Tag: اکرام اللہ گنڈاپور

اسلام آباد: ڈی آئی خان خودکش حملے میں پی ٹی آئی کے امیدوار اکرام اللہ گنڈاپور کے جاں بحق ہونے کے بعد الیکشن کمیشن نے پی کے 99 ڈی آئی خان میں انتخابات ملتوی کردئیے۔

تفصیلات کے مطابق ڈی آئی خان خودکش حملے میں اکرام اللہ گنڈا پور کے جاں بحق ہونے کے بعد پی کے 99 ڈی آئی خان میں انتخابات ملتوی کردئیے گئے ہیں، الیکشن کمیشن کے مطابق پی کے 99 میں الیکشن کا شیڈول بعد میں جاری کیا جائے گا۔

دوسری جانب اکرام اللہ گنڈاپور پر خودکش حملے کی تحقیقات کے لیے اعلیٰ سطح کی کمیٹی تشکیل دے دی گئی ہے، سربراہ محکمہ انسداد دہشت گردی تحقیقاتی کمیٹی کی سربراہی کریں گے۔

نگراں وزیر اعلیٰ خیبرپختونخوا نے کمیٹی کو رپورٹ پیش کرنے کی ہدایت کردی، ایس پی، ایس ایس پی ہیڈکوارٹرز، ڈی ایس پی انویسٹی گیشن کمیٹی کے رکن ہوں گے، آئی بی، آئی ایس آئی اور ایم آئی کے نمائندے بھی کمیٹی میں شامل ہوں گے۔

نگراں وزیر داخلہ اعظم خان نے ڈی آٗی خان دھماکے کی شدید مذمت کی اور اکرام اللہ گنڈاپور کے لواحقین سے تعزیت کا اظہار کیا۔

نگراں وزیر داخلہ کا کہنا تھا کہ الیکشن کے پرامن انعقاد کو ہر حال میں یقینی بنائیں گے، دشمن ملک کو عدم استحکام سے دوچار کرنا چاہتا ہے، دشمنوں کے عزائم کو پوری قوم مل کر ناکام بنائے گی۔

واضح رہے کہ ڈیرہ اسماعیل خان کی تحصیل کولاچی میں پی ٹی آئی امیدوار اکرام خان گنڈا پورکی گاڑی پرخودکش حملہ ہوا تھا جس کے نتیجے میں ان کا ڈرائیورموقع پرہی جاں بحق ہوگیا، جبکہ اکرام خان گنڈا پور ڈسٹرکٹ ہیڈ کوارٹر اسپتال پشاور میں دوران علاج زخموں کی تاب نہ لاتے ہوئے جاں بحق ہوگئے تھے۔

خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔