Tag: او آئی سی

اسلام آباد: وزیر خارجہ شاہ محمود قریشی نے کہا ہے کہ بھارت او آئی سی وفد کو مقبوضہ کشمیر کے دورےکی اجازت دے۔

تفصیلات کے مطابق وزیر خارجہ شاہ محمود قریشی نے او آئی سی کشمیر رابطہ گروپ اجلاس سے خطاب کرتے ہوئے کہا کہ بھارت کی ایل او سی پر اشتعال انگیزی میں اضافہ ہوا ہے۔

وزیر خارجہ کا کہنا تھا کہ بھارت ایل او سی پر شہری آبادی کو نشانہ بنا رہا ہے،بھارت کی اشتعال انگیزی سے خطے کا امن متاثر ہوسکتا ہے، بھارت مسلسل سیزفائرکی خلاف ورزی کر رہا ہے۔

شاہ محمود قریشی نے اجلاس سے خطاب کرتے ہوئے کہا کہ سیکرٹری جنرل یو این بھارت کی اشتعال انگیزی کا نوٹس لیں۔

وزیر خارجہ کا کہنا تھا کہ او آئی سی بھارت کو پابند بنائے مقبوضہ کشمیرمیں استصواب رائے کرائے۔انہوں نے مزید کہا کہ بھارت او آئی سی وفد کو مقبوضہ کشمیر کے دورے کی اجازت دے۔

بھارت کوئی حماقت نہ کرے، پاکستان اپنا دفاع کرنا جانتا ہے، شاہ محمود قریشی

اس سے قبل رواں ماہ 8 جون کو وزیر خارجہ شاہ محمود قریشی نے بھارت کے فضائی حملہ کرنے کی دھمکی پر ردعمل دیتے ہوئے کہا تھا کہ بھارت کوئی حماقت نہ کرے، پاکستان اپنا دفاع کرنا جانتا ہے۔

جدہ: اسلامی تعاون کی تنظیم (او آئی سی) نے مقبوضہ کشمیر میں بھارت کا نیا ڈومیسائل قانون مسترد کر دیا۔

تفصیلات کے مطابق او آئی سی کے انسانی حقوق کے مستقل آزاد کمیشن نے مقبوضہ کشمیر میں بھارت کے ڈومیسائل قانون کو مسترد کر دیا ہے۔

او آئی سی کی جانب سے جاری اعلامیے میں کہا گیا ہے کہ بھارت کا نیا ڈومیسائل قانون او آئی سی اور سلامتی کونسل کی قراردادوں کی خلاف ورزی ہے، اقوام متحدہ اور عالمی برادری ڈومیسائل قانون واپس لینے کے لیے بھارت پر دباؤ ڈالے۔

اسلامی تعاون کی تنظیم نے مطالبہ کیا کہ عالمی برادری مقبوضہ کشمیر پر اقوام متحدہ کی قرار دادوں پر عملدرآمد یقینی بنوائے۔

پاکستان نے مقبوضہ کشمیر میں نئے ڈومیسائل قانون کو مسترد کردیا

اس سے قبل گزشتہ روز ترجمان دفتر خارجہ عائشہ فاروقی کا کہنا تھا کہ پاکستان جموں کشمیر گرانٹ ڈومیسائل سرٹیفکیٹ پروسیجر 2020 مسترد کرتا ہے،نیا ڈومیسائل قانون غیرقانونی ،یوا ین سلامتی کی قراردادوں کے منافی ہے۔

یاد رہے کہ 5 اگست 2019 کو بھارت کی جانب سے مقبوضہ کشمیر کی خصوصی حیثیت ختم کرنے کے بعد جموں وکشمیر میں سول سروسز ایکٹ لاگو کیا گیا ہے جس کے مطابق جو جموں وکشمیر میں 15 سال سے مقیم ہے وہ اپنے ڈومیسائل میں مقبوضہ علاقے کو اپنا آبائی علاقہ قرار دے سکیں گے۔

ایکٹ میں واضح کیا گیا کہ ڈومیسائل میں مقبوضہ علاقے کو اپنا آبائی علاقہ قرار دینے والے شخص کے لیے ضروری ہے کہ اس نے جموں و کشمیر کے وسطی علاقے میں 15 سال تک رہائش اختیار کی ہو یا 7 سال کی مدت تک تعلیم حاصل کی ہو یا علاقے میں واقع تعلیمی ادارے میں کلاس 10 یا 12 میں حاضر ہوا ہو اور امتحان دیے ہوں۔

اسلام آباد: وزیرخارجہ شاہ محمود قریشی نے اسلامی تعاون تنظیم(او آئی سی) کے سیکرٹری جنرل اور رکن ممالک کے وزرائے خارجہ کو خط لکھ دیا جس میں بھارتی مسلمانوں کو درپیش مسائل سے آگاہ کیا گیا ہے۔

تفصیلات کے مطابق وزیرخارجہ کی جانب سے لکھے گئے خط کے متن میں کہا گیا ہے کہ بھارت میں مسلمانوں کو کروناوائرس کے پھیلاؤ کا ذمہ دار قرار دیا جارہا ہے، مسلمانوں کو انسانی بم قرار دے کر ان کی کردار کشی کی جارہی ہے۔

انہوں نے کہا کہ سوشل میڈیا پر اسلام سے نفرت کے عنوانات کی بھرمار ہے، کروناوائرس کے لیے مسلمانوں کو مورد الزام ٹھہرانا انتہائی خطرناک ہے، ہندوتوا نظریے کے طویل مدتی نتائج انتہائی خطرناک ہوسکتے ہیں۔

کرونا وائرس کی آڑ میں مسلمان نسل کشی کی تیاری، بھارتی مصنفہ نے مودی کا چہرہ بے نقاب کردیا

خط متن کے مطابق او آئی سی کی جانب سے بھارتی مسلمان دشمنی کی مذمت کا خیرمقدم کرتے ہیں، معاملے کو ایچ آر سی سمیت عالمی فورمز میں اٹھایا جائے، اوآئی سی اسلاموفوبیا آبزرویٹری کو مزید تقویت دی جائے۔

خیال رہے کہ گزشتہ ماہ بھارتی مصنفہ ارون دتی رائے نے بھی انکشاف کیا تھا کہ بھارتی حکومت کرونا وائرس کی آڑ میں مسلمانوں کے خلاف ہندو انتہا پسندوں کے جزبات کو بھڑکا رہی ہے تاکہ مسلم نسل کشی شروع ہو، بھارتی حکومت نے مسلمانوں پر کرونا کا الزام عائد کر کے مذہبی کشیدگی کو ہوا دینے کی کوشش کی۔

اسلام آباد: وزیراعظم عمران خان سے سیکرٹری جنرل او آئی سی کے نمائندہ خصوصی برائے کشمیر یوسف الدوبے نے ملاقات کی۔

تفصیلات کے مطابق وفاقی دارالحکومت اسلام آباد میں وزیراعظم عمران خان سے سیکرٹری جنرل او آئی سی کے نمائندہ خصوصی برائے کشمیر یوسف الدوبے نے وفد کے ہمراہ ملاقات کی اور مقبوضہ کشمیر کی صورت حال پر گفتگو کی۔

وزیراعظم عمران خان نے او آئی سی کے وفد کے بروقت دورہ پاکستان اور آزاد کشمیر کا خیرمقدم کرتے ہوئے کہا کہ 5 اگست 2019 سے 80 لاکھ کشمیری لاک ڈاؤن اور مواصلات کی بندش کی زد میں ہیں، بھارت نے مقبوضہ کشمیر کو دنیا کی سب سے بڑی جیل بنا دیا ہے۔

وزیراعظم نے او آئی سی وفد کو بھارت میں ہندوتوا نظریے اور مسلمانوں پر مظالم سے آگاہ کیا اور عالمی برادری سے مقبوضہ کشمیر اور بھارت میں مسلم کش فسادات کے خلاف کردار ادا کرنے کا مطالبہ کیا۔

بھارت میں اقلیتوں خصوصاً مسلمانوں کی نسل کشی کی جا رہی ہے، وزیرخارجہ

اس سے قبل اسلام آباد میں نیوز بریفنگ کے دوران وزیر خارجہ شاہ محمود قریشی کا کہنا تھا کہ بھارت میں اقلیتوں خصوصاً مسلمانوں کی نسل کشی کی جا رہی ہے۔

اسلام آباد: او آئی سی سیکریٹری جنرل کے نمائندہ خصوصی برائے جموں و کشمیر وفد کے ہمراہ پاکستان پہنچ گئے۔

اے آر وائی نیوز کے مطابق ترجمان دفتر خارجہ نے کہا ہے کہ او آئی سی سیکریٹری جنرل کے نمائندہ خصوصی برائے جموں و کشمیر یوسف ایم الدوبیے 6 مارچ تک پاکستان اور آزاد کشمیر کا دورے پر ہیں۔

دفتر خارجہ کے مطابق 7 رکنی او آئی سی وفد کو مقبوضہ کشمیر کی بگڑتی صورت حال پر بریفنگ دی جائے گی، او آئی سی وفد لائن آف کنٹرول کا دورہ بھی کرے گا جہاں وہ بھارتی فائرنگ سے شہری آبادی کو پہنچنے والے نقصانات کا جائزہ لے گا۔

بھارت میں مسلمانوں کے مقدس مقامات کا تحفظ کیا جائے، او آئی سی اعلامیہ

ترجمان دفتر خارجہ کا کہنا تھا کہ او آئی سی وفد کا دورہ 5 اگست کے بھارتی یک طرفہ اقدامات کے تناظر میں ہے، او آئی سی نے کشمیری عوام کی جدوجہد میں ان کی مکمل حمایت کی، او آئی سی نے 1994 میں اس سلسلے میں ایک کنٹیکٹ گروپ بھی قائم کیا، انڈیپنڈنٹ ہیومن رائٹس کمیشن نے مظالم کی مذمت میں کئی بیانات جاری کیے، 5 اگست کے بعد اوآئی سی کنٹیکٹ گروپ کے 2 اجلاس بھی ہو چکے ہیں۔