اسلام آباد : اُوگرا نے پیٹرولیم مصنوعات دو سے ساڑھے سترہ روپے فی لیٹرتک مہنگی کرنے کی سمری وزارت پیٹرولیم کو ارسال کردی ، پیٹرول کی قیمت میں 3 روپے اور مٹی کا تیل ساڑھے سترہ روپے فی لیٹر تک اضافے کی سفارش کی گئی ہے، نئی قیمتوں کا اطلاق یکم مارچ سے ہوگا۔
تفصیلات کے مطابق حکومت نے مہنگائی کی چکی میں پسے عوام پر ایک اُور وار کرنے کی تیاری کرلی، آئل اینڈ گیس ریگولیٹری اتھارٹی (اوگرا) نے پیٹرولیم مصنوعات کی قیمتوں میں اضافے کی سمری ارسال کردی ہے۔
سمری میں ہائی اسپیڈ ڈیزل دو روپے اٹھارہ پیسے۔ پیٹرول تین روپے فی لیٹر اُور مٹی کےتیل کی قیمت ساڑھےسترہ روپے فی لیٹر تک بڑھانےکی تجویز دی گئی ہے۔
لائیٹ ڈیزل آئل کی قیمت میں 10روپے94 پیسےفی لیٹر اضافےکی سفارش کی گئی ہے۔ وزارت پٹرولیم وزارت خزانہ سی مشاورت کے بعد پٹرولیم مصنوعات کی قیمتوں میں ردوبدل کا حتمی فیصلہ آج منگل کو کریگی۔
نئی قیمتوں کا اعلان وزیرخزانہ اسحاق ڈار کریں گے، جس کے بعد یکم مارچ سے پیٹرولیم مصنوعات نئی قیمتوں پر فروخت کی جائیں گی۔
