Tag: آرمی چیف

آرمی چیف جنرل عاصم منیر نے کہا ہے کہ پاک فوج حکومت اور اداروں کو دہشتگردوں کی مالی اعانت کیخلاف قانونی اقدامات میں مکمل تعاون فراہم کرے گی۔

آئی ایس پی آر کے مطابق آرمی چیف جنرل عاصم منیر کی زیر صدارت 268 ویں کور کمانڈرز کانفرنس ہوئی جس میں فورم کو خطےکی موجودہ صورتحال، قومی سلامتی کو درپیش چیلنجز سے متعلق بریفنگ دی گئی اور شرکا کو خطرات کے جواب میں پاکستان کی حکمت عملی کے بارے میں آگاہ کیا گیا جبکہ کانفرنس میں علاقائی اور داخلی سلامتی کی صورتحال کا بھی تفصیلی جائزہ لیا گیا۔

کور کمانڈر کانفرنس سے خطاب کرتے ہوئے آرمی چیف جنرل عاصم منیر نے پاکستان بھر میں نیشنل ایکشن پلان کے تحت قائم شدہ ضلعی رابطہ کمیٹیوں کے آغاز کو سراہا اور بغیر کسی رکاوٹ نیشنل ایکشن پلان کے تیز نفاذ کی ضرورت پر زور دیا۔

آرمی چیف نے کہا کہ نیشنل ایکشن پلان کے نفاذ میں حکومتی ہدایات کے مطابق تمام ادارے ہم آہنگی، مربوط کوششوں اور تعاون کو یقینی بنائیں۔ پاک فوج حکومت اور اداروں کو دہشتگردوں کی مالی اعانت کے خلاف قانونی اقدامات میں مکمل تعاون فراہم کرے گی۔

ان کا کہناتھا کہ غیر قانونی سر گرمیاں دہشت گردی کی مالی معاونت سے اندرونی طور پر جڑی ہوئی ہیں۔ تاہم پاکستان میں دہشت گردوں اور ان کے سہولت کاروں کے لیے کوئی جگہ نہیں ہے۔

آئی ایس پی آر کےجاری اعلامیہ کے مطابق کور کمانڈر کانفرنس میں ہر قیمت پر اور بلاتفریق دہشتگردی کو ختم کرنے کے عزم کا اعادہ کیا گیا اور کہا گیا ہے کہ کسی کو بھی بلوچستان کے امن میں خلل ڈالنےکی اجازت نہیں دی جائے گی۔

فورم کا کہنا تھا کہ پاکستان کو غیر مستحکم کرنےکی کوشش کرنے والےملک دشمن عناصر ہیں اور ان ملک دشمن عناصر اور ان کے سہولت کاروں کے خلاف ریاست پوری طاقت سے نمٹے گی۔

شرکا کانفرنس کا کہناتھاکہ ریاستی ادارے آئین کے دائرے میں رہتے ہوئے قانون پر پوری استقامت سے عمل درآمد کریں گے اور قانون کی عملداری میں کسی قسم کی نرمی اور کوتاہی نہیں برتی جائے گی۔

شرکا کانفرنس کا کہنا تھا کہ بلوچستان میں تمام ملکی اور غیر ملکی عناصر کا اصل چہرہ اور گٹھ جوڑ، انتشار پھیلانے اور پروان چڑھانے کی کوششیں پوری طرح بے نقاب ہوچکی ہیں۔ ایسے عناصر اور کوششیں کرنے والوں کو کسی قسم کی معافی نہیں دی جائے گی اور بلوچستان کے استحکام میں خلل ڈالنے والے مذموم سیاسی مفادات کو ناکام بنایا جائے گا۔

فورم نے نیشنل ایکشن پلان کے دائرہ کار کےتحت ’’عزم استحکام‘‘ کی حکمت عملی کے موثر نفاذ کی ضرورت پر زور دیتے ہوئے دہشتگردی کے خلاف قوم کے تعاون سے مشترکہ نکتہ نظر کی اہمیت کو بھیاجاگر کیا۔

کانفرنس کے شرکا نے بھارت کی مقبوضہ جموں وکشمیر میں انسانی حقوق کی جاری سنگین خلاف ورزیوں پر گہری تشویش کا اظہار کرتے ہوئے ایل او سی پر بھارتی فوج کی بلا اشتعال جنگ بندی کی خلاف ورزیوں پر بھی خدشات ظاہر کیے۔

فورم نے مقبوضہ کشمیر کے عوام کے منصفانہ حقوق کے لیے پاکستان کی غیر متزلزل حمایت پر زور دیتے ہوئے عالمی سطح پر مقبوضہ کشمیر میں انسانی حقوق کی خلاف ورزیوں کو اجاگر کرنےکے لیے سفارتی کوشش پر زور دیا۔

فورم نے فلسطینی عوام کے ساتھ یکجہتی کا اظہار کرتے ہوئے غزہ میں انسانی حقوق کی خلاف ورزیوں اور جنگی جرائم کی مذمت کی اور فلسطینی عوام کی غیر متزلزل سفارتی، سیاسی اور اخلاقی حمایت کا اعادہ کیا۔

کانفرنس کے اختتام پر آرمی چیف نے فیلڈ کمانڈرز کو آپریشنل تیاری اور پیشہ ورانہ مہارت کے اعلیٰ معیارات کو برقرار رکھنے اور بہترین جنگی تیاریوں کو برقرار رکھنے کے لیے تربیت کو یقینی بنانے پر بھی زور دیا۔

کور کمانڈر اجلاس میں مادر وطن کے امن اور استحکام کے لیے شہدائے افواج پاکستان کو خراج عقیدت پیش کرتے ہوئے شہدا کے ایصال ثواب کے لیے فاتحہ خوانی کی اور قانون نافذ کرنے والے اداروں اور شہریوں کی لازوال قربانیوں کو خراج عقیدت پیش کیا۔

پاک فوج کے سپہ سالار جنرل سید عاصم منیر نے کہا ہے کہ فتنہ الخوارج ہتھیار ڈال دیں تو پھر وہ ریاست سے رحم کی توقع کر سکتے ہیں۔

اے آر وائی نیوز کے مطابق پاک فوج کے سربراہ جنرل سید عاصم منیر نے مختلف جامعات کے طلبہ سے خصوصی گفتگو کرتے ہوئے کہا ہے کہ پاکستانی عوام بالخصوص نوجوانوں کا پاک فوج سے انتہائی مضبوط رشتہ ہے۔ دشمن عناصر کی فوج اور عوام میں خلیج کی کوشش ہمیشہ ناکام رہی اور رہے گی۔

آرمی چیف نے کہا کہ ہمیں اپنے مذہب، تہذیب اور روایات پر فخر ہے۔ پاکستان کے آئین کا آغاز بھی حاکمیت صرف اللہ کے نام سے ہوتا ہے۔ یہ فتنہ الخوارج کس شریعت اور دین کی بات کرتے ہیں؟ ہم کبھی فتنہ الخوارج کو فرسودہ سوچ ملک پر مسلط نہیں کرنے دینگے۔

جنرل سید عاصم منیر نے کہا کہ پاک فوج آج کل فسادیوں اور فتنہ الخوارج سے لڑ رہی ہے۔ جہاد کے نام پر لڑنے والے خوارج ہیں جو دین سے نکلے ہوئے ہیں۔ خوارج کے پاس اسلام کی غلط تشریح ہے، جو دین میں جائز نہیں اور ہم خارجیوں کی مذہب کے حوالےسے تشریح سے متفق نہیں ہیں۔ وہ ریاست کے سامنے ہتھیار ڈال دیں تو رحم کی توقع کر سکتے ہیں۔

ان کا کہنا تھا کہ کے پی اور بلوچستان کےغیور لوگ دہشت گردوں کیخلاف آہنی دیوار کی طرح کھڑے ہیں۔ افواج پاکستان کیلیے صرف پاکستانیت اہم ہے۔ قوم بالخصوص نوجوان پاک فوج کے پیچھے کھڑے ہیں اور پاکستان کا مستقبل محفوظ ہاتھوں میں ہے۔

آرمی چیف نے مزید کہا کہ جب تک قربانی کا جذبہ ہے، ان شااللہ پاک فوج کبھی نہیں ہارے گی۔ پختون، سندھی، بلوچ ہو یا پنجابی۔ افواج پاکستان میں ہم سب ساتھیوں کی طرح مل کر دہشت گردوں سے لڑتے ہیں۔

جنرل عاصم منیر نے مزید کہا کہ دین اسلام نے خواتین کو ہر رشتے میں سب سے زیادہ عزت دی ہے۔ جب دین نے خواتین کو جب عزت دی، تو تم کون ہوتے ہو چھیننے والے۔ ہم کسی گمراہ گروہ کو کبھی بھی اپنے ملک پر اپنی اقدار مسلط کرنے کی اجازت نہیں دینگے۔

پشاور: آرمی چیف جنرل عاصم منیر کا کہنا ہے کہ خیبرپختونخوا میں کوئی بڑے پیمانے پر آپریشن نہیں کیا جارہا۔

آرمی چیف جنرل سید عاصم منیر نے سیاسی قائدین سے پشاور میں گفتگو کرتے ہوئے کہا کہ ہماری پالیسی صرف اور صرف پاکستان ہے، فتنہ الخوارج کی پاکستان کے کسی علاقے میں بھی عملداری نہیں ہے، صرف انٹیلیجنس بنیاد پر ٹارگٹڈ کارروائی کی جاتی ہے۔

انہوں نے کہا کہ کیا فساد فی الارض اللہ کے نزدیک ایک بہت بڑا گناہ نہیں؟ ریاست ہے تو سیاست ہے، خدانخواستہ ریاست نہیں تو کچھ بھی نہیں۔

آرمی چیف کا کہنا ہے کہ افغانستان ہمارا برادر پڑوسی اسلامی ملک ہے، پاکستان ہمیشہ بہتر تعلقات کا خواہاں رہا ہے، افغانستان سے صرف فتنہ الخوارج کی موجودگی، سرحد پار سے دہشت گردی پھیلانے پر اختلاف ہے اور یہ اس وقت تک رہے گا جب تک اس مسئلے کو وہ حل نہیں کرتے۔

پاک فوج کے سپہ سالار نے کہا کہ ہم سب کو بلاتفریق دہشت گردی کے خلاف یکجا کھڑا ہونا ہوگا، جب ہم متحد ہوکر چلیں گے تو صورت حال جلد بہتر ہوجائے گی، انسا خطا کا پتلا ہے ہم سب غلطیاں کرتے ہیں، ان غلطیوں کو نہ ماننا اور سبق نہ سیکھنا اس سے بھی بڑی غلطی ہے۔

انہوں نے مزید کہا کہ عوام اور فوج کے درمیان ایک خاص رشتہ ہے، اس رشتے میں کسی خلیج کا جھوٹا بیانیہ مخصوص ایجنڈے پر چلایا جاتا ہے، نیشنل ایکشن پلان پر سب پارٹیز کا اتفاق حوصلہ مند ہے مگر تیزی سے کام کرنا ہوگا۔

آرمی چیف جنرل عاصم منیر کا کہنا ہے کہ فتنہ الخوارج اور ان کے نیٹ ورک کے خلاف متحد ہیں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے پشاور کا دورہ کیا اس موقع پر انہیں انسداد دہشت گردی آپریشنز پر بریفنگ دی گئی جس میں وفاقی وزیر داخلہ، وزیر اعلیٰ کے پی، گورنر فیصل کریم کنڈی، حافظ نعیم الرحمان، ایمل ولی خان، آفتاب شیرپاؤ، امیر مقام، امیر حیدر ہوتی اور اعلیٰ حکام نے شرکت کی۔

آرمی چیف نے مسلح افواج اور قانون نافذ کرنے والے اداروں کی قربانیوں کو سراہا۔

پاک فوج کے سپہ سالار نے کہا کہ سیکیورٹی فورسز نے اس فتنے کے خلاف نمایاں کامیابیاں حاصل کیں، لگن، عزم اور قربانیوں کے ساتھ فتنے کے خلاف کامیابی حاصل کریں گے۔

انہوں نے کہا کہ ہماری افواج نے دہشت گردوں کے لیڈروں کا خاتمہ یقینی بنایا ہے، دہشت گرد تنظیموں کا ڈھانچہ تباہ اور سہولت کاروں کو نشانہ بنایا گیا، دہشت گردوں کی اس سرزمین پر کوئی جگہ نہیں جنگ کو منطقی انجام تک پہنچائیں گے۔

آرمی چیف نے کہا کہ قیام امن، دہشت گرد حملے ناکام بنانے میں اداروں کا بڑا کردار ہے، سیکیورٹی فورسز نے ہر آپریشن میں بھرپور کردار ادا کیا، امن سبوتاژ کرنے کی ہرکوشش کو سختی سے ناکام بنادیں گے۔

انہوں نے کہا کہ دشمن نفرت اور خوف کا بیج بونا چاہتا ہے ہم کامیاب نہیں ہونے دیں گے، دشمن بھاری نقصان اٹھاتا رہے گا۔

علاوہ ازیں آرمی چیف کی خیبرپختونخوا کے سیاست دانوں سے بھی بات چیت ہوئی، مختلف سیاسی جماعتوں کے رہنماأں نے مختلف امور پر اظہار خیال کیا اور مشترکہ عزم کا اظہار کیا۔