Tag: آلائشیں

کراچی: شہرقائد کے ضلع غربی اور ضلع غربی میں آلائشیں اٹھانے کا عمل سست روی کا شکار ہوگیا، وزیر بلدیات سعید غنی نے اعتراف کرلیا کہ آلائشیں اٹھانا میئر کراچی کی ذمہ داری نہیں ہے۔

تفصیلات کے مطابق عید ِ قرباں کے دوسرے دن بھی آلائشیں اٹھانے کا عمل سست روی کا شکار ہے، وزیر بلدیات سندھ سعید غنی نے میڈیا سے گفتگو کرتے ہوئے اعتراف کیا کہ آلائشیں ٹھکانے لگا نا شہری حکومت کے دائرہ اختیار میں نہیں ہے، تاہم اس کے باوجود شہر میں ڈی ایم سیز کی گاڑیاں سرگرمِ عمل نظر آرہی ہیں۔

ذرائع کا کہنا ہے کہ ضلع غربی کے علاقے مومن آباد روڈ کا برا حال ہے وہاں آلائشوں کے ڈھیر ہیں اور ان سے شدید تعفن اٹھ رہا ہے جس کے سبب شہریوں کو شدید مشکلات درپیش ہیں، اے آروائی نیوز کو ضلع وسطی سمیت شہر کے مختلف علاقوں سے موصول ہونے والی ویڈیوز اور تصاویر میں شہری اسی نوعیت کی صورتحال کی شکایت کرتے نظر آرہے ہیں۔

گزشتہ روز میڈیا سے گفتگو کرتے ہوئے سعید غنی کا کہنا تھا کہ تمام اداروں سے رابطے میں ہیں، شکایات موصول ہونے پر فوری طور پر آلائشوں کو اٹھایا جارہا ہے اور صفائی پر توجہ دی جارہی ہے۔

دوسری جانب عید سے ایک روز قبل میئر کراچی وسیم اختر کا کہنا تھا کہ عید کے تینوں دن بلدیاتی نمائندے سڑکوں پر ہوں گے، وہ خود بھی علاقوں کا دورہ کرتے رہیں گے۔ انھوں نے سعید غنی کو مخاطب کر کے کہا ’ہم نے پلان ترتیب دے دیا ہے، آپ کو پریشان ہونے کی ضرورت نہیں۔‘