Tag: اپوزیشن کا واک آؤٹ

سینیٹ میں وزراء کی عدم موجودگی اور سوالوں کے تفصیلی جواب نہ دینے پر اپوزیشن نے ایوان سے واک آؤٹ کیا جبکہ حکومتی اور اپوزیشن کے ارکان کے درمیان چیئرمین نادرا کے استعفے پر گرما گرمی بھی ہوئی۔

سینیٹ میں وزراء کی عدم موجودگی اور سوالوں کے تفصیلی جواب نہ دینے پر اپوزیشن نے ایوان سے واک آؤٹ کیا، چیئرمین نیئر حسین بخاری کی صدارت میں ہونے والے اجلاس میں وزیر ریلوے خواجہ سعد رفیق اور اپوزیشن لیڈر اعتزاز احسن کے درمیان چیئرمین نادرا کے استعفے کے معاملے پر گرما گرمی ہوئی۔

جس پر چیئرمین سینیٹ کے کہنے پر وزیراطلاعات پرویز رشید کو مداخلت کرنی پڑی اور انہوں نے اعتزاز احسن کے سوال کا جواب دیا، اعتزاز احسن کا کہنا تھا کہ چیئرمین نادرا کو جبری طور پر برطرف کیا گیا اور ان کی بیٹی کو بھی دھمکیاں دی گئیں،  خواجہ سعد رفیق کی مداخلت پر ایوان میں شور شرابہ مچ گیا۔

وزیراطلاعات نشریات پرویزرشید نے مداخلت کرتے ہوئے کہا کہ چیئرمین نادرا کی برطرفی کے حوالے سے ایک کالم شائع کیا گیا تھا اور اس کالم کا جواب بھی اسی اخبار میں شائع ہوا تھا، اعتزاز احسن کو وہ کالم بھی پڑھ لینا چاہیئے، اس سے قبل سینیٹ میں اراکین نے مطالبہ کیا کہ وزرا کی موجودگی اور سوالوں کے مفصل جوابات کی فراہمی حکومت یقینی بنائے۔