اکشے کمار کی فلم ”مشن رانی گنج“ ٹکٹ کاؤنٹرز پر اپنی گرفت برقرار رکھنے کے لیے جدوجہد میں مصروف ہے۔
بھارتی میڈیا کے مطابق جمعہ کے روز سست آغاز کے بعد ہفتے کے آخر میں اس کی رفتار بڑھنے کی توقع تھی، مگر اس میں کوئی اضافہ نہیں ہوا، فلم ہفتے کے پہلے روز(پیر) کو بھی شائقین کی توجہ حاصل کرنے میں کامیاب نہ ہوسکی۔
فلم سینما گھروں میں ریلیز کے چوتھے دن صرف 1.25کروڑ روپے کمانے میں کامیاب ہوسکی، جس کے بعد فلم کی کل کمائی 13.85 ہوگئی ہے۔
اکشے کمار، جو کبھی اپنی بیک ٹو بیک باکس آفس ہٹ فلموں کے لیے مشہور تھے، مگر اس دوران شائقین کو اپنی فلمیں دیکھنے کے لیے سینما گھروں تک لانے میں مشکلات کا سامنا کررہے ہیں۔
اگرچہ اس سے قبل ان کی آنے والی فلم ”omg 2 2023“ کو شائقین نے کافی پسند کیا تھا، مگر اکشے کمار کی ہٹ فلموں سے اگر اس کا موازنہ کیا جائے تو اس کو بھی خاص پذیرائی نہ مل سکی تھی۔
مشن رانی گنج،ایک سچے واقعے پر فلم ہے، جو مغربی بنگال کی کوئلہ کان میں پیش آیا، جہاں 65 کان کے مزدوروں کو جسونت سنگھ گل نے سیلاب زدہ کان سے محفوظ کیا۔ فلم میں پرینیتی چوپڑا، کمود مشرا اور روی کشن سمیت دیگر اداکار مرکزی کردار ادا کررہے ہیں۔
