(15 اگست 2025): آوارہ کتے انسانوں کے لیے خطرناک ثابت ہوتے ہیں ایک ملک کامیابی سے ان کا خاتمہ کر کے آوارہ کتوں سے پاک دنیا کا پہلا ملک بن گیا ہے۔
دنیا کا یہ واحد ملک نیدر لینڈ ہے جس نے ریبیز کی بڑھتی تعداد کے پیش نظر آوارہ کتوں کا خوش اسلوبی سے خاتمہ کیا۔ تاہم اس کے لیے وہاں کی حکومت نے پہلے اپنے عوام میں آگہی پیدا کی، کیونکہ اس ملک میں کتوں کو خوشحالی کی علامت سمجھا جاتا تھا اور امیر لوگ گھروں میں کتوں کو پالتے تھے۔
غیر ملکی میڈیا کے مطابق انیسویں صدی میں کتے کے کاٹے میں تیزی سے اضافہ ہونے اور لوگوں کے اس سے متاثر ہونے کے بعد وہاں کے عوام نے اپنے پالتو کتے سڑکوں پر چھوڑنا یا انہیں مارنا شروع کر دیا تاہم حکومت نے اپنے عوام کو اس ظالمانہ اقدامات سے روکتے ہوئے انہیں راغب کیا کہ وہ جانوروں کو دکان کے بجائے شیلٹر ہوم سے خریدیں۔
دوسری جانب نیدر لینڈ کی حکومت نے آوارہ کتوں کے حملوں کو سنجیدگی سے لیتے ہوئے ان کے خاتمے کے لیے نس بندی کی پالیسی اپنائی اور یہ مہم شروع کی جس سے آوارہ کتوں کی آبادی میں اضافہ رک گیا اور کچھ عرصہ بعد وہ دنیا کا پہلا ملک بن گیا جہاں آوارہ کتے نہیں ہیں۔
تاہم نیدر لینڈ کی حکومت نے پالتو کتوں کے لیے رجسٹریشن لازمی قرار دی اور لوگوں کو پالتو جانور کے طور پر گود لینےکی جانب راغب کیا جس کی وجہ سے آج نیدر لینڈ کے ہر گھر میں کتا ضرور ہوگا، مگر سڑکوں پر آوارہ کتا ڈھونڈے سے نہیں ملے گا۔
