Tag: او پی ایف

اسلام آباد: وزیرِ اعظم عمران خان کے معاونِ خصوصی برائے سمندر پار پاکستانیز زلفی بخاری نے بتایا ہے کہ دبئی میں قانونی معاونت کے سلسلے میں کمیٹی قائم کر دی گئی ہے۔

تفصیلات کے مطابق معاون خصوصی سمندر پار پاکستانی زلفی بخاری نے کہا کہ سعودی عرب سے 230 افراد واپس پہنچ چکے ہیں، دبئی میں لیگل ایڈ کے لیے کمیٹی قائم ہو گئی ہے۔

زلفی بخاری کا کہنا تھا کہ گزشتہ حکومتوں میں سمندر پار پاکستانیز کی وزارت نے بالکل کام نہیں کیا، ماضی میں اس وزارت کو او پی ایف اور ای او بی آئی میں کرپشن کے حوالے سے جانا جاتا تھا۔

معاونِ خصوصی نے کہا کہ اوورسیز پاکستانیز کی وزارت کا ہر ادارہ تباہ حال ہے، وزارت کی حالت ٹھیک کرنے کے لیے ہمیں کچھ وقت درکار ہے، ہم ان اداروں کو ٹھیک کر رہے ہیں۔

یہ بھی پڑھیں:  سعودی جیلوں میں قید پاکستانیوں کا وطن واپسی کا سلسلہ شروع ہوگیا

زلفی بخاری نے کہا ’میں اس بات کا شوقین نہیں ہوں کہ او پی ایف (اوورسیز پاکستانیز فاؤنڈیشن) کی نئی ہاؤسنگ اسکیم کا اعلان کروں، میں چاہتا ہوں کہ ماضی میں جن افراد سے پیسے لیے جا چکے ہیں ان کو ڈیلیور کروں۔‘

یاد رہے کہ سعودی ولیٔ عہد محمد بن سلمان کی پاکستان آمد کے موقع پر وزیرِ اعظم عمران خان نے ان سے سعودی عرب کی مختلف جیلوں میں قید 2107 پاکستانیوں کی رہائی کی درخواست کی تھی، جس پر ولیٔ عہد نے قیدیوں کی فوری رہائی کا شاہی فرمان جاری کیا۔