواست پر ملزمان کے خلاف مقدمہ درج نہیں کر رہی ہے، متاثرہ خاتون اور فیملی نے اعلیٰ حکام سے نوٹس لینے کا مطالبہ کر دیا ہے۔

    زخمی خاتون نے کہا کہ ملزمان کو مقدمات درج ہونے کے باوجود گرفتار نہیں کیا گیا۔

  • نائب قاصد کو تاوان کے لیے دن دہاڑے اغوا کرنے والا شہریوں کے ہاتھوں پکڑا گیا

    نائب قاصد کو تاوان کے لیے دن دہاڑے اغوا کرنے والا شہریوں کے ہاتھوں پکڑا گیا

    اوکاڑہ: پنجاب کے شہر اوکاڑہ میں ایک نائب قاصد کو تاوان کے لیے اغوا کرنے والا شخص مغوی کے والد اور شہریوں کے ہاتھوں پکڑا گیا۔

    تفصیلات کے مطابق اوکاڑہ پولیس کے ترجمان نے کہا ہے کہ تحصیل اسپتال کے نائب قاصد طلحہ کو تاوان کے لیے دن دہاڑے اغوا کرنے والا شخص جھارا شہریوں کے ہاتھوں پکڑا گیا ہے۔

    پولیس حکام کا کہنا ہے کہ ملزم جھارا منشیات کا کام کرتا ہے اور متعدد بار جیل جا چکا ہے، ملزم نے نائب قاصد ڈسٹرکٹ اسپتال طلحہ کو دن میں اغوا کیا تھا۔

    پولیس حکام کے مطابق ملزم نے طلحہ کے ماں باپ کو ایس ایچ او بن کر فون کیا اور 10 لاکھ تاوان کا مطالبہ کیا، طلحہ کے والد نے ایک لاکھ روپے دیے، مگر ملزم نے طلحہ کو نہیں چھوڑا۔

    خاتون کا قاتل 12 سال بعد دبئی سے واپسی پر ایئرپورٹ پر گرفتار

    والد نے شہریوں کی مدد سے ملزم کو پکڑ کر پولیس کے حوالے کر دیا، پولیس نے ابتدائی تفتیش کے بعد طلحہ کو ملزم کے گھر سے برآمد کر لیا۔

  • اوکاڑہ میں بااثر افراد نے 7 سالہ بچے پر کتا چھوڑ دیا

    اوکاڑہ میں بااثر افراد نے 7 سالہ بچے پر کتا چھوڑ دیا

    اوکاڑہ: نواحی قصبہ منڈی احمد آباد میں بااثر افراد نے 7 سال کے بچے پر کتا چھوڑ دیا جس سے بچہ شدید زخمی ہوگیا۔

    اے آر وائی کے مطابق یہ افسوسناک واقعہ اوکاڑہ کے نواحی قصبہ منڈی احمد آباد میں پیش آیا، جہاں بااثر افراد نے 7 سال کے بچے پر کتا چھوڑ دیا، کتے نے بچے کو  شدید زخمی کردیا۔

    رپورٹ کے مطابق اہل محلہ نے مشکل سے بچے کی جان بچائی اور اسپتال لے گئے، بچے کی والدہ نے تھانہ منڈی احمد آباد میں اس واقعے کے مقدمے کی درخواست جمع کرادی۔

  • اوکاڑہ میں لڑکیوں سے چھیڑ چھاڑ کرنے والے کی خوب درگت، ویڈیو وائرل

    اوکاڑہ میں لڑکیوں سے چھیڑ چھاڑ کرنے والے کی خوب درگت، ویڈیو وائرل

    اوکاڑہ: پنجاب کے شہر اوکاڑہ میں لڑکیوں کو چھیڑنے پر ایک نوجوان کی خوب درگت بنائی گئی، جس کی ویڈیو بھی وائرل ہو گئی ہے۔

    تفصیلات کے مطابق اوکاڑہ میں کامران نامی ایک نوجوان لڑکیوں کو چھیڑ رہا تھا، دوسرے نوجوانوں نے اسے منع کیا تو اس نے گالم گلوچ شروع کر دی، جس پر جھگڑا ہو گیا۔

    رپورٹ کے مطابق کامران کو چھیڑ خانی سے منع کیا گیا تو گالم گلوچ شروع ہو گئی اور حاشر نامی نوجوان نے اپنے دوست کے ساتھ مل کر اسے خوب پیٹا، اور درگت بنائی۔

    معلوم ہوا ہے کہ ملزم کامران کے خلاف اوکاڑہ کے تھانہ بی ڈی میں ایک معذور لڑکی سے زیادتی کا مقدمہ بھی درج ہے۔ اور وہ لڑکیوں سے اکثر چھیڑ خانی کرتا پایا گیا ہے، اور اس کے خلاف متعدد شکایات سامنے آ چکی ہیں۔

    تھانہ بی ڈی پولیس کی جانب سے کامران کے خلاف تحقیقات بھی جاری ہیں، تشدد کرنے والے لڑکوں کا کہنا تھا کہ کامران کے خلاف اہل محلہ کو کئی بار شکایات موصول ہوئی ہیں۔

  • اوکاڑہ: مخالفین نے 60 سالہ بزرگ کو ٹریکٹر کے آگے پھینک کر مار دیا

    اوکاڑہ: مخالفین نے 60 سالہ بزرگ کو ٹریکٹر کے آگے پھینک کر مار دیا

    اوکاڑہ: پنجاب کے شہر اوکاڑہ میں مخالفین نے 60 سالہ بزرگ کو ٹریکٹر کے آگے پھینک کر مار دیا، پولیس نے ملزمان کے خلاف مقدمہ درج کر لیا۔

    تفصیلات کے مطابق حجرہ شاہ مقیم کے نواحی علاقے راجووال میں مخالفین نے بدترین تشدد کر کے چلتے ٹریکٹر کے آگے پھینک کر ساٹھ سالہ بزرگ کو قتل کر دیا۔

    پولیس نے تھانہ حجرہ شاہ مقیم میں مقتول عتیق الرحمان کمبوہ کے بیٹے وجیہ کی مدعیت میں 7 سے زائد ملزمان کے خلاف مقدمہ درج کر لیا۔ ڈی پی او نے واقعے کا نوٹس لیتے ہوئے ملزمان کی فوری گرفتاری کے لیے ٹیم تشکیل دے دی۔

    مدعی نے ایف آئی آر میں لکھوایا کہ مقتول کے بھائی عبدالعزیز نے 3 ماہ پہلے منظور احمد وغیرہ سے زمین خریدی تھی، لیکن اس کے باوجود وہ زمین پر ناجائز قبضہ کر رہے تھے۔

    مدعی کے مطابق نعیم، عبدالماجد، عابد، اور وقار سمیت درجن سے زائد مخالفین زمین پر قبضہ کر رہے تھے، تو عتیق الرحمان نے انھیں منع کیا، اس پر انھوں نے پہلے تو عتیق الرحمان کو تشدد کا نشانہ بنایا، اور پھر انھیں چلتے ٹریکٹر کے آگے پھینک دیا۔

    ایف آئی آر کے متن کے مطابق ملزم وقار نے عتیق الرحمان پر ٹریکٹر چڑھایا، جس سے وہ موقع ہی پر جاں بحق ہو گئے۔

    واضح رہے کہ واقعے کے بعد مقتول کے اہل خانہ نے احتجاجاً ٹریکٹر کو آگ لگائی اور قصور روڈ کو بلاک کیا، مقتول کے اہل خانہ کی جانب سے واقعے میں ملوث ملزمان کی گرفتاری کا مطالبہ کیا جا رہا ہے۔

  • بچوں کے جعلی برتھ سرٹیفکیٹ بنوا کر خاتون نے محلہ دار سے لاکھوں روپے ہتھیا لیے

    بچوں کے جعلی برتھ سرٹیفکیٹ بنوا کر خاتون نے محلہ دار سے لاکھوں روپے ہتھیا لیے

    اوکاڑہ: خاتون نے اپنے بچوں کے جعلی برتھ سرٹیفکیٹ بنوا کر محلہ دار کو بچوں کا باپ ظاہر کر کے اس سے لاکھوں روپے ہتھیا لیے۔

    تفصیلات کے مطابق پنجاب کے شہر اوکاڑہ میں ساجدہ بی بی نامی خاتون نے اپنے بچوں کے جعلی پیدائشی سرٹیفکیٹ بنوا کر محلہ دار سے لاکھوں روپے ہتھیا لیے۔

    شفقت بلاک کی رہائشی خاتون ساجدہ بی بی نے زمان نامی شخص کو جعلی برتھ سرٹیفکیٹس کے ذریعے اپنے بچوں کا باپ ظاہر کر دیا تھا، معلوم ہوا ہے کہ خاتون کو اپنے محلہ دار سے کوئی رنجش تھی، جس پر اس نے یہ قدم اٹھایا۔

    خاتون نے جعلی سرٹیفکیٹس یونسل کونسل سے بنوائے تھے، جن میں زمان کو بچوں کا باپ ظاہر کیا گیا تھا، ان سرٹیفکیٹس کی مدد سے اس نے زمان سے لاکھوں روپے ہتھیائے۔

    ڈپٹی کمشنر اوکاڑہ نے معاملے کا نوٹس لیا، انکوائری پر معلوم ہوا کہ یونین کونسل نمبر 48 کے سیکریٹری نے بغیر تصدیق 3 بچوں کے پیدائشی سرٹیفکیٹ جعلی طور پر جاری کر دیے تھے، اور اس کے لیے سیکریٹری یونین کونسل نے رشوت لی۔ انکوائری رپورٹ میں سیکریٹری یونین کونسل کو جعلی سرٹیفکیٹس اجرا کے لیے ذمہ دار ٹھہرایا گیا۔

    رپورٹس کے مطاابق ساجدہ بی بی کی شادی 2008 میں محمد اکرم سے ہوئی تھی، ساجدہ نے اپنے حقیقی تین بچوں زمزم، عروج فاطمہ اور محمد بلال کے جعلی پیدائشی سرٹیفکیٹ بنوانے کے لیے یونین کونسل نمبر 48 کے سیکریٹری حبیب اللہ سے رابطہ کیا، اس نے بغیر تصدیق ہزاروں روپے وصول کر کے ساجدہ بی بی کے محلہ دار محمد زمان کو اس کے بچوں کا باپ ظاہر کر کے تین سرٹیفکیٹ جاری کر دیے، جن کی مدد سے خاتون نے محمد زمان کے خلاف ڈگری کروا دی اور لاکھوں روپے وصول کر لیے۔

  • اوکاڑہ ریلوے اسٹیشن پر لڑکی سے زیادتی کا مرکزی ملزم گرفتار ہو گیا

    اوکاڑہ ریلوے اسٹیشن پر لڑکی سے زیادتی کا مرکزی ملزم گرفتار ہو گیا

    اوکاڑہ: ریلوے اسٹیشن پر لڑکی سے زیادتی کا مرکزی ملزم گرفتار ہو گیا۔

    تفصیلات کے مطابق تھانہ منڈی احمد آباد پولیس نے ایک کارروائی میں ٹرین میں لڑکی سے زیادتی کے ملزم حسیب کو گرفتار کر لیا۔

    ملزم حسیب کو کراچی ریلوے پولیس کے حوالے کر دیا گیا ہے، جس کے خلاف ریلوے پولیس اسٹیشن ساؤتھ کراچی میں مقدمہ درج ہے۔

    اس افسوس ناک واقعے میں پاکستان ریلوے کے پی آر اسٹاف حسیب نے اوکاڑہ ریلوے اسٹیشن پر ایک نوجوان لڑکی کو زیادتی کا نشانہ بنا ڈالا تھا، یہ واقعہ 10 مئی کو کو پیش آیا۔

    کراچی پہنچنے پر زیادتی کی شکار لڑکی نے پولیس اسٹیشن ساؤتھ میں ریلوے ملازمین کے خلاف شکایت درج کرا دی تھی۔ ریلوے انتظامیہ نے زیادتی کیس سامنے آنے کے بعد اسٹیشن ماسٹر کو غفلت برتنے پر معطل کر دیا تھا۔

  • اوکاڑہ میں‌ کار سوار فیملی سے لوٹ مار، پولیس اہلکار کے قریب سے گزرنے کی فوٹیج

    اوکاڑہ میں‌ کار سوار فیملی سے لوٹ مار، پولیس اہلکار کے قریب سے گزرنے کی فوٹیج

    اوکاڑہ: پنجاب کے شہر اوکاڑہ میں‌ ایک کار سوار فیملی سے لوٹ مار کی واردات کی گئی، واردات کے وقت کار کے قریب سے پولیس اہلکار بھی قریب سے گزر گیا تھا لیکن انھوں نے کوئی کارروائی نہیں کی۔

    تفصیلات کے مطابق اوکاڑہ میں تھانہ اے ڈویژن کی حدود میں گزشتہ روز ایک کار سوار فیملی سے لوٹ مار کی گئی، ایک فوٹیج سامنے آئی ہے جس میں واردات کے وقت پولیس اہل کار کو بھی موٹر سائیکل پر پاس سے گزرتے دیکھا جا سکتا ہے۔

    اے آر وائی نیوز پر خبر نشر ہونے کے بعد ڈی پی او نے واقعے کا نوٹس لے لیا، ترجمان پولیس نے کہا کہ ملزمان کو جلد سی سی ٹی وی فوٹیج کی مدد سے گرفتار کیا جائے گا۔

    ترجمان نے کہا کہ جائے واردات کے قریب سے گزرنے والے اہل کار کے خلاف بھی محکمانہ کارروائی ہوگی، پولیس اہل کار نے لوٹ مار کے وقت ڈاکوؤں کے خلاف کوئی ایکشن نہیں لیا تھا۔

  • اوکاڑہ: رات گئے مسافر وین، ٹرک اور ٹریکٹر ٹرالی میں خوفناک تصادم

    اوکاڑہ: رات گئے مسافر وین، ٹرک اور ٹریکٹر ٹرالی میں خوفناک تصادم

    اوکاڑہ: رات گئے اوکاڑہ میں مسافر وین، ٹرک اور ٹریکٹر ٹرالی میں خوفناک تصادم کے نتیجے میں 4 افراد جاں بحق ہو گئے۔

    تفصیلات کے مطابق پنجاب کے شہر اوکاڑہ میں فیصل آباد روڈ ینگ پور کے قریب رات گئے ٹریفک حادثے میں خاتون سمیت 4 افراد موقع پر جاں بحق ہو گئے، جب کہ 4 مسافر زخمی ہوئے۔

    حادثے کی اطلاع ملتے ہی ریسکیو 1122 کی گاڑیاں جائے وقوعہ پر پہنچی اور زخمیوں کو طبی امداد کے لیے ڈسٹرک اسپتال اوکاڑہ منتقل کیا گیا، جہاں زخمیوں کو طبی امداد فراہم کی گئی۔

    پولیس نے حادثے کی تحقیقات شروع کر دی ہے، حادثے میں جاں بحق ہونے والوں کی شناخت صدی احمد، شہزاد اور شہادت کے ناموں سے ہوئی، جب کہ اس حادثے میں ایک خاتون شازیہ بھی جاں بحق ہوئیں۔

    پولیس نے ضروری کارروائی کے بعد تمام لاشوں کو ان کے ورثا کے حوالے کر دیا ہے، جاں بحق ہونے والے افراد گوگیرہ کے رہائشی تھے۔

  • مستقبل میں زیر زمین پانی کی دستیابی: اوکاڑہ میں سائنسی تحقیق کا آغاز

    لاہور: صوبہ پنجاب کے ضلع اوکاڑہ میں زیر زمین پانی کے استعمال اور مستقبل میں اس کی دستیابی یقینی بنانے کے لیے سائنسی تحقیق کا آغاز کردیا گیا۔

    تفصیلات کے مطابق انٹرنیشنل واٹر مینجمنٹ انسٹی ٹیوٹ پاکستان نے ضلع اوکاڑہ میں ایک ورکشاپ کا انعقاد کیا جس کا مقصد پانی کے موجودہ استعمال اور مستقبل میں اس کی یقینی دستیابی کے بارے میں آگاہی فراہم کرنا تھا۔

    ورکشاپ سے خطاب کرتے ہوئے ماہر ماحولیات ڈاکٹر محسن حفیظ کا کہنا تھا کہ پاکستان ماحولیاتی تبدیلی سے بری طرح متاثر ہو رہا ہے، اس سے نمٹنے کے لیے برطانیہ کی مالی معاونت سے ہمارا ادارہ آبی قوانین اور پالیسیوں کے بہتر عمل درآمد کو یقینی بنا رہا ہے۔

    انہوں نے کہا کہ فی الحال ضلع اوکاڑہ مں زیر زمین آبی ذخائر اور مستقبل میں اس کی یقینی دستیابی کے لیے مختلف سائنسی تحقیقات اور تجربات کا آغاز کیا گیا ہے، ان تجربات کی روشنی میں پورے پنجاب میں آبی پالیسیوں کے بہتر درآمد میں مدد ملے گی۔

    ماحول اور جینڈر اسپیشلسٹ کنول وقار کا کہنا تھا کہ آبی معامات میں خواتین، نوجوانوں اور معاشرے کے محروم طبقات کی شمولیت بے ضروری ہے۔

    ورکشاپ میں مختلف آبی چیلنجز اور ان سے نمٹنے کی حکمت عملیوں پر تبادلہ خیال کیا گیا۔