Tag: اکتوبر وفات

سندھ کے معروف لوک گلوکار سہراب فقیر نے 23 اکتوبر 2009ء میں ہمیشہ کے لیے اپنی آنکھیں موند لی تھیں۔ وہ خاصے عرصے سے بیمار تھے جب کہ فالج نے ان سے وہ آواز بھی چھین لی تھی، جس نے ملک اور بیرونِ‌ ملک صوفیانہ کلام اور لوک گائیکی کے شائقین کو ان کا مداح بنایا تھا۔

سہراب فقیر کا اصل نام سہراب خاصخیلی تھا۔ وہ 1934ء میں خیرپور میرس میں پیدا ہوئے۔ ان کے والد ہمل فقیر بھی اپنے وقت کے نام ور گائیک تھے۔ انہی سے سہراب فقیر نے گائیکی کی ابتدائی تربیت حاصل کی اور پھر پٹیالہ گھرانے کے معروف استاد خان صاحب کیتے خان کے شاگرد ہوگئے اور راگ کے ساتھ ساتھ طبلہ بجانا بھی سیکھا۔

1974ء میں استاد منظور علی خان کے کہنے پر سہراب فقیر نے گائیکی کا آغاز کیا۔ وہ سچل سرمست، شاہ لطیف بھٹائی، سلطان باہو اور بابا بلھے شاہ کا کلام والہانہ انداز میں گاتے تھے جس نے انھیں مقبول لوک گلوکار بنا دیا۔

سہراب فقیر نے متعدد ممالک میں اپنے فن کا جادو جگایا اور کئی اعزازات حاصل کیے جن میں سچل ایوارڈ، قلندر ایوارڈ، لطیف ایوارڈ اور ریڈیو خیرپور کے ایوارڈز سرفہرست ہیں۔ حکومتِ پاکستان نے اس فن میں خدمات کے اعتراف میں انھیں صدارتی تمغہ برائے حسنِ کارکردگی عطا کیا تھا۔

سہراب فقیر کو سائیں سچل سرمست کا کلام خصوصاً سنگ گانے میں ملکہ حاصل تھا۔ انھوں نے آٹھ برس کی عمر سے صوفیوں کا کلام گانا شروع کیا تھا اور ساری زندگی اپنے اس محبوب مشغلے کو جاری رکھا۔ وہ اپنے فن پر اپنی گرفت اور مہارت کے لیے بھی مشہور تھے اور اور یہی وجہ تھی کہ ثقافتی طائفہ کے ساتھ انھیں ضرور بیرونِ ممالک بھیجا جاتا تھا۔ انھوں نے برطانیہ، بھارت، ناروے، سعودی عرب اور دیگر کئی ممالک میں اپنے فن کا مظاہرہ کیا۔

سہراب فقیر سندھی، سرائیکی، پنجابی اور اردو زبانوں میں گاتے تھے۔ سندھی ثقافت کے روایتی رنگ ان کے ملبوس، گلے کی مالا، اجرک، پگڑی کی صورت جھلکتے تھے جب کہ صوفیانہ کلام اور لوک گائیکی کے لیے اسٹیج پر وہ اپنے ساتھیوں کے درمیان روایتی سازوں اور آلاتِ موسیقی کے ساتھ نظر آتے جو خاص طور پر بیرونِ ممالک حاضرینِ محفل کے لیے باعثِ کشش بنتا تھا۔

استاد مبارک علی خان پاکستان کے نام وَر موسیقار اور گلوکار تھے جن کی آج برسی منائی جارہی ہے۔ وہ 21 اکتوبر 1957ء کو کراچی میں وفات پاگئے تھے۔

مبارک علی خان کا گھرانا موسیقی اور گائیکی کے لیے مشہور تھا۔ ان کا تعلق لاہور سے تھا جہاں انھوں نے 1917ء میں آنکھ کھولی۔ وہ استاد علی بخش خان کے فرزند اور استاد برکت علی خان اور استاد بڑے غلام علی خان کے چھوٹے بھائی تھے۔

مبارک علی خان نے 1938ء میں فلمی دنیا سے وابستگی اختیار کی، لیکن سفر کے آغاز پر انھوں نے گلوکار ہی نہیں بلکہ اپنی فن کارانہ صلاحیتوں کو آزماتے ہوئے بطور ہیرو بھی کام کیا تھا۔ یہ مہارانی اور سوہنی کمہارن نامی فلمیں تھیں جو انڈسٹری میں ان کا تعارف ثابت ہوئیں۔

قیام پاکستان کے بعد استاد مبارک علی خان کو فلم دو آنسو اور شالیمار کی موسیقی بھی ترتیب دینے کا موقع ملا۔ وہ موسیقی میں اپنے والد استاد علی بخش خان، بڑے بھائی استاد بڑے غلام علی خان اور استاد سردار خان دہلی والے کے شاگرد رہے۔

استاد مبارک علی خان نے اس فن میں مہارت حاصل کرنے کے بعد سیکڑوں لوگوں کو موسیقی کی تعلیم دی اور فن کاروں کو موسیقی اور گائیکی کی تربیت دی۔ انھوں نے کلاسیکل، دھرپد، خیال، دادرا، ٹھمری، غزل اور گیت میں اپنے فن کو منوایا۔

استاد مبارک علی خان لاہورمیں میانی صاحب کے قبرستان میں آسودۂ خاک ہیں۔

استاد اللہ بخش کو بابائے فطرت اور ثقافتی مصوّر بھی کہا جاتا ہے۔ پاکستان کے اس نام وَر مصوّر کی زندگی کے اوراق 1978ء میں آج ہی کے دن بے رنگ ہوگئے تھے۔

استاد اللہ بخش کو ماڈرن لینڈ اسکیپ اور تشبیہی نقّاشی (Figurative painting) کا ماہر جانا جاتا ہے۔ وہ انتہائی باصلاحیت تھے اور فنِ مصوّری میں مہارت و کمال ان کی توجہ، دل چسپی اور ریاضت و مشق کا نتیجہ تھا۔ البتہ مصوّری میں بنیادی تعلیم منی ایچر پینٹنگ کے ماہر استاد عبد اللہ سے حاصل کی تھی۔

ابتدائی عمر میں انھوں نے تشہیری بورڈ پینٹ کرنے کا کام کیا تھا اور بعد میں بمبئی، کلکتہ میں مختلف اداروں سے وابستہ رہے اور پینٹنگ اور سینری بنانے کا کام کرتے رہے۔ اس طرح انھوں نے رنگوں اور برش کو سمجھا اور تجربہ حاصل کیا۔ لاہور لوٹنے پر ایک اخبار میں کمرشل آرٹسٹ کے طور پر کام کرنا شروع کردیا اور پھر ایک مصوّر کی حیثیت سے پنجاب کی دیہاتی زندگی اور ثقافت کو کینوس پر اتارنے کا وہ سلسلہ شروع کیا جس نے انھیں دنیا بھر میں شہرت دی۔

انھوں نے پنجاب کی رومانی داستانوں کے لافانی کرداروں ہیر رانجھا، سوہنی مہینوال اور مرزا صاحباں کو اپنے مصوّرانہ تخیل سے چار چاند لگا دیے۔

استاد اللہ بخش وزیر آباد میں 1895ء میں پیدا ہوئے تھے۔ استاد اللہ بخش کے والد کرم دین محکمہ ریلوے کی ورک شاپ میں رنگ ساز تھے اور ریل گاڑیوں پر رنگ کیا کرتے تھے، اور اس طرح وہ شروع ہی سے رنگ اور برش سے واقف تھے۔ وہ قدرتی مناظر اور دیہات کے سادہ اور روایتی ماحول میں‌ پلے بڑھے جس کی کشش نے انھیں فن کار بنا دیا۔

وہ آبی، روغنی ، ٹیمپرا اور پوسٹر رنگوں کے علاوہ چاک وغیرہ میں بھی بڑی مہارت سے کام کرتے تھے۔ پنجاب کے دیہات کی روزمرّہ زندگی کی تصویر کشی کے علاوہ انھوں نے زرخیز میدانی علاقوں اور وہاں کی لوک داستانوں کو اپنے فن میں پیش کیا۔ ان کی حقیقت سے قریب تر پینٹنگز رنگوں، زندگی اور جیتے جاگتے لوگوں سے بھرپور تھیں، جس نے دیکھنے والوں کو بہت متاثر کیا۔

1919ء میں انھیں شملہ فائن آرٹس سوسائٹی کی جانب سے انعام سے نوازا گیا تھا اور اخبارات نے انھیں بمبئی کا ماسٹر پینٹر کہا، مگر اس حوصلہ افزائی کے باوجود وہ سب کچھ چھوڑ کر لاہور واپس آگئے۔ وہ سیلانی طبیعت کے سبب کسی ایک جگہ جم کر کام نہیں کر پائے۔ 1924ء میں مہاراجہ جموں کشمیر نے انھیں کورٹ پینٹر کی ملازمت کی پیشکش کی، جہاں وہ تقریباً 1938ء تک خدمات انجام دیتے رہے۔ اس عرصے میں انھوں نے بہت سی تصاویر بنائیں اور 1928ء میں ممبئی میں ہونے والی تصویری نمائش میں ان کے ایک شاہ کار کو اوّل انعام دیا گیا۔ لوگ ان کے فن پاروں سے بہت متاثرہوئے اور ان کا کام مشہور مصوّروں میں زیرِ بحث آیا۔

استاد اللہ بخش کے لاہور میوزیم میں کئی فن پارے رکھے گئے ہیں جو شائقین کی توجہ کا مرکز بنتے ہیں۔

استاد اللہ بخش کو حکومت پاکستان کی طرف سے ’تمغہ حسن کارکردگی‘ سے نوازا گیا تھا۔

ڈاکٹر وحید قریشی پاکستان کے نام وَر ادیب، شاعر، نقّاد، محقّق، معلم اور ماہر لسانیات تھے جنھوں نے کئی تصانیف یادگار چھوڑی ہیں۔ وہ 17 اکتوبر 2009ء کو وفات پاگئے تھے۔

ڈاکٹر وحید قریشی کا تعلق میانوالی سے تھا۔ وہ 14 فروری 1925ء کو پیدا ہوئے۔ پنجاب کے مختلف شہروں کے تعلیمی اداروں سے تحصیلِ علم کے بعد جامعہ تک پہنچے اور فارسی اور تاریخ میں ایم اے کا امتحان پاس کیا۔ انھوں نے بطور ریسرچ اسکالر اپنی ملازمت کا آغاز کیا۔ بعد کے برسوں میں فارسی میں پی ایچ ڈی اور ڈی لٹ کی اسناد حاصل کیں۔ انھوں نے طویل عرصے تک اسلامیہ کالج لاہور اور اورینٹل کالج پنجاب یونیورسٹی میں تدریس کے فرائض انجام دیے۔

علمی استعداد، قابلیت اور تخلیقی صلاحیتوں نے انھیں اپنے ہم عصروں میں مختلف حیثیتوں میں‌ نمایاں کیا اور کئی تعلیمی اداروں کے علاوہ اقبال اکادمی پاکستان، مقتدرہ قومی زبان پاکستان، بزم اقبال اور مغربی پاکستان اردو اکیڈمی سے وابستہ رہے۔

ڈاکٹر وحید قریشی کی تصانیف کی فہرست طویل ہے جس میں شبلی کی حیاتِ معاشقہ، میر حسن اور ان کا زمانہ، مطالعہ حالی، کلاسیکی ادب کا تحقیقی مطالعہ، تنقیدی مطالعے، نذر غالب، اقبال اور پاکستانی قومیت، اساسیات اقبال، قائداعظم اور تحریک پاکستان، مقالات تحقیق، جدیدیت کی تلاش میں، مطالعہ ادبیات فارسی، اردو نثر کے میلانات، پاکستان کے تعلیمی مسائل اور شعری مجموعے شامل ہیں۔

ان کی مرتب اور مدون کردہ کتابوں میں‌ اردو کا بہترین انشائی ادب، ارمغانِ ایران، ارمغانِ لاہور، 1965ء کے بہترین مقالے، توضیحی کتابیات ابلاغیات و دیگر شامل ہیں۔

حکومت پاکستان نے ڈاکٹر وحید قریشی کی خدمات کا اعتراف کرتے ہوئے انھیں صدارتی تمغہ برائے حسنِ کارکردگی عطا کیا تھا۔