Tag: اکتوبر وفات

مشہور جامع مسجد، قرطبہ کی توسیع اور تزئین و آرائش حکم دوم مستنصر باللہ کے دور میں کی گئی تھی جو ایک اموی خلیفہ تھا۔ اس کے عہد میں اندلس میں تعمیر و توسیع کا بہت زیادہ کام ہوا جب کہ وہ ایک علم دوست حکم راں بھی مشہور ہے۔

حکم دوم مستنصر باللہ نے مسجدِ قرطبہ کے توسیع کے کام میں وضو خانے، مسجد سے ملحق صدقہ خانہ، واعظین اور خادموں کی رہائش کا انتظام بھی کیا اور مسجد میں‌ قیمتی لکڑی کا ایک منبر بھی بنوایا تھا۔

حکم دوّم کے عہد میں مدینۃُ الزہرا کی تعمیر مکمل ہوئی جس کا کام اس کے والد عبد الرحمٰن الناصر کے عہد میں شروع ہوا تھا۔ اس خلیفہ نے نارمان جنگ میں شکست کے بعد قرطبہ میں ایک بحری بیڑا بنانے کا حکم دیا تھا۔

مؤرخین کہتے ہیں کہ حکم دوم کا عہد تعلیم و ثقافت کے عروج و ترّقی کا دور تھا۔ اس نے رعایا کی بہترین تعلیم کا انتظام کیا۔ اس سے پہلے یورپ میں تعلیم کا ایسا رواج نہیں تھا۔ مشہور ہے کہ اس نے مسلمان اور غیر مسلم علما کے لیے عطیات جاری کیے۔ مشہور ہسپانوی مؤرخ ریمون میننڈیز نے لکھا ہے: اندلس کی خلافت اس زمانے میں اپنے اوج کمال کو پہنچ گئی تھی، پورے اسپین میں امن قائم تھا۔

حکم دوّم مستنصر باللہ اندلس کی اموی سلطنت کا نواں حکم ران تھا جس کی خلافت کا اعلان 928ء میں کیا گیا۔ وہ اپنی علم دوستی کے لیے مشہور تھا۔ ایک اندازے کے مطابق اس کے کتب خانے میں تقریباً چار لاکھ کتابیں تھیں جن میں مقامی مصنّفین کی ہر کتاب کے علاوہ لوگوں سے اس تک پہنچنے والی کتب ہی نہیں‌ مخلتف دوسرے ملکوں اور شہروں سے لائی گئی اہم اور نایاب کتابیں بھی شامل ہیں۔

حکم دوم بن عبد الرحمٰن الناصر 915ء میں قرطبہ میں پیدا ہوا۔ والد کے بعد منصب سنبھالا تو "مستنصر باللہ” کا لقب اختیار کیا۔ لائق و پختہ سوچ کے ساتھ دردمند اور انتظامی امور میں‌ طاق تھا۔

ایک روز طبیعت ناساز ہوئی اور علاج کے باوجود حکم دوّم کو افاقہ نہ ہوا۔ کہتے ہیں اس دوران خلیفہ کے حکم پر سو غلاموں کو آزاد کیا گیا اور رعایا کے قرضوں کو معاف کردیا گیا تھا، تاہم حالت بگڑتی رہی اور اس نے اپنے بیٹے کی بیعت کا حکم دے دیا۔ 16 اکتوبر 976ء کو یہ مسلمان حکم راں خالقِ‌ حقیقی کی طرف لوٹ گیا۔

دنیا کے مختلف خطّوں میں اسلامی دورِ حکم رانی اور سلطنتوں کے عروج و زوال اور تاریخ کا ادنیٰ طالبِ علم بھی یہ جانتا ہے کہ ہارون الرّشید کا دور برامکہ کے تذکرے کے بغیر نامکمل ہے اور بالکل اسی طرح سلجوقیوں کا دور نظامُ الملک طوسی کے ذکر کے بغیر ادھورا ہے۔

سلجوقی حکومت میں نظامُ الملک کو اعلیٰ و ارفع مقام حاصل ہے جس نے رفاہی، اصلاحی، تعمیری اور فوجی انتظام سے متعلق اہم ترین کارنامے انجام دیے۔

نظامُ الملک طوسی کا پورا نام ابوعلی حسن ابن علی بن اسحاق تھا جو سلجوق خاندان کے سب سے مشہور بادشاہ ملک شاہ سلجوق کا وزیرِ اعلیٰ اور معتمد خاص تھا۔

آج اسی نظام الملک طوسی کا یومِ وفات ہے۔ اس باصلاحیت وزیر کے بارے میں ممتاز مؤرخ فلپ کے ہیٹی نے کہا کہ ’’یہ اسلام کی سیاسی تاریخ کا ایک ہیرا ہے۔‘‘ ایک اور تاریخ داں امیر علی نے طوسی کو یحییٰ برمکی کے بعد دوسرا قابل ترین ایشیائی منتظم قرار دیا۔

نظام الملک طوسی 10 اپریل 1018ء کو طوس کے قریب ایک گاؤں میں پیدا ہوا۔ اس نے سلجوقی حکومت میں لگ بھگ بیس سال مکمل اختیارات کے ساتھ منظّم و مؤثر انداز میں انتظامات سنبھالے اور زندگی کے بیش تر شعبوں خصوصاً درس و تدریس کے حوالے سے لا تعداد خدمات انجام دیں۔ سلجوقی نظم و نسق اور مستحکم حکومت کے پسِ پردہ نظامُ الملک طوسی کی ذہانت، صلاحیت اور مہارت تھی جس نے مملکت کو استحکام اور خوش حال کیا۔ نظام الملک طوسی بغداد کے سفر کے دوران صحرائے سینا سے گزرتے ہوئے 1092ء کو ایک قاتلانہ حملے میں دنیا سے رخصت ہوگیا تھا۔

مؤرخین نے لکھا ہے کہ طوسی تعلیم کا رسیا اور عالموں، فاضلوں، ادبا و شعرا کا قدر دان تھا۔ دربار میں ملک بھر کے مشاہیر، دانش ور اسی کے سبب اکٹھا تھے۔ اسی کے دور میں‌ 1066ء میں اسلامی دنیا کی پہلی عظیم نظامیہ یونی ورسٹی نیشا پور میں قائم کی گئی۔

نظام الملک طوسی نے مشہور شاعر، ماہرِ ارضیات و جغرافیہ عمر خیاّم کے تعاون سے ’’جلالی کیلنڈر‘‘ کا اجرا بھی کیا تھا۔ طوسی نے حکومت کے انتظامی امور، رموزِ مملکت اور سیاست پر اہم ترین کتاب ’’سیاست نامہ‘‘ تحریر کی جو اس کے ذاتی تجربات، علم اور مشاہدات پر مشتمل تھی۔

نظام الملک کا ایک اور بڑا کارنامہ ملک بھر میں خصوصاً سیاسی، انتظامی، حکومتی اور افواج میں جاسوسی و مخبری کے نظام کو رائج کرکے اسے جدید اور عصری خطوط پر آراستہ کرنا ہے۔ مؤرخین لکھتے ہیں کہ طوسی نے ساری عمر خدمتِ اسلام اور فروغِ تعلیم میں گزاری۔

ابوالجلال ندوی مشہور محقّق، نقّاد، معلّم اور ماہرِ لسانیات تھے جنھوں نے موئن جو دڑو سے برآمد ہونے والی قدیم مہروں کی تشریح و توضیح پر تنقیدی اور وقیع کام کیا۔ وہ 14 اکتوبر 1984ء کو وفات پاگئے تھے۔

دارُ العلوم ندوۃُ العلما سے فراغت پانے والے ابوالجلال ہندوستانی نژاد پاکستانی تھے۔ وہ سید سلیمان ندوی کی نگرانی میں دارُ المصنّفین میں کام کرنے والوں میں شامل تھے، جہاں انھیں علمی و تحقیقی ماحول میں ادبی و لسانیات سے گہرا شغف ہوگیا اور بعد ازاں ان کی تحقیق اور علمی مواد رسائل کی بدولت عام ہوا۔

ابو الجلال ندوی کی زندگی کو دو ادوار میں منتقسم کیا جائے تو ایک طرف وہ ہندوستان میں رہ کر اعلام القرآن اور قدیم تہذیبوں بالخصوص یمنی تہذیب کے کتبات وغیرہ پر کام کرتے رہے اور بعد میں پاکستان آکر ہڑپہ اور موئن جو دڑو جیسی تہذیبوں پر کام کیا۔

وہ اردو، عربی، فارسی اور انگریزی زبانوں کے ساتھ قدیم زبانیں عبرانی اور سنسکرت بھی جانتے تھے جس سے انھوں نے اپنے تحقیقی کام میں بہت مدد لی اور قدیم تاریخ اور مخطوطات کو سمجھا۔

ابو الجلال ندوی 1894ء میں اعظم گڑھ، برطانوی ہندوستان میں پیدا ہوئے۔ابتدائی تعلیم گاؤں کے مدرسے اور اپنے والد سے حاصل کی، اور پھر دار العلوم ندوۃُ العلما لکھنؤ میں داخل ہوگئے۔ فراغت کے بعد شبلی نیشنل کالج میں مدرس ہوئے۔ 1923ء میں سید سلیمان ندوی نے انھیں دارُ المصنّفین میں کام کرنے کا موقع دیا۔

1927ء میں ابو الجلال ندوی نے سید سلطان بہمنی اور نذیر احمد شاکر کے ساتھ مل کر مدراس سے روزنامہ مسلمان جاری کیا جو اب بھی جاری ہے اور تمل ناڈو کا واحد اردو اخبار ہے جس نے کتابت کے فن کو زندہ رکھا ہوا ہے۔

لسانیات اور دوسرے تحقیقی موضوعات پر ان کے مضامین معارف اور دیگر جرائد میں شائع ہوئے اور علمی و ادبی حلقوں کو اپنی جانب متوجہ کیا۔ لسانیات، علم الاشتقاق اور تقابلِ ادیان ان کا خاص موضوع تھا۔

وادیٔ سندھ خصوصاً موئن جو دڑو سے برآمد ہونے والی قدیم مہروں کی تشریح و توضیح کے علاوہ قدیم رسم الخط پر ان کے متعدد مقالات بھی شائع ہوئے جو ایک اہم کام تھا۔

ابو الجلال ندوی کراچی میں ملیر، سعود آباد کے قبرستان میں آسودۂ خاک ہوئے۔

تحریکِ پاکستان کے نام ور راہ نما راجا امیر احمد خان المعروف راجا صاحب محمود آباد 1973ء میں آج ہی کے دن وفات پاگئے تھے۔

راجا صاحب کا شمار قائدِ اعظم کے رفیق اور تحریکِ‌ پاکستان کے ان عظیم راہ نماؤں میں ہوتا ہے جنھوں نے آزادی کے لیے عملی میدان میں نہ صرف اپنی تمام استعداد اور صلاحیتوں کو استعمال کیا بلکہ اپنی دولت بھی بے دریغ تحریکی کاموں پر خرچ کی۔

وہ 5 نومبر 1914ء کو پیدا ہوئے تھے۔ راجا صاحب کوئی عام ہندوستانی نہیں تھے بلکہ ان کا تعلق یو پی کے ایک حکم ران گھرانے سے تھا۔ ان کے والد مہا راجا سر محمد علی خان یو پی کی مشہور ریاست محمود آباد کے والی تھے۔ اسی گھرانے میں راجا صاحب نے آنکھ کھولی اور خاندانی ماحول پھر روپے پیسے کی فراوانی دیکھی، ان کی تعلیم و تربیت بڑے اچھے پیمانے پر ہوئی۔ انھوں نے اردو کے علاوہ انگریزی اور فارسی زبانوں پر عبور حاصل کیا۔

23 مارچ 1931ء کو ان کے والد کی وفات کے بعد راجا امیر احمد خان محمود آباد کے والی بن گئے اور اسی کے ساتھ مسلمانوں کے قومی مسائل کے حل کے لیے مسلم لیگ کے پلیٹ فارم سے سیاست میں فعال حصہ لینے لگے۔

اس زمانے میں مسلم لیگ کو جب کبھی مالی امداد کی ضرورت پڑی راجا صاحب نے سب سے پہلے بڑھ کر اس ضرورت کو پورا کیا۔ انھوں نے اپنی وسیع و عریض ریاست کی ساری آمدنی مسلمانوں کے مسائل کے حل کے وقف کردی تھی۔

1947ء میں جب پاکستان بنا تو راجا صاحب پاکستان چلے آئے۔ انھیں یہاں متعدد مرتبہ وزارت اور سفارتی عہدوں کی پیشکش ہوئی لیکن راجا صاحب نے ہمیشہ اس سے گریز کیا۔ وہ ایسے پُرخلوص، درویش صفت اور جاہ و منصب سے بے نیاز انسان تھے جس کی زندگی کا واحد مقصد تحریک اور آزادی رہا۔

بعد میں راجا صاحب انگلستان چلے گئے جہاں وہ اسلامک ریسرچ سینٹر سے وابستہ تھے۔ انھوں نے لندن میں انتقال کیا اور مشہد میں سپردِ خاک کیے گئے۔

آج قادرُ الکلام شاعر امیر مینائی کا یومِ وفات ہے۔ وہ اپنے کلام کی رنگا رنگی اور تنوع کے سبب شعروسخن کی دنیا میں ممتاز ہوئے۔

انھوں نے اپنے کلام میں عشق و محبّت، کیف و مستی، رندی و سرشاری کے ساتھ زہد و تقویٰ کے مضامین کو نہایت کیف و انبساط اور ندرت و خوش سلیقگی سے برتا اور اپنے کمالِ فن کا لوہا منوایا۔

امیر مینائی شاعر ہی نہیں نثر نگار اور لغت نویس بھی تھے جو زبان و بیان پر ان کے عبور کا مظہر ہے۔ ان کا نام امیر احمد تھا، سن 1828ء میں لکھنؤ میں آنکھ کھولی اور 13 اکتوبر 1900ء میں حیدرآباد دکن میں وفات پائی۔

امیر مینائی نے شروع گھر میں اپنے والد اور بھائی سے ابتدائی تعلیم پائی اور بعد میں مفتی سعد اللہ مراد آبادی سے فارسی، عربی سیکھی اور ادب میں فیض اٹھایا۔ شاعری کا شوق بچپن سے تھا۔

پندرہ سال کی عمر میں منشی مظفر علی اسیر کے شاگرد ہو گئے جو اپنے زمانہ کے مشہور شاعر اور ماہرِعروض تھے۔ اس زمانہ میں لکھنؤ میں شاعری کا چرچا عام تھا۔ امیر مینائی کا کلام جلد ہی لکھنؤ اور پھر دوسرے شہروں تک مشہور ہوگیا۔ ان کی تعریف سن کر 1852ء میں نواب واجد علی شاہ نے اپنے دربار میں‌ طلب کیا اور وظیفہ جاری کرتے ہوئے انھیں اپنی اولادوں کا اتالیق مقرر کردیا۔ لیکن اودھ پر انگریزوں کے قبضہ کے بعد اور غدر کی وجہ سے دربدر ہوئے اور ان کا بہت سا کلام بھی ضائع ہو گیا۔ تب وہ کسی طرح رام پور پہنچے اور کلب علی خان کے عہد میں جہاں کئی باکمال اور نادرِ روزگار ہستیاں اپنے علم و فن کے سبب عزّت و احترام اور وظیفہ پارہی تھیں، امیر مینائی بھی دربار سے وابستہ ہوگئے۔

یہاں ان کی شاعری کا خوب چرچا ہوا۔ بعد میں حیدر آباد دکن جیسی مرفہ الحال ریاست کے عظیم سخی اور علما و ادبا کے مشہور خیرخواہ نظام کی دعوت پر وہاں پہنچے، لیکن قسمت کو کچھ اور ہی منظور تھا۔ یہ شاعرِ بے بدل اپنے فن و کمال سے دربارِ دکن میں کیا جگہ پاتے کہ انھیں وہاں بیماری نے آلیا۔ امیر مینائی دکن میں انتقال کرگئے۔

وہ طبعاً شریف النفس، پاک باز، عبادت گزار اور متّقی تھے۔ ان سے متعلق ایک قصّہ مشہور ہے کہ جن دنوں رام پور میں بارش نہ ہونے کی وجہ سے قحط سالی کے آثار تھے تو امیر مینائی کسی کام کی غرض سے رام پور میں تھے۔ ان سے کسی نے نواب صاحب کی پریشانی کا ذکر کیا اور دُعا کو کہا تو انھوں نے یہ دعائیہ کلام پڑھا جس کے چند اشعار پیشِ خدمت ہیں۔

یا خدا خلق کو جینے کا سہارا ہو جائے
ابرِ رحمت کو برسنے کا اشارہ ہو جائے

جوش میں ابرِ کرم آئے تو جل تھل بھر جائیں
کب سے ناکام ہیں اب کام ہمارا ہو جائے

باغ شاداب ہو، کھیتی ہو ہری، دل ہوں نہال
عیش و آرام سے خلقت کا گزارا ہو جائے

اپنے مخلوق کو تو کال کے پھندے سے نکال
یہ مصیبت نہیں ایسی کہ گوارا ہو جائے

اس تباہی میں ہے تھوڑی سی عنایت ہی بہت
ڈوبتے کے لیے تنکے کا سہارا ہو جائے

ایک چھینٹا جو پڑے ابر و کرم کا تیرے
درد و دُکھ دور ہمارا ابھی سارا ہو جائے

کہتے ہیں اس کے بعد رام پور میں ابرِ کرم خوب برسا۔

حضرت امیرؔ مینائی کی شاعری کے موضوعات میں خدا پرستی، دین داری، حسنِ خلق کی تلقین اور آخرت کی فکر بھی ملتی ہے۔ ان کا نعتیہ کلام بہت مشہور ہے جب کہ قصیدہ گوئی میں ان کا قدرتِ کلام مسلّم ہے۔

غزل جیسی مقبول صنفِ سخن میں ان کے کلام میں سلاست، روانی، مضمون آفرینی، نزاکتِ خیال اور شگفتہ بیانی جیسے تمام لوازم دیکھے جاسکتے ہیں۔ اکثر کلام ان کی نازک خیالی، تمثیل نگاری اور صوفیانہ مضامین سے سجا ہوا ہے۔

امیر مینائی نے شاعری کی مختلف اصناف میں طبع آزمائی کی جو اس دور میں رائج تھیں۔ ان کے بہت سے شعر زباں زدِ خاص و عام ہیں۔

یہ شعر ملاحظہ کیجیے۔

خنجر چلے کسی پہ تڑپتے ہیں ہم امیر
سارے جہاں کا درد ہمارے جگر میں ہے

امیر مینائی کو زبان و بیان اور تحقیق سے بھی لگاؤ تھا۔ انھوں نے اردو میں غلط رائج عربی اور فارسی الفاظ کی نشان دہی کی اور انھیں کتابی صورت میں اکٹھا کیا۔ ایک کتاب شعرا کا یادگار انتخاب اور سرمہ بصیرت کے علاوہ امیراللغات ان کا بڑا کارنامہ ہے جب کہ دیوان بھی شایع ہوئے۔