اٹک : ڈینگی مار اسپرے سے متاثرہ طالبات کی حالت سنبھل نہ سکی۔ انتیس طالبات کوایک مرتبہ پھر اسپتال منتقل کردیاگیاہے۔
تفصیلات کے مطابق اٹک میں انتظامیہ کی غفلت کی سزا اسکول کی طالبات کو ملی۔ جمعرات کے روز ڈینگی مار اسپرے سے گورنمنٹ گرلز پرائمری اسکول جنڈ کی سو سے زائد طالبات بے ہوش ہوگئی تھیں۔
متاثرہ طالبات طبی امداد اورآرام کے بعدپیر کے روز جب دوبارہ اسکول پہنچیں تو انتیس طالبات کی طبیعت ایک مرتبہ پھربگڑ گئی، بچیوں کو فوری طبی امداد کے لئے اٹک کے مقامی اسپتال منتقل کیا گیاہے۔
جمعہ کے روزبھی سترہ طالبات کو تشویشناک حالت میں راولپنڈی ڈسٹرکٹ اسپتال لایا گیاتھا۔
واضح رہے کہ اٹک کےسرکاری اسکول میں آدھی چھٹی کےوقت کسی احتیاطی تدبیر کے بغیر زہریلا مچھرماراسپرے کردیاگیاتھا۔
انتظامیہ کی جانب سے ڈینگی سے بچاؤ کی مہم تو چلائی جارہی ہے لیکن احتیاطی تدابیر کا ایک پمفلٹ تک نہیں چھاپا گیا۔ عملےکی یہ بھی علم نہ تھا کہ یہ اسپرے بچیوں کےلئےکتنا نقصان دہ ہوسکتا ہے۔
