Tag: اکبر بادشاہ

جلال الدّین اکبر کے دربار میں‌ ملّا عبد القادر بدایونی کو تصنیف و تالیف اور ترجمہ کی ذمہ داری سونپی گئی تھی جنھیں علومِ معقول و منقول دونوں‌ میں کامل دست گاہ تھی۔ انہی عبدالقادر بدایونی کی ایک کتاب منتخبُ التّواریخ بہت مشہور ہے جو اصلاً فارسی زبان میں ہے اور متعدد جلدوں میں اس کے اردو تراجم موجود ہیں۔

ملّا عبد القادر بدایونی کا سنہ پیدائش 1540ء بتایا جاتا ہے۔ انھیں اپنے دور کا ایک ادیب اور انشا پرداز لکھا گیا ہے جو ہند فارسی مؤرخ اور مترجم کی حیثیت سے بھی مشہور ہوئے۔ ملا عبدالقادر 1605ء میں آج ہی کے روز وفات پاگئے تھے۔

ملّا عبدالقادر بدایونی کی مؤلفہ فارسی کتاب بعنوان منتخب التواریخ میں سلطنتِ غزنویہ کے بانی امیر ناصر الدّین سبکتگین کی تخت نشینی سے لے کر عہدِ اکبری تک کے واقعات پڑھنے کو ملتے ہیں۔ اس کتاب کے مخطوطات برٹش میوزیم اور ہندوستان کے مختلف کتب خانوں میں موجود ہیں۔ ملا عبدالقادر بدایونی اس کی وجہِ تصنیف بتاتے ہوئے رقم طراز ہیں۔

"بنی نوع انسان کے اِس دعاگو عبدالقادر بن ملوک شاہ بدایونی نے 999ھ کے اوائل میں حضرت خلیفہ زماں ظل اِلہٰی اکبر بادشاہ کے حکم کی تعمیل میں انتخابِ تاریخ کشمیر کا ہندی سے فارسی زبان میں ترجمہ کرنے سے فراغت پائی۔ مجھے چوں کہ بچپن سے بڑھاپے تک اِس علم تاریخ سے انسیت رہی ہے، اِس لیے اِس عرصہ میں کوئی وقت ایسا نہیں گزرا کہ میں اِس علم کے مطالعہ یا تحریر میں مشغول نہیں رہا، خواہ اپنی رغبت سے تھا یا کسی دوسرے کے حکم کی تعمیل میں، چنانچہ بارہا میرے دل میں آیا کہ دارالسلطنت دہلی کے بادشاہوں کے بارے میں اِختصار سے کچھ لکھا جائے یعنی ابتدائے اسلام کے زمانہ سے لے کر اِس زمانِ تحریر تک مختصراً لکھا جائے تاکہ ہر بادشاہ کے احوال کی وہ ایک ایسی اجمالی یادداشت ہو جو احباب کے لیے تذکرہ کا کام دے اور اربابِ بصیرت کی نظر میں اُسے تبصرہ کی حیثیت حاصل ہو۔”

یہ سطور کتاب کے موضوع و ابواب کی وضاحت کرتی ہیں۔ کتاب کے تیسرے حصہ میں اُن مشاہیر کا تذکرہ کیا گیا ہے جو عہدِ اکبری میں گزرے۔ ان میں علمائے کرام، شعرا و ادبا، اُمرائے وقت اور دانا و بیدار مغز لوگ شامل ہیں جو مشہور بھی تھے۔ لیکن کہتے ہیں‌ کہ پانچ سال میں‌ پایۂ تکمیل کو پہنچنے والی اس کتاب کا کوئی نسخہ اکبر بادشاہ کے دور میں سامنے نہیں آیا جس کی مختلف وجوہ بیان کی جاتی ہیں۔ حتیٰ کہ عہدِ جہانگیری میں 1616ء تک محققین و مؤرخین اِس کتاب سے لاعلم رہے۔

محققین کے مطابق عبدالقادر بن ملوک شاہ بدایونی شاعر بھی اور فنِ تاریخ نویسی میں نام و مرتبہ پایا۔ وہ کئی علوم جانتے تھے۔ انھوں نے ابتدائی تربیت کے ساتھ ساتھ قرآن پڑھا اور عربی کی تعلیم اپنے نانا سے حاصل کی۔ اس دور میں رسمی تعلیم کے طریقے کے مطابق قصیدہ بردہ شریف اور فقہ کے چند اسباق بھی پڑھے۔ بعد ازاں استاد مبارک ناگوری سے مختلف علوم کی تعلیم لی۔

ملّا عبدالقادر نے اپنے علم و فن کے سبب جلال الدّین اکبر کے دربار میں‌ جگہ پائی اور علمی کام میں مشغول رہے۔ تصنیف و تالیف کے ساتھ انھوں نے کئی کتب کا فارسی ہندی ترجمہ کیا۔ وہ عربی پر بھی مکمل عبور رکھتے تھے۔ ملّا عبدالقادر بدایونی نجوم اور ریاضی جیسے علوم کے علاوہ راگ راگنیوں سے بھی واقف تھے۔

مغلیہ دور کی مشہور شخصیت بیرم خان کو تاریخ‌ ایک ایسے سپاہ سالار کے طور پر یاد کرتی ہے جس نے مغلوں کے اقتدار کو بچانے کی کوشش کی۔ یہ وہ وقت تھا جب مغل بادشاہ ہمایوں آگرہ سے فرار ہو گیا تھا۔ بیرم بیگ یا بیرم خان کو اکبر کے اتالیق ہونے کا اعزاز بھی حاصل ہے۔ بیرم خان ترکی اور فارسی زبانوں پر عبور رکھتا تھا۔ اس نے ان دونوں زبانوں میں شاعری بھی کی۔ وہ علم کا رسیا بھی تھا اور اس کے دربار میں عالم اور اہلِ قلم موجود تھے۔

ترک نسل کے بیرم بیگ نے وسطیٰ بدخشاں کے علاقے میں‌ آنکھ کھولی تھی۔ اس کا باپ سیفالی بیگ بہارلو اور دادا جنبالی بیگ شہنشاہ بابر کی فوج میں تھے۔ مغل بادشاہ ہمایوں نے اسے’’خانِ خاناں‘‘ کا لقب دیا جس کے معنی بادشاہوں کے بادشاہ ہیں، اور اسی کے بعد وہ بیرم خان کے نام سے مشہور ہوا۔ بیرم خان 16 سال کی عمر میں بابر کی فوج میں شامل ہوا تھا اور ایک عرصہ تک مغلوں کی فتوحات میں اس نے اہم کردار ادا کیا۔ مؤرخین کے مطابق جب شیر شاہ سوری سے شکست کھا کر ہمایوں ایران روانہ ہوا تو بیرم خان بھی اس کے ہمراہ تھا۔ جب ہمایوں ایران سے فوج لے کر ہندوستان پر حملہ آور ہوا تو بیرم خان بادشاہ کی فوج کا سپہ سالار تھا۔

بادشاہ اکبر کے دور میں‌ بھی بیرم خان نے حکومت کے استحکام کے لیے ناقابلِ‌ فراموش خدمات انجام دیں۔ وہ اکبر کو سازشوں سے آگاہ کرنے کے علاوہ اس کے اقتدار کو محفوظ بنانے کے لیے بھی اپنی ذہانت اور صلاحیتوں کو بروئے کار لاتا رہا۔ تاریخ بتاتی ہے کہ یہ بیرم خان ہی تھا جس نے اکبر کے خلاف اکثر مہم جوئی ناکام بنائی۔ بیرم خان کا سنہ پیدائش تاریخ کی کتابوں میں‌ 1501ء درج ہے جسے 31 جنوری 1561ء میں قتل کر دیا گیا۔

مؤرخ عبدالقادر بدایونی لکھتے ہیں‌ کہ بیرم خان کا سلسلۂ نسب جہاں شاہ ولد قرا یوسف تک پہنچتا ہے۔ ہمایوں کے انتقال کے وقت اکبر کی عمر صرف چودہ برس تھی، لیکن بیرم خان نے اکبر کے اتالیق کی حیثیت سے اسے مسند اقتدار پر بٹھانے کے بے مثال کردار ادا کیا۔ کہنے کو تو اکبر بادشاہ تھا لیکن مؤرخین کہتے ہیں‌ کہ بادشاہت پانچ سال تک عملی طور پر بیرم خان کے ہاتھ میں تھی اور وہ ہمیشہ ایک وفادار سرپرست کی حیثیت سے امورِ سلطنت چلاتا رہا۔ اکبر 19 برس کا ہوا تو بیرم خان نے امورِ مملکت سے خود کو الگ کر لیا۔ بیرم خان نے پانی پت کی دوسری جنگ میں مغل فوج کی قیادت بھی کی۔ یہ 1556ء کی بات ہے۔

شاہانِ وقت سے قربت کے سبب درباری بیرم خان سے حسد کرتے تھے۔ لیکن بیرم خان سے بھی کچھ غلطیاں‌ بھی سرزد ہوئی تھیں‌ جس نے اس کی وفاداری کو مشکوک اور ساکھ کو نقصان پہنچایا۔ کچھ مؤرخین کے نزدیک 1560ء میں اس کا زوال شروع ہوگیا اور اس کی وجہ اپنے اعزاء کو نوازنا تھا۔ جب اکبر نے بیرم خان کو سبک دوش کرنے کا فیصلہ کیا تو دونوں میں اختلافات پیدا ہوگئے۔ غیر متوقع طور پر بیرم خان نے اکبر کے خلاف بغاوت کا علَم بلند کردیا اور اس کے خلاف فوجی بغاوت کر دی جس میں اسے شکست ہوئی۔ لیکن اس کی مغل خاندان سے وفاداری اور طویل رفاقت کی بنا پر اکبر نے اس کو بخش دیا۔ اکبر نے بیرم خان کو پیش کش کی کہ یا تو دربار سے رخصت لے کر باقی زندگی عیش سے گزار دے یا پھر حج کرنے مکہّ معظمہ چلا جائے۔ بیرم خان نے حج پر جانے کو ترجیح دی اور گجرات کے راستہ سے حرمین شریفین جانےکا قصد کیا۔ مؤرخین لکھتے ہیں‌ کہ وہ راستے میں پٹن میں‌ چند دن ٹھیرا۔ ایک روز وہ سیر و تفریح کی غرض سے نکلا۔ وہ جس علاقہ میں تھا، وہاں ایک مبارک خان لوحانی نامی شخص بھی موجود تھا جس کا باپ ماچھی وارہ کی جنگ میں بیرم خان کے کسی سپاہی کے ہاتھوں مارا گیا تھا۔ اتفاق سے وہ اپنے چالیس افغان ساتھیوں کے ہمراہ اسی مقام پر سیر و تفریح کے لیے آیا ہوا تھا۔ مبارک خان کو جب علم ہوا کہ بیرم خان یہا‌ں موجود ہے تو اس نے ملاقات کا پیغام بھجوایا اور جب وہ بیرم خان کی اجازت سے اس کے پاس پہنچا تو موقع پاکر اس کی پشت پر خنجر مار دیا۔ اس کا یہ وار ہلاکت خیز ثابت ہوا۔ خنجر سینے کے آر پار ہوچکا تھا۔ بیرم خان موقع پر ہی جاں بحق ہوگیا۔

مؤرخین لکھتے ہیں‌ کہ بیرم خان کو مقبرۂ شیخ حسام الدّین کے احاطہ میں سپردِ خاک کیا گیا۔میر علی شیر قانع کا بیان ہے کہ بیرم خان کی لاش پٹن سے دہلی لائی گئی اور اسے امانتاً دفنایا گیا۔ بعد ازاں اس کی وصیت کے مطابق اس کی لاش کو مشہد لے جایا گیا اور وہاں‌ تدفین کی گئی۔

ہندوستان میں بادشاہوں اور والیانِ سلطنت کے درباروں سے مختلف ادوار میں جہاں علم و فضل میں‌ ممتاز شخصیات وابستہ رہی ہیں، وہیں مختلف ذہین اور طبّاع لوگوں کا تذکرہ بھی تاریخی کتب میں ملتا ہے جن میں‌ سے ایک ابو الحسن المعروف ملّا دوپیازہ بھی ہیں۔

یہ اکبر کے دور میں‌ ذہین اور حاضر دماغ مشہور تھے اور دربار سے جڑے ہوئے تھے۔ ان کی سوانح عمری‘‘ اور ان سے متعلق مختلف قصّے اور تذکرے ہمیں کتابوں میں پڑھنے کو ملتے ہیں۔ ملّا دوپیازہ کی حاضر دماغی کا ایک واقعہ منشی محمد الدین فوق کی مرتب کردہ کتاب ’’ابو الحسن ملّا دوپیازہ کی سوانح عمری‘‘ میں‌ موجود ہے جسے ہم یہاں آپ کی دل چسپی کے لیے نقل کررہے ہیں۔

ایک دن کوئی سوداگر اکبر بادشاہ کے پاس چند عمدہ گھوڑے لایا۔ بادشاہ نے گھوڑوں کو پسند کیا اور حکم دیا کہ اسی قسم کے گھوڑے اور لاؤ، اور اس کے واسطے اس سوداگر کو ایک لاکھ روپیہ پیشگی دلوا دیا۔

اس بات کو تھوڑا ہی عرصہ گزرا تھا کہ ایک روز بادشاہ نے ملّا صاحب کو حکم دیا کہ ملک کے بیوقوفوں کی ایک فہرست تیار کر کے دکھلاؤ۔

ملاّ دوپیازہ نے چند ایک نام لکھ کر بادشاہ کی خدمت میں پیش کیے، جن میں بادشاہ کا نام سب سے پہلے لکھا۔ بادشاہ یہ دیکھ کر حیران ہوا اور اس کی وجہ دریافت کی۔

ملّا صاحب نے یاد دلاتے ہوئے فرمایا کہ آپ نے بے سوچے سمجھے ایک لاکھ روپیہ سوداگروں کو دلوا دیا اور وہ اب شکل بھی نہیں دکھلائیں گے۔

بادشاہ نے کہا اگر وہ لے آئے تو؟ ملّا نے جواب دیا، اگر لے آئے تو آپ کا نام کاٹ کر ان کا لکھ دوں گا۔ بادشاہ یہ سن کر لاجواب ہو گیا۔