الیکشن کمیشن آف پاکستان کی جانب سے ملک کی سیاسی جماعتوں سے اکاؤنٹس کے گوشوارے طلب کرلیے گئے ہیں۔
سیاسی جماعتوں سے کہا گیا ہے کہ انھیں سال 24-2023 کے گوشوارے 29 اگست تک جمع کرانا ہونگے، الیکشن کمیشن کے مطابق سیاسی جماعتوں کو اپنی سالانہ آمدن، اخراجات، فنڈنگز ذرائع، اثاثے اور واجبات کی تفصیلات پیش کرنا ہونگی۔
الیکشن کمیشن نے سیاسی پارٹیوں سے جو گوشوارے طلب کیے ہیں اس میں سیاسی جماعتوں کو بتانا ہوگا کہ انھیں ممنوعہ ذرائع سے پارٹی فنڈزنہیں ملا۔
دریں اثنا الیکشن کمیشن نے مخصوص سیٹوں سے متعلق اہم کیس میں سپریم کورٹ کے فیصلے پر ردعمل دیتے ہوئے کہا تھا کہ الیکشن کمیشن نے کبھی نہیں کہا کہ پی ٹی آئی سیاسی پارٹی نہیں ہے۔
الیکشن کمیشن کا کہنا تھا کہ پی ٹی آئی سیاسی پارٹی ہے اور اس کا نام بھی سیاسی پارٹیوں کی فہرست میں موجود ہے۔
ادارے نے بتایا تھا کہ پی ٹی آئی کا نام الیکشن کمیشن کی ویب سائٹ پر بھی موجود ہے، الیکشن کمیشن نے کسی فیصلے کی غلط تشریح نہیں کی ہے۔
انٹرا پارٹی الیکشن درست نہ ہونے پر پی ٹی آئی سے بلے کا نشان لیا گیا تھا، الیکشنز ایکٹ کی دفعہ 215 کے تحت بلے کا نشان لیا گیا تھا۔