اسلام آباد : پاکستان تحریک انصاف کے بانی رکن اکبرایس بابر نے انٹراپارٹی الیکشن چیلنج کردیا، جس میں استدعا کی ہے کہ الیکشن کمیشن نئے انٹرا پارٹی الیکشن کرانے کا حکم دے۔
تفصیلات کے مطابق پاکستان تحریک انصاف کے انٹرا پارٹی الیکشن چیلنج کردیئے گئے ، اس سلسلے میں بانی رکن اکبر ایس بابر نے الیکشن کمیشن میں باضابطہ درخواست دائر کردی ہے۔
اکبرایس بابر نے استدعا کی ہے کہ الیکشن کمیشن نئے انٹرا پارٹی الیکشن کرانے کا حکم دے اور الیکشن کمیشن غیرجانبدارتیسراافریق مقرر کرے جوانٹرا پارٹی الیکشن کی نگرانی کرے۔
درخواست میں یہ بھی استدعا کی گئی کہ شفاف انٹراپارٹی الیکشن کرانے تک انتخابی نشان ’’بلا‘‘استعمال کرنےکی اجازت نہ دی جائے۔
درخواست میں مؤقف اختیار کیا گیا کہ پی ٹی آئی الیکشن محض دکھاوا ،فریب اور لیکشن کمیشن کو دھوکا دینے کی ناکام کوشش تھی، فراڈ انتخابی عمل نےپی ٹی آئی ارکان کوووٹ دینے ، انتخاب میں حصہ لینےکے حق سے محروم کردیا جبکہ الیکشن ایکٹ 217 کے سیکشن 208 اور ذیلی شق 2 کی خلاف ورزی کی گئی۔
اکبر بابر نے درخواست کے ساتھ وڈیو فوٹیج اور دیگر دستاویزات بھی جمع کرادیں اور درخواست میں الیکشن ایکٹ 2017 کے سیکشن 208کا حوالہ دیا گیا ہے۔
درخواست میں کہنا تھا کہ الیکشن قواعد وضوابط، شیڈول، کاغذات نامزدگی کاوقت اور طریقہ کار کا نہیں بتایاگیا ، نیاز اللہ نیازی کو چیف الیکشن کمشنر مقرر کیاگیا ، وفاقی سطح پر کسی اور عہدیدار کا نام نہیں بتایا گیا۔
درخواست گزار نے کہا کہ 2 دسمبر تک انتخابات کے بارے میں کسی قسم کی معلومات پی ٹی آئی ویب سائٹ پر دستیاب نہیں تھیں ، یکم دسمبر2023 کو چار بجکر 45 منٹ پر پی ٹی آئی ارکان کےوفد کےہمراہ مرکزی سیکریٹریٹ گیا لیکن پی ٹی آئی نمائندے نے مطلوبہ معلومات فراہم کرنے سے معذوری ظاہر کی اور اسی روز الیکٹرانک میڈیا پر پی ٹی آئی عہدیداروں کے بلامقابلہ انتخاب کی خبریں نشر ہوئیں۔
بانی رکن کا کہنا تھا کہ قانون کے مطابق سیاسی جماعت کے ہر رکن کو کسی بھی عہدے پر انتخاب لڑنے کی اجازت ہوگی، قانون کے مطابق تمام سیاسی جماعتوں کا الیکٹورل کالج ہوگا ، انتخابی کالج وفاقی، صوبائی اور مقامی سطح پر پارٹی کی جنرل کونسل پر مشتمل ہوگا۔
درخواست میں کہا گیا کہ سیاسی جماعت مرکزی عہدیداروں ،ایگزیکٹو کمیٹی ارکان کی تازہ ترین فہرست جاری کرنےکی پابند ہیں ،فہرستوں میں کسی تبدیلی کے بارے میں الیکشن کمیشن کو آگاہ کیاجائے گا، ابھی پی ٹی آئی رکن ہوں، الیکشن کمیشن اور اسلام آباد ہائیکورٹ فیصلہ دے چکے ہیں۔
اکبرایس بابر نے مزید کہا کہ سیاسی جماعتوں میں جعلی انٹراپارٹی الیکشن کے عمل کو ختم کیا جائے، تمام بڑی سیاسی جماعتوں کو انتخابی قوانین اور ضابطوں کا پابند بنایاجائے، معاشرے اور ملک کو درپیش مسائل سے نکالنے کا یہی ایک واحد طریقہ ہے۔