اسلام آباد: پاکستان اور آئی ایم ایف کے درمیان مذاکرات کا آخری مرحلہ جاری ہے، ذرائع کا کہنا ہے کہ پاکستان اور آئی ایم ایف کا تقریباً تمام نکات پر اتفاق ہو گیا ہے۔
تفصیلات کے مطابق پاکستان آئی ایم ایف مذاکرات کامیابی سے قریب تر پہنچ گئے ہیں، ذرائع نے بتایا ہے کہ بجلی سبسڈی سے متعلق پاکستان اور آئی ایم ایف میں پالیسی مذاکرات بھی کامیاب رہے۔
ذرائع کے مطابق نگراں حکومت بجلی کا بنیادی ٹیرف نہیں بڑھائے گی، مارچ تک بجلی کے بنیادی ٹیرف میں کوئی اضافہ نہیں ہوگا۔ آئی ایم ایف نے سرکلر ڈیٹ کا بوجھ کم کرنے کے لیے عارضی سرچارج لگانے کا مطالبہ کیا ہے، سرکلر ڈیٹ کم کرنے کے لیے 95 پیسے فی یونٹ سرچارج عائد کرنے کا آئی ایم ایف کا مطالبہ ہے۔
ذرائع وزارت خزانہ کا کہنا ہے کہ پاکستان اور آئی ایم ایف میں پالیسی سطح مذاکرات کا آج آخری راؤنڈ ہوگا، شیڈول کے مطابق پہلے جائزہ مذاکرات آج ختم ہو جائیں گے، مذاکرات کی کامیابی آئی ایم ایف کے اطمینان سے مشروط ہے، مذاکرات کی کامیابی پر پاکستان اور آئی ایم ایف میں اسٹاف سطح کا معاہدہ ہوگا۔
ذرائع کے مطابق مذاکرات کی کامیابی پر پاکستان کو تقریباً 70 کروڑ ڈالرز کی دوسری قسط ملے گی، اس وقت آئی ایم ایف کے ساتھ مذاکرات تعمیری اور مثبت انداز میں جاری ہیں، آئی ایم ایف نے بیرونی فنانسنگ ضروریات سے متعلق تحفظات ظاہر کیے ہیں، اور آئی ایم ایف کو خدشہ ہے کہ رواں مالی سال کا ٹیکس ہدف حاصل نہ ہو سکے گا، آئی ایم ایف نے ایس آئی ایف سی کے حوالے سے بھی سوالات اٹھائے، تاہم حکومت نے آئی ایم ایف کے اٹھائے گئے اعتراضات دور کرنے کی کوشش کی ہے۔
